ରାଜନଗର, ୧୧।୪ (ଡି.ଏନ୍.ଏ.)-କେନ୍ଦ୍ରାପଡ଼ା ଜିଲା ଆଳି ବ୍ଲକ ଅଞ୍ଚଳରେ ଜଣେ କରେନା ସଂକ୍ରମିତ ଚିହ୍ନଟ ହେବା ପରେ ଜିଲା ପ୍ରଶାସନର ଚିନ୍ତା ବଢ଼ିଯାଇଥିବା ବେଳେ ଲୋକମାନେ ଆତଙ୍କିତ ହୋଇରହିଛନ୍ତି। ଏଭଳିସ୍ଥିତିରେ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ରାଜନଗର ବ୍ଲକ ଅଧୀନ ୨୯ ପଞ୍ଚାୟତର ପ୍ରତ୍ୟେକ ଘରେ ପହଞ୍ଚତ୍ ସ୍କ୍ରିନିଂ କରୁଛନ୍ତି। ୧୬୦ଟି ମେଡିକାଲ ଟିମ୍ ଏଥିରେ ସାମିଲ ହୋଇଥିବା ବେଳେ ଟିମ୍ରେ ଜଣେ ଲେଖାଏ ଆଶା କର୍ମୀ, ଅଙ୍ଗନଓ୍ବାଡି କର୍ମୀ ଓ ସ୍ବାସ୍ଥ୍ୟ କର୍ମୀ ରହିଛନ୍ତି। ଟିମ୍ ସଦସ୍ୟମାନେ ଘରକୁ ଘର ଯାଇ ପରିବାର ସଦସ୍ୟଙ୍କୁ ଭେଟି ସେମାନଙ୍କୁ ଜ୍ୱର, ଥଣ୍ଡା, କାଶ, ଛିଙ୍କ ଆଦି ହେଉଛି କି ନାହିଁ ପଚାରିବା ସହ ସ୍ବାସ୍ଥ୍ୟ ପରୀକ୍ଷା କରିଥିଲେ। ଏହାଛଡ଼ା ଉକ୍ତ ପରିବାରର କେହି ସଦସ୍ୟ ରାଜ୍ୟ ବା ଦେଶ ବାହାରୁ ଆସିଛନ୍ତି କି ନାହିଁ, ଏ ସମ୍ପର୍କିତ ରିପୋର୍ଟ ତିଆରି କରୁଛନ୍ତି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଡା. ରଶ୍ମୀରଞ୍ଜନ ମହାନ୍ତି, ଡା. ପ୍ରଣବ ଶୁକ୍ଳାଙ୍କ ସମେତ ୮ଜଣ ଆୟୁଷ ଡାକ୍ତର ଏହାର ତଦାରଖ କରୁଛନ୍ତି।
