ନୂଆଦିଲ୍ଲୀ,୨୭ା୭(ପି.ଟି.): ଭାଜପା ସଦସ୍ୟ ରମା ଦେବୀଙ୍କ ପ୍ରତି ସମାଜବାଦୀ ପାର୍ଟି ଏମ୍ପି ଆଜମ୍ ଖାନ୍ଙ୍କ ଅଶାଳୀନ ମନ୍ତବ୍ୟକୁ ଶୁକ୍ରବାର ଲୋକ ସଭାରେ ଦଳମତ ନିର୍ବିଶେଷରେ ସବୁ ସଦସ୍ୟ ବିରୋଧ କରିଛନ୍ତି। ତାଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଏମ୍ପିମାନେ ଦାବି କରିବା ପରେ ବାଚସ୍ପତି ଓମ୍ ବିର୍ଲାଙ୍କ ଆଗରେ ସୋମବାର ହାଜର ହେବା ପାଇଁ ତାଙ୍କ କାର୍ଯ୍ୟାଳୟ ପକ୍ଷରୁ ଆଜମ୍ଙ୍କୁ କୁହାଯାଇଛି। ଆପତ୍ତିଜନକ ମନ୍ତବ୍ୟ ପାଇଁ ଆଜମ୍ଙ୍କୁ ଗୃହରେ ନିଃସର୍ତ୍ତ କ୍ଷମା ମାଗିବାକୁ ହେବ। ଯଦି ସେ କ୍ଷମା ନ ମାଗନ୍ତି ତେବେ ତାଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ବାଚସ୍ପତିଙ୍କୁ କ୍ଷମତା ଦେବା ଲାଗି ଏକ ପ୍ରସ୍ତାବ ଗୃହୀତ ହେବ ବୋଲି ଏକ ସୂତ୍ରରୁ ଜଣାପଡିଛି।
ଗୁରୁବାର ଲୋକ ସଭାରେ ତିନି ତଲାକ୍ ବିଲ୍ ଉପରେ ଆଲୋଚନାବେଳେ ରମା ଦେବୀ ଗୃହରେ ଅଧ୍ୟକ୍ଷତା କରୁଥିଲେ। ଆଜମ୍ ରମାଙ୍କ ପ୍ରତି ଦ୍ୱିଅର୍ଥବୋଧକ ତଥା ଅସମ୍ମାନଜନକ ମନ୍ତବ୍ୟ ଦେଇଥିଲେ ଯାହା ଅତ୍ୟନ୍ତ ନିନ୍ଦନୀୟ। ଶୁକ୍ରବାର ଶୂନ୍ୟକାଳରେ ଭାଜପା ସଦସ୍ୟ ସଂଘମିତ୍ର ମୌର୍ଯ୍ୟ ଏହି ପ୍ରସଙ୍ଗ ଉଠାଇବା ପରେ ସମସ୍ତ ମନ୍ତ୍ରୀ ଓ ସାଂସଦ ଏହାକୁ ନିନ୍ଦା କରିଥିଲେ। ଏଭଳି ବ୍ୟବହାର ବିରୋଧରେ ପାର୍ଲାମେଣ୍ଟ ଏକ ଦୃଢ଼ ବାର୍ତ୍ତା ପଠାଇବା ଆବଶ୍ୟକ ବୋଲି ଭାଜପା, ବିଜେଡି, କଂଗ୍ରେସ, ଏନ୍ସିପି, ତୃଣମୂଳ କଂଗ୍ରେସ, ଡିଏମ୍କେ ଓ ଅନ୍ୟ ଦଳର ସଦସ୍ୟମାନେ କହିଥିଲେ। ଏଭଳି ମନ୍ତବ୍ୟରେ କେବଳ ମହିଳା ନୁହନ୍ତି, ଗୃହ ଅସମ୍ମାନିତ ହୋଇଛି। କାର୍ଯ୍ୟସ୍ଥଳରେ ଯୌନ ନିର୍ଯାତନା ବିରୋଧରେ ପାର୍ଲାମେଣ୍ଟରେ ଆଇନ ଗୃହୀତ ହୋଇଛି। ତେଣୁ ଆମେ ନୀରବ ଦର୍ଶକ ସାଜିପାରିବା ନାହିଁ ବୋଲି ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ କହିଥିଲେ।
ମହିଳାମାନଙ୍କ ପ୍ରତି ଅସଦ୍ବ୍ୟବହାରକୁ ବରଦାସ୍ତ କରାଯିବ ନାହିଁ। ସବୁ ସଦସ୍ୟ ଦଳମତ ନିର୍ବିଶେଷରେ ଏଭଳି ଏକ ବାର୍ତ୍ତା ପଠାଇବାକୁ ସେ ଆହ୍ବାନ ଦେଇଥିଲେ। ଆଜମ୍ କ୍ଷମା ମାଗନ୍ତୁ, ନଚେତ୍ ତାଙ୍କୁ ଗୃହରୁ ନିଲମ୍ବିତ କରାଯାଉ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଏବଂ ଆଇନ ମନ୍ତ୍ରୀ ରବିଶଙ୍କର ପ୍ରସାଦ ଦାବି କରିଥିଲେ। ଆଜମ୍ଙ୍କ ମନ୍ତବ୍ୟ ଅକ୍ଷମଣୀୟ ବୋଲି ବିଜେଡି ଏମ୍ପି ଭର୍ତ୍ତୃହରି ମହତାବ କହିବା ସହ ଉଦାହରଣ ସୃଷ୍ଟିକାରୀ କାର୍ଯ୍ୟାନୁଷ୍ଠାନ ନିଆଯାଉ ବୋଲି ମତ ଦେଇଥିଲେ।
