ବେଲଗ୍ରେଡ,୧୦।୬(ଏ.ପି.): ଅଭିଜ୍ଞ ସର୍ବିୟା ଟେନିସ ତାରକା ନୋଭାକ ଜୋକୋଭିଚ୍ ବର୍ଷର ଚତୁର୍ଥ ତଥା ଅନ୍ତିମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ୟୁଏସ୍ ଓପନ ନ ଖେଳିବାକୁ ଚିନ୍ତା କରୁଛନ୍ତି। ଯଦି ୟୁଏସ୍ ଓପନ ଆୟୋଜନ ହୁଏ ତେବେ ସେ ଫ୍ରେଞ୍ଚ୍ ଓପନ ଖେଳିବାକୁ ଅଧିକ ପସନ୍ଦ କରିବେ। କୋଭିଡ-୧୯ ମହାମାରୀ ପାଇଁ ନ୍ୟୁୟର୍କରେ ଅତ୍ୟଧିକ କଟକଣା ଜାରି କରାଯିବ। ଫଳରେ ସ୍ବାଧୀନ ଭାବେ ୟୁଏସ୍ ଓପନ୍ ଖେଳିବା ଅସମ୍ଭବ ହୋଇପଡିବ ବୋଲି ଜୋକୋଭିଚ୍ ସାର୍ବିୟାର ଷ୍ଟେଟ୍ ବ୍ରୋଡକାଷ୍ଟର ଆରଟିଏସ୍କୁ ସାକ୍ଷାତ୍କାର ଦେବା ଅବସରରେ କହିଛନ୍ତି। ୟୁଏସ୍ ଓପନ୍ ଖେଳିବାକୁ ପ୍ରାୟ ସବୁ ଖେଳାଳି ଅରାଜି ହେବେ। ଏ ସଂକ୍ରାନ୍ତରେ ସେ ସବୁ ଖେଳାଳିଙ୍କ ସହ କଥା ହୋଇଛନ୍ତି ବୋଲି ସେ କହିଛନ୍ତି।
ସେପ୍ଟେମ୍ବରରୁ କ୍ଲେକୋର୍ଟରେ ସେସନ ଆରମ୍ଭ ହେବ ବୋଲି ସେ ଅନୁମାନ କରିଛନ୍ତି। ଅନ୍ୟସବୁ କ୍ରୀଡ଼ାଭଳି ଟେନିସ ମଧ୍ୟ କୋଭିଡ-୧୯ ମହାମାରୀ କାରଣରୁ ବାଧାପ୍ରାପ୍ତ ହୋଇଛି। ଜୁଲାଇ ଅନ୍ତିମ ଭାଗ ପର୍ଯ୍ୟନ୍ତ ସବୁ ଟୁର୍ନାମେଣ୍ଟକୁ ବାତିଲ କରାଯାଇଛି। ଏଥିରେ ମଧ୍ୟ ଫ୍ରେଞ୍ଚ୍ ଓପନ୍ ସାମିଲ ରହିଛି। ଏହି ଟୁର୍ନାମେଣ୍ଟକୁ ସେପ୍ଟେମ୍ବର ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ଅନ୍ୟପଟେ ଦ୍ୱିତୀୟ ବିଶ୍ୱଯୁଦ୍ଧ ପରେ ଅର୍ଥାତ ୧୯୪୫ ପରେ ପ୍ରଥମଥର ପାଇଁ ଓ୍ବିମ୍ବେଲଡନକୁ ବାତିଲ କରିବାକୁ ନିଷ୍ପତ୍ତି ନିଆଯାଇଛି। ସେହିପରି ଅଗଷ୍ଟ ୩୧ରେ ୟୁଏସ୍ ଓପନ୍ ପରିବର୍ତ୍ତିତ କାର୍ଯ୍ୟସୂଚୀ ଅନୁସାରେ ଆୟୋଜନ କରାଯିବାକୁ ନିଷ୍ପତ୍ତି ନିଆଯାଇଛି। ଫଳରେ ଆସନ୍ତା ସପ୍ତାହରେ ୟୁଏସ୍ ଟେନିସ ଆସୋସିଏଶନ ଟୁର୍ନାମେଣ୍ଟ ଆୟୋଜନ ନେଇ ନିଷ୍ପତ୍ତି ନେବ ବୋଲି ଆଶା କରାଯାଉଛି। ଯଦି ୟୁଏସ୍ ଓପନ୍ ଆୟୋଜନ ହୁଏ ତେବେ ଜୋକୋଭିଚ୍ ୧୪ ଦିନ କ୍ୱାରାଣ୍ଟାଇନ୍ରେ ରହିବାକୁ ଚାହିଁବେନି। କାରଣ ଆମେରିକାର ବାହାର ଖେଳାଳିଙ୍କୁ ଏହି ନିୟମ ମାନିବାକୁ ହେବ। ଆମେରିକା ତଥା ନ୍ୟୁୟର୍କରେ କଟକଣା କଡ଼ାକଡ଼ି ହେବା ନିଶ୍ଚିତ। ତେଣୁ ୟୁଏସ୍ ଓପନରୁ ଓହରିବାକୁ ଚିନ୍ତା କରୁଛି ବୋଲି ଜୋକେଭିଚ୍ କହିଛନ୍ତି।
