ନୟାଗଡ଼ ଅଫିସ,୧୬।୭- ବର୍ଷା ଆସିଲେ ଡରୁଛନ୍ତି ନୟାଗଡ଼ ୧ ନମ୍ବର ଓ୍ବାର୍ଡବାସୀ। ସୋମବାର ଅପରାହ୍ନରେ ଦୁଇଘଣ୍ଟା ବର୍ଷାରେ ପୁଣି କଲବଲ ହୋଇଛନ୍ତି ସେମାନେ। ପାଣି ନିଷ୍କାସନର ବ୍ୟବସ୍ଥା ନ ଥିବାରୁ ବର୍ଷାଜଳ କେଉଁଆଡ଼େ ନ ଯାଇ ସେଠାରେ ଜମି ରହିଥିଲା। ଫଳରେ ଓ୍ବାର୍ଡବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। କାହା ଘର ଭିତରେ ବର୍ଷାପାଣି ପଶିଯାଇଥିଲା ତ ଆଉ କାହା ବାରଣ୍ଡାରେ ନର୍ଦ୍ଦମା ପାଣି ଭାସୁଥିଲା। ବର୍ଷା ଓ ନର୍ଦ୍ଦମା ପାଣି ଏକାକାର ହୋଇ ଲୋକଙ୍କ ଦୁର୍ଦ୍ଦଶା ବଢ଼ାଇଥିଲା। ପରେ ନୟାଗଡ଼ ମ୍ୟୁନିସିପାଲିଟି କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚତ୍ ଜେସିବି ସାହାଯ୍ୟରେ ଡ଼୍ରେନ୍ ସଫା କରିବା ସହିତ ପାଣି ବାହାରିବା ପାଇଁ ବନ୍ଦୋବସ୍ତ କରିଥିଲେ।
ଗତ ଶନିବାର ଅପରାହ୍ନରେ ହୋଇଥିବା ୨ ଘଣ୍ଟା ବର୍ଷାରେ ନୟାଗଡ ମ୍ୟୁନିସିପାଲିଟିର ୧ ନମ୍ବର ୱାର୍ଡ଼ ବେହାଲ ହୋଇଯାଇଛି। ସେହି ସମୟରେ ଅଧିକାଂଶ ବ୍ୟକ୍ତିଙ୍କ ଘରେ ପାଣି ପଶି ବୁଡ଼ିଯାଇଥିବାର ଦେଖିବାକୁ ମିଳିଥିଲା। ପରେ ମୋଟର ଲଗାଯାଇ ପାଣି କଢ଼ାଯାଇଥିଲା। ଏହିଭଳି ଅସ୍ଥାୟୀ ସମାଧାନ ହେଉଥିବାରୁ ଆଗାମୀ ଦିନରେ ବର୍ଷା ହେଲେ ପୁନର୍ବାର ଏହି ସମସ୍ୟା ମୁଣ୍ଡ ଟେକିବ। ତେଣୁ ଏହାର ସ୍ଥାୟୀ ସମାଧାନ ପାଇଁ ୱାର୍ଡ଼ବାସୀ ଦାବି କରିଛନ୍ତି। ଫଳରେ ବର୍ଷାକୁ ୧ ନମ୍ବର ୱାର୍ଡ଼ବାସିନ୍ଦା ଡରୁଛନ୍ତି ବୋଲି ଆଲୋଚନା ହେଉଛି। ଅନ୍ୟପକ୍ଷେ ଉକ୍ତ କଲୋନୀରେ ସରକାରୀ ଜାଗା ନ ଥିବାରୁ କେଉଁପଟେ ବର୍ଷାଜଳ ନିଷ୍କାସନ କରାଯିବ, ତାହା ମ୍ୟୁନିସିପାଲିଟି କର୍ତ୍ତୃପକ୍ଷଙ୍କ ପାଇଁ ଚିନ୍ତାର ବିଷୟ ପାଲଟିଛି। ତୁରନ୍ତ ଏହାର ସମାଧାନ କରାଯିବ ବୋଲି ମ୍ୟୁନିସିପାଲିଟି ପକ୍ଷରୁ ସୂଚନା ଦିଆଯାଇଛି।
