ବଇଣ୍ଡା,୨୯।୧(ଡି.ଏନ.ଏ.) – ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ଼ ପଞ୍ଚାୟତ ଅମାସମା, ବାସୁଦେବପୁର, ଅଲେଖପୁର ଆଦି ଗ୍ରାମର ଚାଷୀଙ୍କ ଦସ୍ତଖତ ନେଇ ଠାକୁରଗଡ଼ସ୍ଥିତ ଓଡ଼ିଶା ଗ୍ରାମ୍ୟ ବ୍ୟାଙ୍କ ଶାଖାରୁ ଅଢେଇ କୋଟିରୁ ଊର୍ଦ୍ଧ୍ୱ ଟଙ୍କା ଋଣ କରାଯାଇଥିବା ଘଟଣାରେ ମଙ୍ଗଳବାର ଠାକୁରଗଡ଼ ପୋଲିସ ଏକ ମାମଲା ରୁଜୁ କରିଛି। ଅମାସମା ଗ୍ରାମର ଚାଷୀ ପ୍ରସନ୍ନ ବେହେରାଙ୍କ ଅଭିଯୋଗକ୍ରମେ ପୋଲିସ ନଂ.୮/୨୦ରେ ବ୍ୟାଙ୍କର ଜଣେ ଅବସରପ୍ରାପ୍ତ ଶାଖା ପରିଚାଳକ ଓ ପୁରୁଣାପାଣି ଗ୍ରାମର ପ୍ରସନ୍ନ ସାହୁଙ୍କ ନାମରେ ମାମଲା ରୁଜୁ କରିଛି।
ଠାକୁରଗଡ଼ ଥାନା ଆଇଆଇସି ଗବାକ୍ଷ ନାୟକ କହିଛନ୍ତି, ପୁରୁଣାପାଣି ଗ୍ରାମର ପ୍ରସନ୍ନ ସାହୁ ଓ ଉକ୍ତ ବ୍ୟାଙ୍କର ଜଣେ ଅବସରପ୍ରାପ୍ତ ଶାଖା ପରିଚାଳକ ମିଶି ଚାଷୀଙ୍କ ନାମରେ ୨୦୧୨ ଓ ୨୦୧୩ ମସିହାରେ କିଷାନ କ୍ରେଡିଟ୍ କାର୍ଡ ମାଧ୍ୟମରେ ଲକ୍ଷାଧିକ ଟଙ୍କା ଋଣ ଉଠାଣ କରିଛନ୍ତି। ଏ ନେଇ ଅମାସମା ଗ୍ରାମର ପ୍ରସନ୍ନ ବେହେରାଙ୍କ ସମେତ ସେହି ଗ୍ରାମର ଲକ୍ଷ୍ମଣ ସାହୁ, ରାଜନ ପ୍ରଧାନ, ସୁରେଶ ସାହୁ, ଗୌରାଙ୍ଗ ପ୍ରଧାନ, ଅନାମ ପ୍ରଧାନ, କୃଷ୍ଣ ପ୍ରଧାନ, ଶରଣ ପ୍ରଧାନ, ଉମ୍ବର ସାହୁ, ରବୀନ୍ଦ୍ର ପ୍ରଧାନ, ବାସୁ ବେହେରା, ଭଜମନ ବେହେରା, ଶ୍ରୀରାମ ବେହେରା, ଜନକ ବେହେରା, ପ୍ରକାଶ ନାୟକ, ମଙ୍ଗୁଳୁ ନାୟକ, ମାର୍କଣ୍ଡ ନାୟକ, ମଦନ ନାୟକ, ଉଦ୍ଧବ ନାୟକ, ଅଲେଖପୁର ଗ୍ରାମର ଯାଦବ ସାହୁ, କୈଳାସ ପ୍ରଧାନ, ସୌରା ପ୍ରଧାନଙ୍କ ନାମରେ ବ୍ୟାଙ୍କରୁ ଋଣ ଉଠାଣ କରାଯାଇଛି। ଏମାନଙ୍କ ଋଣ କରାଯାଇଥିବା ଫର୍ମ ମାଧ୍ୟମରେ ଦସ୍ତଖତ କରାଯାଇ କୋଟି କୋଟି ଟଙ୍କାର ଋଣ ଉଠାଯାଇଛି। ଦୀର୍ଘ ୮ ବର୍ଷ ତଳେ ଋଣ ଉଠାଣ କରାଯାଇଥିବାବେଳେ ଏହା ପରିଶୋଧ କରାଯାଇ ନ ଥିଲା। ଫଳରେ ବ୍ୟାଙ୍କ ପକ୍ଷରୁ ତା. ୧୭।୧।୨୦୨୦ରେ ଋଣ ନେଇଥିବା ସମସ୍ତ ଚାଷୀଙ୍କୁ ପରିଶୋଧ ପାଇଁ ନୋଟିସ ଜାରି କରାଯାଇଥିଲା। ନୋଟିସ ପାଇବା ପରେ ଚାଷୀଙ୍କ ମଧ୍ୟରେ ଭାଳେଣି ପଡ଼ିଥିଲା। ପରେ ଦସ୍ତଖତ ନେଇଥିବା ପୁରୁଣାପାଣି ଗ୍ରାମର ପ୍ରସନ୍ନ ସାହୁଙ୍କୁ ନୋଟିସ ପାଇଥିବା ଚାଷୀମାନେ ପଚାରିଥିଲେ। ହେଲେ ଏହି ନୋଟିସ କିଛି ନୁହେଁ ବୋଲି ପ୍ରସନ୍ନ କହିବା ସହ ପ୍ରସଙ୍ଗକୁ ଏଡ଼ାଇ ଦେଇଥିଲେ। ପରେ ଚାଷୀମାନେ ଥାନାରେ ଅଭିଯୋଗ କରିଥିଲେ।
