ନୂଆଦିଲ୍ଲୀ,୧୨।୬(ପି.ଟି.)- ଭାରତୀୟ କ୍ରିକେଟ ଅଧିନାୟକ ବିରାଟ କୋହଲି ପୁଣି ଥରେ ବିଶ୍ୱର ସର୍ବାଧିକ ଆୟକାରୀ ଆଥଲେଟମାନଙ୍କ ତାଲିକାରେ ସାମିଲ ହୋଇଛନ୍ତି। ଜଣାଶୁଣା ପତ୍ରିକା ଫୋବର୍ସ ଚଳିତ ବର୍ଷର ସର୍ବାଧିକ ଆୟକାରୀ ଆଥଲେଟ୍ଙ୍କ ତାଲିକା ପ୍ରକାଶିତ କରିଛି। ଏଥିରେ ଏକମାତ୍ର ଭାରତୀୟ ଆଥଲେଟ ଭାବେ କୋହଲି ସାମିଲ ହୋଇ ତାଲିକାର ୧୦୦ତମ ସ୍ଥାନରେ ରହିଛନ୍ତି। ବାର୍ସିଲୋନା ତଥା ଆର୍ଜେଣ୍ଟିନା ଫୁଟବଲ ସୁପରଷ୍ଟାର ଲିଓନେଲ ମେସି ଏହି ତାଲିକାର ଶୀର୍ଷରେ ରହିଛନ୍ତି।
କୋହଲି ବିଜ୍ଞାପନରୁ ୨୧ ମିଲିୟନ ଆମେରିକୀୟ ଡଲାର ଓ ପାଉଣା ବାବଦରେ ୪ ମିଲିୟନ ଡଲାର ରୋଜଗାର କରିଛନ୍ତି। ମୋଟ ଉପରେ ସେ ଗତ ୧୨ମାସ ମଧ୍ୟରେ ୨୫ ମିଲିୟନ ଡଲାର ହାସଲ କରିଛନ୍ତି। ଗତବର୍ଷ କୋହଲି ଏହି ତାଲିକାର ୮୩ତମ ସ୍ଥାନରେ ରହିଥିଲେ। ବିଜ୍ଞାପନ ବାବଦରେ ସେ ଅଧିକ ୧ମିଲିୟନ ଡଲାର ରୋଜଗାର କରିଥିଲେ ହେଁ ଚଳିତବର୍ଷ ୧୦୦ତମ ସ୍ଥାନକୁ ଖସିଛନ୍ତି। ଏଥର ବକ୍ସର ଫ୍ଲଏଡ ମେଓ୍ବେଦରଙ୍କୁ ପଛରେ ପକାଇ ମେସି ତାଲିକାର ୧ ନମ୍ବର ସ୍ଥାନ ଅଧିକାର କରିଛନ୍ତି। ମେସି ପାଉଣା ଓ ବିଜ୍ଞାପନ ବାବଦରେ ମୋଟ ଉପରେ ୧୨୭ ମିଲିୟନ ଆମେରିକୀୟ ଡଲାର ରୋଜଗାର କରିଛନ୍ତି। ସେହିପରି ମେସିଙ୍କ ପ୍ରତିଦ୍ୱନ୍ଦ୍ୱୀ ପର୍ତ୍ତୁଗାଲ ତଥା ଜୁଭେଣ୍ଟସ ତାରକା ଫୁଟବଲର କ୍ରିଷ୍ଟିଆନୋ ରୋନାଲ୍ଡୋ ୧୦୯ ମିଲିୟନ ଡଲାର ରୋଜଗାର କରିବା ସହ ତାଲିକାର ଦ୍ୱିତୀୟ ସ୍ଥାନରେ ରହିଛନ୍ତି।
