ନୂଆପଡା ଅଫିସ,୧୦ା୬:ଓଡିଶା ହାଇକୋର୍ଟ ନୂଆପଡ଼ା ଜିଲା ଭୈଷାଁଟାଲ ଗ୍ରାମପଞ୍ଚାୟତ କାର୍ଯ୍ୟାଳୟ ବଲୋଦାରେ ନିର୍ମାଣ କରିବାକୁ ଚୂଡାନ୍ତ ରାୟ ଦେଇଥିବାବେଳେ ଏହାକୁ କାର୍ଯ୍ୟକାରୀ କରିବା ଦାବିରେ ୫ରୁ ଊର୍ଦ୍ଧ୍ୱ ଗ୍ରାମବାସୀ ସୋମବାର ନୂଆପଡା ଆସି ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିଛନ୍ତି । ଜିଲାପାଳଙ୍କ ଅନୁପସ୍ଥିତି ଯୋଗୁ ଅତିରିକ୍ତ ଜିଲାପାଳଙ୍କ ଦ୍ୱାରସ୍ଥ ହୋଇଥିବାବେଳେ ପରେ ବିଡିଓଙ୍କ କାର୍ଯ୍ୟାଳୟକୁ ଯାଇ ଘେରାଉ କରି ଦାବି ଜଣାଇଛନ୍ତି । ଏଭଳି ସ୍ଥିତିରେ ଏହାକୁ ତୁରନ୍ତ କାର୍ଯ୍ୟକାରୀ କରିବାକୁ ନିଷ୍ପତ୍ତି ନେବେ ବୋଲି ବିଡିଓ ପ୍ରତିଶ୍ରୁତି ଦେଇଛନ୍ତି ।
ରାଜ୍ୟ ସରକାର ପଞ୍ଚାୟତିରାଜ ଶାସନ ବ୍ୟବସ୍ଥାକୁ ଲୋକଙ୍କ ଦ୍ୱାର ମୁହଁରେ ପଞ୍ଚାଇବାକୁ ଯାଇ ପଞ୍ଚାୟତ ସଂଖ୍ୟା ବୃଦ୍ଧି କରିଛନ୍ତି । ଏହି କ୍ରମରେ ଲୋକଙ୍କ ସୁବିଧାକୁ ଭିତ୍ତିକରି ବିଭିନ୍ନ ଜାଗାରେ ପଞ୍ଚୟତ ହେଡକ୍ୱାର୍ଟର ସବୁ ସ୍ଥାପନ ସକାଶେ ଘୋଷଣା କରିସାରିଛନ୍ତି । ହେଲେ ବିଭିନ୍ନ ଜାଗାରେ ପଞ୍ଚାୟତବାସୀଙ୍କ ମଧ୍ୟରେ ଟଣାଓଟରା ଚାଲିଥିବାବେଳେ ପ୍ରଶାସନ ଠୋସ ପଦକ୍ଷେପ ନେଇପାରୁନାହିଁ । ଫଳରେ ଜିଲାର ୪/୫ଟି ଗ୍ରାମପଞ୍ଚାୟତରେ ଏସବୁ ବ୍ୟବସ୍ଥା ଝୁଲା ହୋଇ ରହିଯାଉଛି। ଉନ୍ନୟନ କାର୍ଯ୍ୟ ବାଧାପ୍ରାପ୍ତ ହେଉଥିବା ଅଭିଯୋଗ ହେଉଛି । ଏଭଳି ଏକ ଉଦାହରଣ ହୋଇଛି ସଦର ବ୍ଲକ ଭଇଁଷାଟାଲ ଗ୍ରାମପଞ୍ଚାୟତ। ସରକାର ଏହାକୁ ଗ୍ରାମପଞ୍ଚାୟତର ମାନ୍ୟତା ଦେଇଥିବାବେଳେ ବଲୋଦାରେ କାର୍ଯ୍ୟାଳୟ ସ୍ଥାପନ କରିବାକୁ ଘୋଷଣା କରି ସେଠାରେ ଭିତିଭୂମି ବିକାଶ ସକାଶେ ଅନୁଦାନ ମଞ୍ଜୁରୀ କରିଥିଲେ। ହେଲେ ଠିକ ସମୟରେ ଭୈଷାଁଟାଲ ବାସିନ୍ଦା ହାଇକୋର୍ଟର ଦ୍ୱାରସ୍ଥ ହୋଇଥିଲେ । ଏହା ପରେ ନିର୍ମାଣ ହେବାକୁ ଥିବା ପଞ୍ଚାୟତ ଗୃହ କାର୍ଯ୍ୟ ବନ୍ଦ ହୋଇପଡିଥିଲା। ନିର୍ବାଚନ ପୂର୍ବରୁ ଭୈଷାଁଟାଲବାସିଙ୍କ ମାମଲାକୁ ହାଇକୋର୍ଟ ଖାରଜ କରି ପୂର୍ବବତ ବଲୋଦାରେ ପଞ୍ଚାୟତ ଗୃହ ନିର୍ମାଣ ସକାଶେ ନିର୍ଦ୍ଦେଶ କରିଥିଲେ। ହେଲେ ନିର୍ବାଚନ ଆଚରଣବିଧି ଲାଗୁ ହୋଇଥିବା ଯୋଗୁ ତାହା କାର୍ଯ୍ୟକାରୀ ହୋଇ ନ ଥିଲା। ହେଲେ ବର୍ତ୍ତମାନ ଦିନ ଗଡିଯାଉଛି ସିନା ପ୍ରଶାସନ ଏହା ଉପରେ ପଦକ୍ଷେପ ନେଉ ନ ଥିବାରୁ ପଞ୍ଚାୟତବାସୀଙ୍କ ମଧ୍ୟରେ ଅସନ୍ତୋଷ ପୁଞ୍ଜିଭୂତ ହେଉଛି। ସୋମବାର ପୂର୍ବତନ ପରକୋଡ ସରପଞ୍ଚ ପ୍ରେମ କୁମାର ନାଏକ, ଜିଲା ଓକିଲ ସଂଘ ସଭାପତି ପ୍ରସନ୍ନ କୁମାର ପାଢୀ, ଚତୁର୍ଭୁଜ ଶର୍ମାଙ୍କ ନେତୃତ୍ୱରେ ଶତାଧିକ ଗ୍ରାମବାସୀ ନୂଆପଡା ଜିଲାପାଳଙ୍କ ଅଫିସରେ ପହଞ୍ଚତ୍ଥିଲେ। ଜିଲାପାଳଙ୍କ ଅନୁପସ୍ଥିତିକ୍ରମେ ଅତିରିକ୍ତ ଜିଲାପାଳ ସୀତାରାମ ପଟେଲଙ୍କୁ ଭେଟି ଜଣାଇଥିଲେ। ଏହା ପରେ ନୂଆପଡା ବିଡିଓ ସୁନୀଲ କୁମାର କେର୍କେଟାଙ୍କୁ ଭେଟି ଦାବି ଜଣାଇଥିଲେ । ବିଡିଓ ହାଇକୋର୍ଟଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରାଯିବ। ସପ୍ତାହେ ସମୟ ଦେବାକୁ କହିଥିଲେ। ଏହାକୁ ତୁରନ୍ତ କାର୍ଯ୍ୟକାରୀ ନ କଲେ ଆଗାମୀ ଦିନରେ ଆନ୍ଦୋଳନାତ୍ମକ ପଦକ୍ଷେପ ନିଆଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଗ୍ରାମବାସୀଙ୍କ ମଧ୍ୟରେ ଚନ୍ଦୁ ନାଏକ, ମେଳୁ ନାଏକ, ଜୀବନଲାଲ ସାହୁ, ଡକ୍ଟର ମାଝି, ସୀତାରାମ ମାଝି ପ୍ରମୁଖ ସାମିଲ ଥିଲେ।
