ବାଲେଶ୍ୱର ଅଫିସ, ୨୬।୬-ବାଲେଶ୍ୱର ସଦର ଥାନା ଫକୀରମୋହନ ନଗରରେ ଥିବା ଏକ ପୋଖରୀରୁ ମଙ୍ଗଳବାର ଅପରାହ୍ନ ସମୟରେ ଜଣେ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି। ପରିବାର ଲୋକ ତାଙ୍କ ପୁଅକୁ ହତ୍ୟା କରାଯାଇଥିବା ନେଇ ଥାନାରେ ଅଭିଯୋଗ କରିଛନ୍ତି। ଖବର ଲେଖାଯିବା ବେଳକୁ ଥାନାରେ କୌଣସି ଲିଖିତ ଅଭିଯୋଗ ହୋଇ ନ ଥିବା ଜଣାପଡ଼ିଛି।
ସଦର ଥାନା ସିନ୍ଦୁରୀ ଗ୍ରାମର କୃଷ୍ଣଚନ୍ଦ୍ର ନାୟକଙ୍କ ଏକମାତ୍ର ପୁଅ ଲଳିତ (୧୯) ଫକୀରମୋହନ ଅଟୋନୋମସ୍ କଲେଜର ଯୁକ୍ତ ୩ ବିଜ୍ଞାନ ବିଭାଗ ଦ୍ୱିତୀୟବର୍ଷର ଛାତ୍ର ଥିଲେ॥ ମଙ୍ଗଳବାର ପୂର୍ବାହ୍ନରେ ସେ ଘରୁ କଲେଜକୁ ଆସିଥିଲେ। ସାଙ୍ଗମାନଙ୍କ ସହିତ ଫକୀରମୋହନ ନଗରରେ ଥିବା ଏକ ପୋଖରୀକୁ ଗାଧୋଇବା ପାଇଁ ଯାଇଥିଲେ। ଉକ୍ତ ପୋଖରୀର ୧୫ରୁ ୧୭ ଫୁଟ୍ ପାଣି ରହିଥିବାରୁ ଗାଧୋଇବା ସମୟରେ ଲଳିତ ପାଣିରେ ବୁଡି ଯାଇଥିଲେ। ସାଙ୍ଗ ତଥା ସ୍ଥାନୀୟ ଲୋକେ ଜାଣି ପାରି ଜିଲା ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ବିଭାଗର ଏକ ଟିମ୍ ପହଞ୍ଚତ୍ ଲଳିତଙ୍କୁ ପୋଖରୀରୁ ଉଦ୍ଧାର କରିବା ସହ ଜିଲା ମୁଖ୍ୟଚିକିତ୍ସାଳୟକୁ ଆଣିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରି ବ୍ୟବଚ୍ଛେଦ ପାଇଁ ପଠାଇଛନ୍ତି। ଏନେଇ ସଦର ଥାନାରେ ଏକ ଅପମୃତ୍ୟୁ ମାମଲା (ନଂ. ୩୫/୧୯ ) ରୁଜୁ କରାଯାଇଛି। ଡାକ୍ତରଙ୍କ ରିପୋର୍ଟ ଅନୁସାରେ ଅପମୃତ୍ୟୁ ମାମଲା ରୁଜୁ କରାଯାଇଥିବା ବେଳେ ପ୍ରାଥମିକ ତଦନ୍ତରୁ ଦେହରେ କୌଣସି ପ୍ରକାର କ୍ଷତାକ୍ତ ଚିହ୍ନ ନ ଥିବା ଏସ୍ଆଇ ସୁବ୍ରତ ବେହୁରା ପ୍ରକାଶ କରିଛନ୍ତି। ଅନ୍ୟପକ୍ଷରେ ପରିବାରଲୋକେ ପୁଅକୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି।
