ୱାଶିଂଟନ,୩୦ା୩: ଚଳିତବର୍ଷ ଆରମ୍ଭରେ ବ୍ରିଟେନ ରାଜ ପରିବାର ଛାଡ଼ିବାକୁ ଘୋଷଣା କରିଥିବା ପ୍ରିନ୍ସ ହ୍ୟାରି ଏବଂ ତାଙ୍କ ସ୍ତ୍ରୀ ମେଘାନ ମର୍କେଲ ଆମେରିକାରେ ରହିବା ପାଇଁ କାଲିଫର୍ନିଆର ଲସ୍ ଏଞ୍ଜେଲସ୍କୁ ସ୍ଥାନାନ୍ତର ହୋଇଛନ୍ତି। ହେଲେ ସେମାନଙ୍କ ସୁରକ୍ଷା ବ୍ୟବସ୍ଥାର ଖର୍ଚ୍ଚ ଆମେରିକା ବହନ କରିବ ନାହିଁ। ସେମାନେ ସେହି ଖର୍ଚ୍ଚ ନିଜେ ବହନ କରିବେ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରବିବାର ଟୁଇଟ୍ କରି ଏହା ଜଣାଇଛନ୍ତି। ଏହା ସହ ଉଲ୍ଲେଖ କରିଛନ୍ତି ଯେ, ସେ ବ୍ରିଟେନ ରାଣୀ ଏବଂ ସେହି ଦେଶର ଭଲ ବନ୍ଧୁ।
ତଥ୍ୟ ଅନୁଯାୟୀ, ଅନେକ ମାସ ଧରି କାନାଡାରେ ରହିଥିବା ପ୍ରିନ୍ସ ହ୍ୟାରି ଓ ମେଘାନ ବ୍ରିଟିଶ ରାଜତନ୍ତ୍ରର ପ୍ରତିନିଧିତ୍ୱ ନ କରିବା ଏବଂ ଏକ ନୂତନ ଓ ସ୍ବାଧୀନ ଜୀବନଯାପନ କରିବାକୁ ନିଷ୍ପତ୍ତି ନେଇଥିଲେ। କାନାଡାରେ ସ୍ଥାୟୀ ଭାବେ ରହିବାକୁ ବ୍ରିଟେନ ଛାଡ଼ିଥିବା ଏହି ଦମ୍ପତି ଏବେ ଆମେରିକା ସ୍ଥାନାନ୍ତର ହୋଇଛନ୍ତି। କରୋନା ସଂକ୍ରମଣକୁ ଦୃଷ୍ଟିରେ ରଖି ଦୁଇ ଦେଶର ସୀମା ବନ୍ଦ ହେବା ପୂର୍ବରୁ ସେମାନେ ଏକ ଘରୋଇ ଜେଟ୍ରେ କାନାଡାରୁ ଲସ୍ ଏଞ୍ଜେଲସ୍କୁ ଆସିଥିଲେ। ହେଲେ ସେମାନଙ୍କ ସୁରକ୍ଷା ଖର୍ଚ୍ଚ ଆମେରିକା ସରକାର ତୁଲାଇବେ ନାହିଁ ବୋଲି ଟ୍ରମ୍ପ ସ୍ପଷ୍ଟ କରିଛନ୍ତି। କିନ୍ତୁ ଓ୍ବାଶିଂଟନରୁ ସାହାଯ୍ୟ ମାଗିବାର ସେମାନଙ୍କର ଉଦ୍ଦେଶ୍ୟ ନାହିଁ। ନିଜସ୍ବ ଖର୍ଚ୍ଚରେ ଘରୋଇ ସୁରକ୍ଷା ବ୍ୟବସ୍ଥା କରାଯାଇଛି ବୋଲି ଏହି ରାଜ ଦମ୍ପତିଙ୍କ ଜଣେ ମହିଳା ମୁଖପାତ୍ର ଏକ ବିବୃତିରେ ଜଣାଇଛନ୍ତି। ସୂଚନାଥାଉ କି, ମେଘାନ ଲସ୍ ଏଞ୍ଜେଲସ୍ରେ ପିଲାରୁ ବଡ଼ ହୋଇଛନ୍ତି ଏବଂ ତାଙ୍କ ମା’ ଡୋରିଆ ରାଗଲାଣ୍ଡ ଏବେ ବି ଏହି ସହରରେ ରହୁଛନ୍ତି। ୨୦୦୨ରୁ ୨୦୧୭ ଯାଏ ଆମେରିକାରେ ମଡେଲ ତଥା ଅଭିନେତ୍ରୀ ଜୀବନ ବିତାଇଥିବା ମେଘାନ ୨୦୧୧ରେ ଆମେରିକୀୟ ଫିଲ୍ମ ନିର୍ଦ୍ଦେଶକ ଟ୍ରେଭର୍ ଏଙ୍ଗେଲସନ୍ଙ୍କୁ ବିବାହ କରିଥିଲେ। ୨୦୧୩ରେ ତାଙ୍କର ବିବାହ ବିଚ୍ଛେଦ ହେବାପରେ ୨୦୧୮ରେ ପ୍ରିନ୍ସ ହ୍ୟାରିଙ୍କ ହାତ ଧରିଥିଲେ। ଲସ୍ ଏଞ୍ଜେଲସ୍ରେ ମେଘାନଙ୍କ ବହୁ ବନ୍ଧୁ ରହିଛନ୍ତି। ନୂଆ ବୃତ୍ତି ଆପଣାଇବା ପାଇଁ ସେଠାରେ ତାଙ୍କର ବହୁ ଯୋଗାଯୋଗ ମଧ୍ୟ ରହିଛି, ଯେଉଁଥିରୁ ସେ ନିଜ କ୍ୟାରିୟର ପୁନଃ ଆରମ୍ଭ କରିପାରିବେ। ଅନ୍ୟପକ୍ଷରେ ଆଫ୍ରିକୀୟ ହାତୀ ଉପରେ ଆଧାରିତ ନୂଆ ଫିଲ୍ମରେ ମେଘାନ କାମ କରିବେ ବୋଲି ଡିଜ୍ନି ପକ୍ଷରୁ ଗୁରୁବାର ଘୋଷଣା କରାଯାଇଛି।
