କୋକସରା, ୮ା୭( ଡି.ଏନ୍.ଏ): କୋକସରା ବ୍ଲକ ଲଡ଼ୁଗାଁ ପଁଚେତ୍ ପିତବାସପୁର ଗାଁରେ କିଡ଼୍ନୀ ରୋଗ୍ ବହପିବାରେ ଲାଗିଛେ। ଇ ରୋଗ୍ରେ ବଛ୍ରେ ଭିତରେ ଝନ୍କର ମୁରତୁ ହେଇଥିଲାବେଲେ କଟକ ବଡ଼ ମେଡିକାଲରେ ଝନେ ମୁରତୁ ସଂଗେ ଯୁଝୁଛନ୍। ସେନ୍ତା ୧୦ରୁ ଅଧ୍କା ରୁଗୀ ଜିଲାର ଭିନେ ଭିନେ ଡାକ୍ତରଖାନାରେ ଚିକିତ୍ସିତ ହେଇ ନିରାଶ ହେଲାରୁ ବିଶାଖାପାଟଣା ଯାଇ ପରୀକ୍ଷା ନିରୀକ୍ଷା କରି ଏଭେ ଗାଁକେ ଫିରିଛନ୍। ସେମାନେ ସଭେ କିଡ଼୍ନୀ ରୋଗ୍ରେ ପୀଡ଼ିତ ଥିବାର ଡାକ୍ତର କହିଥିବାର ରୁଗୀମାନେ କହିଛନ୍।
ସୂଚନା ଅନ୍ସାରେ ଲଡ଼ୁଗାଁ ପଁଚେତ୍ ପିତବାସପୁର ଗାଁର ରଏନୁ ନିଆଲ(୬୦) ଗଲା ୬ ମାସ ତଲେ କିଡ଼୍ନୀ ରୋଗ୍ରେ ମରିଥିବାର ଅଭିଯୋଗ ହେଇଛେ। ସେନ୍ତା ଭାଗିରଥି ନିଆଲ(୫୮) କିଡ଼୍ନୀ ରୋଗ୍ରେ ଆକ୍ରଁାତ ହେଇ ଏହେଦେ କଟକ ବଡ଼ ଡାକ୍ତରଖାନାରେ ଚିକିତ୍ସିତ ହେଉଛନ୍। ଗାଁର ଜଗଦିଶ ନିଆଲକଁର ମାଏକିନା ହୀରାମଣି ନିଆଲ(୪୮) ବଛ୍ରେ ହେଲା ଦିହିପା ଖରାପ ହେଲାରୁ ଚିକିତ୍ସିତ ହେଉଥିଲେ। ହେଲେ ରୋଗ୍ ଧରା ନାଇଁପଡ଼ଲାରୁ ସେ ବିଶାଖାପାଟଣାର ଗୁଟେ ଘରୋଇ ଡାକ୍ତରଖାନାରେ ପରୀକ୍ଷା ନିରୀକ୍ଷା କଲାରୁ କିଡ଼୍ନୀ ରୋଗ୍ରେ ପୀଡ଼ିତ ଥିବାର ଜନାପଡ଼ିଥିଲା। ସେନ୍ତା ଗଁାର ଯଦୁ ନିଆଲ(୬୫), ବୁଧ ନିଆଲ(୬୫), ଫଗନୁ ନିଆଲ(୫୮), ଭାନୁମତି ନିଆଲ(୫୦), ଉର୍ବଶୀ ନିଆଲ(୩୭), ରସିକ ନିଆଲ(୪୦), ଶନ୍ଦର ନିଆଲ(୫୦), ପୁରୁଷୋତ୍ତମ ନିଆଲ(୩୩), ପୂର୍ଣ୍ଣମୀ ନିଆଲ(୪୫) ପରମୁଖ ଲଡ଼ୁଗାଁ ଆର ଜିଲାର ଭିନେ ଭିନେ ଡାକ୍ତରଖାନାରେ ଚିକିତ୍ସିତ ହେଇ ନିରାଶ ହେଇଥିଲେ। ଶେଷେ ଇମାନେ ସଭେ ବିଶାଖାପାଟଣା ଯାଇ ସେଠାନେ ପରୀକ୍ଷା କଲାରୁ କିଡ଼୍ନୀ ରୋଗ୍ରେ ପୀଡ଼ିତ ଥିବାର ଜାନବାକେ ପାଇଥିଲେ। ଏହେଦେ ଦିନୁଦିନ୍କେ ଗାଁରେ କିଡ଼୍ନୀ ରୁଗୀକର ସଂଖ୍ୟା ବଢ଼ବାରେ ଲାଗିଥିଲାବେଲେ ଗାଁରେ ଗୁଟେ ଭଏର ବାତାବରନ୍ ସୁରୁଷ୍ଟି ହେଇଛେ। ହେଲେ କାଇଁଥିର ଲାଗି ଗାଁରେ ଇ ରୋଗ୍ ବହପୁଛେ କେହି ଜାନି ନାଇଁପାରବାର। ଜିଲା ପରଶାସନ ଆର ସୁଆସ୍ତିଅ ବିଭାଗ ଇ ଦିଗେ ଦୁରୁଷ୍ଟି ଦେଇ ରୋଗ୍ର ନିରାକରନ୍ ଦିଗେ ପଦକ୍ଷେପ ନେବାକେ ଗାଁବାସୀ ଦାବି କରିଛନ୍। ଇ ବାବ୍ଦେ କଳାହାଣ୍ଡି ଜିଲା ମୁଖିଆ ଚିକିତ୍ସା ଅଧ୍କାରୀ ବନଲତା ଦେବୀକୁଁ ପଚରାଲାରୁ ଘଟନାର ତଦଁତ୍ କଲେ କାରନ୍ ଜନାପଡ଼ବା। ପରୀକ୍ଷା ନିରୀକ୍ଷା ଲାଗି ବହୁତ୍ ଜଲଦି ଗାଁକେ ଗୁଟେ ଡାକ୍ତରି ଦଲ ପଠାଯିବା। ଗାଁରେ ଥିବାର ନଲ୍ଚୁଆଁମାନକର ପାଏନ୍ ପରୀକ୍ଷା କରବାର ସଂଗେ ରୁଗୀମାନକର ଦିହିପା ପରୀକ୍ଷା କରାଯିବା। ତା’ପରେ ଆଗ୍କେ କାଣା ପଦକ୍ଷେପ ନିଆଯିବା ସେ ଉପରେ ଚିନ୍ତା କରାଯିବା ବଲି ସେ କହିଥିଲେ।
