ତାଳଚେର, ୨୧ା୭ (ନି.ପ୍ର.) – ତାଳଚେର ପୌର ପରିଷଦରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ କରିଛି ଯୁବ ସମାଜସେବୀ ସଂଗଠନ। ଗୁରୁବାର ଆୟୋଜିତ ଏକ ଖବରଦାତା ସମ୍ମିଳନୀରେ ସଂଗଠନର ସଭାପତି ସ୍ବାଧୀନ ଥମ୍ବ ଅଭିଯୋଗ କରିଛନ୍ତି, ପୌର ପରିଷଦକୁ ଆସୁଥିବା ବିଭିନ୍ନ ଅନୁଦାନର ଦୁରୁପଯୋଗ ହେଉଛି। ଟଙ୍କା ଆତ୍ମସାତ କରାଯାଉଥିବାବେଳେ ସହରର ଉନ୍ନୟନ କାର୍ଯ୍ୟରେ ଲଗାଯାଉନାହିଁ। ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ଜିଲା ଖଣିଜ ପାଣ୍ଠିରୁ ୭୯ ଲକ୍ଷ ଟଙ୍କା ବ୍ୟୟରେ ଏକ ନିର୍ଦ୍ଦିଷ୍ଟ ସଂସ୍ଥାରୁ ନିମ୍ନମାନର ଅଳିଆବୁହା ଟ୍ରଲି ଓ ଡଷ୍ଟବିନ କିଣାଯାଇଛି। ଏମସିଏଲ ପକ୍ଷରୁ ଖରାଦିନେ ଟ୍ୟାଙ୍କରରେ ଜଳ ଯୋଗାଣ ପାଇଁ ୭୦/୮୦ ଲକ୍ଷ ଟଙ୍କା ଦିଆଯାଉଛି । ନିୟମ ଅନୁଯାୟୀ ୮ ହଜାର ଲିଟର ବିଶିଷ୍ଟ ଟ୍ରକରେ ୨୧ଗୋଟି ୱାର୍ଡକୁ ଦୈନିକ ୧ଶହ ଟ୍ରିପ ଜଳ ଯୋଗାଣ ହେବାକଥା। ହେଲେ କେବଳ ୮ଟି ଟ୍ରାକ୍ଟର ଯୋଗେ ଜଳଯୋଗାଣ କରାଯାଇ ବ୍ୟାପକ ଅର୍ଥ ହେରଫେର କରାଯାଉଛି। ପୌର ପରିଷଦର ପୁରୁଣା କାରକୁ ବିନା ଟେଣ୍ଡରରେ ଶାଗମାଛ ଦରରେ ବିକ୍ରି କରାଯାଇଛି। ପରିଷଦର ନିଜସ୍ବ ଡ୍ରାଇଭରଙ୍କୁ ଅନ୍ୟ କାମରେ ନିୟୋଜିତ କରି ସରକାରୀ ଗାଡିର ଅପବ୍ୟବହାର ହେଉଛି। ସେହିପରି ନାଳନର୍ଦ୍ଦମା ସଫା କରା ନ ଯିବା, ପିସି କାରବାର, ପରିଷଦର ୨ ଜଣ କର୍ମଚାରୀଙ୍କୁ ଭୂମିହୀନ ଦର୍ଶାଇ ସରକାରୀ ଜମିରେ ଘର କରି ଭଡା ଦିଆଯିବା, ଗତ ୬ ତାରିଖରେ ମାଛ ବେପାରୀ ପ୍ରତାପ ବେହେରାଙ୍କ ମାଛରେ ବ୍ଲିଚିଂ ପାଉଡର ପକାଇବା ଘଟଣାରେ ପୌର କର୍ତ୍ତୃପକ୍ଷଙ୍କ ନାମରେ ଏତଲା ଦିଆଯାଇଥିଲେ ହେଁ ପୋଲିସ ନୀରବଦ୍ରଷ୍ଟା ସାଜିଛି ଅଭିଯୋଗ କରାଯାଇଛି। ଏ ସବୁର ଭିଜିଲାନ୍ସ ତଦନ୍ତ କରାଯିବାକୁ ସଭାପତିଙ୍କ ସମେତ ସଙ୍ଗଠନ ଜତିନ ମହାନ୍ତି, ଆଇନଜୀବୀ ଦୟାସାଗର ମିଶ୍ର ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ନିର୍ବାହୀ ଅଧିକାରୀ ଅଧିକାରୀ ଅତସି ପରିଡାଙ୍କୁ ପଚାରିବାରେ କହିଛନ୍ତି, ଅଭିଯୋଗଗୁଡିକର କୌଣସି ସତ୍ୟତା ନାହିଁ। ପୌର ପରିଷଦରେ ସ୍ବଚ୍ଛତା ଭିତ୍ତିରେ କାମ ହେଉଛି । ବିଗତ ୫ ବର୍ଷର ସମସ୍ତ କାର୍ଯ୍ୟର ଭିଜିଲାନ୍ସ ତଦନ୍ତ କରିବାକୁ ସେ ମଧ୍ୟ ଦାବି କରିଛନ୍ତି।
