ଡେରାଡୁନ,୧୮।୮: ଉତ୍ତରାଖଣ୍ଡ ଏମିତି ଏକ ରାଜ୍ୟ ଯେଉଁଠି ଅନେକ ଉତ୍ସବକୁ ପ୍ରକୃତି ଓ ଦେବତାଙ୍କ ଉଦ୍ଦେଶ୍ୟରେ ସମର୍ପଣ କରାଯାଇଥାଏ। ଆହୁରି ମଧ୍ୟ ଏଠାରେ ଋତୁ ଅନୁଯାୟୀ ଅନେକ ଉତ୍ସବ ପାଳନ କରାଯାଇଥାଏ। ପ୍ରକୃତିକୁ ସମର୍ପଣ କରାଯାଇଥିବା ସେମିତି ଏକ ଉତ୍ସବ ହେଉଛି ‘ବଟର ଫେଷ୍ଟିଭାଲ’ ଯାହା ସମୁଦ୍ର ପତନଠାରୁ ୧୩ହଜାର ଫୁଟ ଉଚ୍ଚରେ ପାଳନ କରଯାଇଥାଏ। ଏହା ଉତ୍ତରାଖଣ୍ଡର ଉତ୍ତରକାଶୀ ଜିଲାର ବୁଗ୍ୟାଲରେ ପାଳନ କରାଯାଏ। ଏହା ଉତ୍ତରକାଶୀର ଶୈଥାଲ ଅଞ୍ଚଳରେ ଅବସ୍ଥିତ। ଏହି ଫେଷ୍ଟିଭାଲକୁ ସ୍ଥାନୀୟ ଭାଷାରେ ‘ଅଂଡୁଡି’ କୁହାଯାଏ। ଏଥିରେ ପ୍ରଥମେ କ୍ଷୀର ଦେଉଥିବା ପ୍ରାଣୀଙ୍କୁ ପୂଜାସ୍ଥଳକୁ ନିଆଯାଇଥାଏ। ସେଠାରେ ପ୍ରଥମେ ଗୋବର୍ଦ୍ଧନ ପର୍ବତକୁ ପୂଜା କରାଯିବା ସହ ସ୍ଥାନୀୟ ଗ୍ରାମବାସୀ ପରସ୍ପରକୁ ଲହୁଣି ଲଗାଇ ଥାଆନ୍ତି। ଏହାପରେ ଇଷ୍ଟ ଦେବତା ଓ ବନ ଦେବୀଙ୍କୁ ପୂଜା କରାଯାଏ। ଏହାପରେ ହୋଲିଭଳି ପିଚକାରୀରେ କ୍ଷୀର ଓ ଦହି ଭର୍ତ୍ତି କରି ଉପସ୍ଥିତ ଥିବା ଲୋକେ ପରସ୍ପର ଉପରକୁ ପକାଇଥାଆନ୍ତି। ଲୋକଙ୍କର ବିଶ୍ୱାସ ରହିଛି ଯେ ଏହି ପର୍ବ ପାଳନ କଲେ କ୍ଷୀର ଦେଉଥିବା ପଶୁମାନେ ସୁସ୍ଥ ସବଳ ରହିଥାଆନ୍ତି ଓ ଭଲ କ୍ଷୀର ଦେଇଥାଆନ୍ତି। ଏହି ଉତ୍ସବରେ ରାଧା କୃଷ୍ଣଙ୍କ ପ୍ରତିକ ସ୍ବରୁପ ଜଣେ ଯୁବତୀ ଓ ଜଣେ ଯୁବକଙ୍କୁ ସଜାଇ ମୁଖ୍ୟଦ୍ୱାରରେ ଠିଆ କରି ଦିଆଯାଏ। ଆଉ ଏମାନେ ଲହୁଣି ହାଣ୍ଡି ଭାଙ୍ଗିବା ପରେ ‘ବଟର ଫେଷ୍ଟିଭାଲ’ ଆରମ୍ଭ କରାଯାଇଥାଏ। ଏଥିରେ ଯେଉଁମାନେ ସାମିଲ ହୋଇଥାଆନ୍ତି ସେମାନେ ନୃତ୍ୟଗୀତରେ ମଜି ଯାଆନ୍ତି। କ୍ଷୀର ଦେଉଥିବା ପଶୁ ଓ ଈଶ୍ୱରଙ୍କୁ ଧନ୍ୟବାଦ ଦେବା ଉଦ୍ଦେଶ୍ୟରେ ଏହା ପାଳନ କରାଯାଏ ବୋଲି କୁହାଯାଏ। ଏହା ବର୍ଷା ଋତୁର ଶେଷ ଭାଗରେ ପାଳନ କରାଯାଇଥାଏ।
