ନୂଆଦିଲ୍ଲୀ, ୨୪।୧୨- ଅଭିଜ୍ଞ ମହିଳା ରେସଲର ଗୀତା ଫୋଗତ ମା’ ହେବାର ସୌଭାଗ୍ୟ ଲାଭ କରିଛନ୍ତି। ମଙ୍ଗଳବାର ସେ ଓ ତାଙ୍କ ସ୍ବାମୀ ରେସଲର ପବନ କୁମାର ପୁତ୍ର ସନ୍ତାନ ଲାଭ କରିଛନ୍ତି। ୨୦୧୦ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜୟିନୀ ଗୀତା ଏନେଇ ଟୁଇଟରରେ ଏକ ଫଟୋ ପୋଷ୍ଟ କରିଛନ୍ତି। ଏଥିରେ ପତି, ପୁଅ ସମେତ ଗୀତଙ୍କୁ ଦେଖିବାକୁ ମିଳିଛି। ପୂର୍ବତନ ପହିଲବାନ ମହାବୀର ସିଂ ଫୋଗତଙ୍କ ବଡ଼ ଝିଅ ଗୀତା ୩ ବର୍ଷ ତଳେ ରେସଲର ପବନ କୁମାରଙ୍କୁ ବିବାହ କରିଥିଲେ। ଗୀତା ମଧ୍ୟ ୨୦୦୯ରେ ଜଳନ୍ଧର ଓ ୨୦୧୧ରେ ମେଲବୋର୍ନରେ ଅନୁଷ୍ଠିତ କମନଓ୍ବେଲ୍ଥ ଚାମ୍ପିୟନଶିପ୍ରେ ମଧ୍ୟ ସ୍ବର୍ଣ୍ଣ ପଦକ ହାସଲ କରିଥିଲେ। ଏଥିସହିତ ସେ ଏକାଧିକ ଅନ୍ତର୍ଜାତୀୟ ପ୍ରତିଯୋଗିତାରେ ରୌପ୍ୟ ଓ ବ୍ରୋଞ୍ଜ ପଦକ ମଧ୍ୟ ହାସଲ କରିଥିଲେ। ଉଲ୍ଲେଖଥାଉ କି, ଗୀତା ଓ ତାଙ୍କ ସାନ ଭଉଣୀ ବବିତା ଫୋଗତଙ୍କୁ ନେଇ ବଲିଉଡ ସିନେମା ‘ଦଙ୍ଗଲ’ ନିର୍ମାଣ କରାଯାଇଥିଲା ଓ ଏହା ସୁପର ହିଟ୍ ହୋଇଥିଲା। ସୁପରଷ୍ଟାର ଅମୀର ଖାଁ ଏହି ଦୁଇ ଭଉଣୀଙ୍କ ପିତାଙ୍କ ଭୂମିକାରେ ଅଭିନୟ କରିଥିଲେ।
