ବାଲିଗୁଡା,୭ା୬.(ଡି.ଏନ.ଏ.)- ନାଳର ଆରପଟେ ରହିଛି ସ୍କୁଲ, ଅଙ୍ଗନଓ୍ବାଡି, ପଞ୍ଚାୟତ ଗୃହ। ନାଳ ଏପଟେ ରହିଯାଇଛନ୍ତି ଲୋକେ। ଯାତାୟାତ ପାଇଁ ନାଳ ଉପରେ ପୋଲଟିଏ ନାହିଁ। ଖରାଦିନେ ଅଳ୍ପ ପାଣି ଥିବାରୁ ନାଳରେ ପଶି ପାରି ହୋଇଯାଆନ୍ତି ଲୋକେ। ମାତ୍ର ବର୍ଷାଦିନ ଆସିଲେ ଦୁର୍ଦ୍ଦଶା ବଢିଯାଏ। ପୋଲଟିଏ ପାଇଁ ବାରମ୍ବାର ପ୍ରଶାସନଙ୍କୁ ଜଣାଇଲେ ମଧ୍ୟ କେହି ଶୁଣିଲେ ନାହିଁ। ତେଣୁ ଅଞ୍ଚଳବାସୀ ଶ୍ରମଦାନ କରି ନିଜେ ତିଆରି କରିଛନ୍ତି କାଠପୋଲ।
ଏଭଳି ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲା ବାଲିଗୁଡା ଉପଖଣ୍ଡ କ.ନୂଆଗଁା ବ୍ଲକ ଲାଞ୍ଜିରମାହା ୱାର୍ଡରେ। ଲେତିଙ୍ଗିଆ ପଞ୍ଚାୟତ ଲାଞ୍ଜିରମାହା ୱାର୍ଡରେ ବାସ କରନ୍ତି ୩୦ରୁ ଉର୍ଦ୍ଧ୍ୱ ଆଦିବାସୀ ପରିବାର। ଯୁଗାମୁଣ୍ଡା ନାଳ ପାରି ହୋଇ ସ୍କୁଲ, ପଞ୍ଚାୟତ, ତହସିଲ ଓ ମେଡିକାଲ ଆଦିକୁ ଯାଇଥାନ୍ତି ଗ୍ରାମବାସୀ। ନାଳ ଉପରେ ପୋଲଟିଏ ପାଇଁ ପ୍ରଶାସନକୁ ଅନୁରୋଧ କରି ମଧ୍ୟ କେହି ଶୁଣିଲେ ନାହିଁ। ଆଗକୁ ବର୍ଷାଦିନ ଆସୁଥିବାରୁ ସମସ୍ତ ଗ୍ରାମବାସୀ ଏକଜୁଟ ହୋଇ ଜଙ୍ଗଲରୁ କାଠ ସଂଗ୍ରହ କରି ନାଳ ଉପରେ କାଠପୋଲ ନିର୍ମାଣ କରିଛନ୍ତି। ଗଁାର ପିଲାଠୁ ବଡ଼ ସମସ୍ତେ ଲାଗି ପୋଲ ତିଆରି କରିଛନ୍ତି। ଏନେଇ ବାଲିଗୁଡା ଉପଜିଲାପାଳ ଦେବେନ୍ଦ୍ର କୁମାର ନନ୍ଦଙ୍କୁ ଯୋଗାଯୋଗ କରିବାର ଖୁବ୍ଶୀଘ୍ର ଏନେଇ ସ୍ଥାୟୀ ପଦକ୍ଷେପ ନିଆଯିବ ବୋଲି କହିଛନ୍ତି।
