ଭୁବନେଶ୍ୱର, ୧୯।୩ (ବ୍ୟୁରୋ): କରୋନା ସଂକ୍ରମଣର ଭୟାବହତାକୁ ଦୃଷ୍ଟିରେ ରଖି ସମଗ୍ର ରାଜ୍ୟରେ ସିନେମା ହଲ୍ଗୁଡିକୁ ବନ୍ଦ କରି ଦିଆଯାଇଛି। ଏହାସହିତ ଫିଲ୍ମ ଶୁଟିଂକୁ ମଧ୍ୟ ବାରଣ କରାଯାଇଛି। ପୂର୍ବରୁ ଇଣ୍ଡିଆନ୍ ମୋଶନ ପିକ୍ଚର ପ୍ରଡ୍ୟୁସର୍ସ ଆସୋସିଏସନ୍(ଆଇଏମ୍ପିପିଏ) ବୈଠକରେ ୧୯ ତାରିଖରୁ ଦେଶରେ ଫିଲ୍ମ ସହ ସମସ୍ତ ଟେଲି ଧାରାବାହିକ, ଓ୍ବେବ୍ ସିରିଜ ଏବଂ ଡିଜିଟାଲ ପ୍ଲାଟ୍ଫର୍ମର ସମସ୍ତ ମନୋରଞ୍ଜନଧର୍ମୀ କାର୍ଯ୍ୟକ୍ରମର ଶୁଟିଂକୁ ବନ୍ଦ ରଖିବାକୁ ସ୍ଥିର ହୋଇଥିଲା। ଏବେ ଏହାକୁ ସମର୍ଥନ ଦେଇଛି ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ(ଓଏଫ୍ଡିସି)। ଓଏଫ୍ଡିସି ପକ୍ଷରୁ ସମସ୍ତ ପ୍ରଯୋଜକ, ନିର୍ଦ୍ଦେଶକ ଓ ଫିଲ୍ମ ନିର୍ମାତାଙ୍କୁ ସେମାନଙ୍କ ଓଡ଼ିଶା ୟୁନିଟ୍ର ଫିଲ୍ମ, ଧାରାବାହିକ/ଶୋ’, ୱେବ୍ ସିରିଜ୍ ଆଦିର ଶୁଟିଂ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ଏନେଇ ବୁଧବାର ସ୍ବତନ୍ତ୍ର ଆଡଭାଇଜରି ଜାରି କରାଯାଇଛି। ୧୯ ତାରିଖରୁ ଆସନ୍ତା ୩୧ ତାରିଖ ପର୍ଯ୍ୟନ୍ତ ସମସ୍ତ ଶୁଟିଂ ସ୍ଥଗିତ ରଖିବାକୁ ଓଏଫ୍ଡିସି ପରିଚାଳନା ନିର୍ଦ୍ଦେଶକ ଡ. ନିତିନ୍ ଜାୱାଲେ କହିଛନ୍ତି।
