ପାଇକମାଳ,୨୯ା୧୦ (ଡି.ଏନ୍.ଏ.)-
ପାଇକମାଳ ବ୍ଲକ ମାଣ୍ଡୋସିଲ ପଁଚେତ୍ ଡୁମେରବାହାଲ ଗଁାର କଷ୍ଟ ସାହୁ। ସରକାରୀ ଯୋଜନାରେ ଘରଖଁଡ଼େ ଆର ରାଶନ କାର୍ଡ ଦାବିରେ ସୋମବାରନୁ ସେ କୁଟୁମବସିଆ ପଁଚେତ୍ ଅଫିସ୍ ଆଘେ ଆମରଣ ଅନଶନରେ ବସିଛନ୍। ତାକର ଦୁରଦଶା ବାବ୍ଦେ ଗଲା ୨୫ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ‘ପଲିଥିନ୍ ତଲେ ଅସାହା ଜୀବନ୍’ ଶୀରଷକ୍ରେ ନିକିନିଖିନୁ ଖବର ବାହାରିଥିଲା। ଖବର ବାହାରଲାରୁ ମାଣ୍ଡୋସିଲ ପଁଚେତ୍ କାର୍ଯ୍ୟନିର୍ବାହୀ ଅଧ୍କାରୀ ୫ ଦିନ୍ ତଲେ ଇ ପରିବାରକେ ଗୁଟେ ନୂଅଁା ରାଶନ କାର୍ଡ ଦେଇଛନ୍। ହେଲେ ନୂଅଁା ରେଶନ କାର୍ଡରେ କଷ୍ଟ ଆଏବାର ଫେବୃୟାରୀ ୨୦୨୦ରୁ ଚାଉଲ ଉଠେଇ ପାରବେ। ଇଆଡ଼େ ଯେ ଅଭାବ ଅନାଟନ ଲାଗି ୫ ପରାନୀ କୁଟୁମ ବଡ଼ା ଗୁଲ୍ଗୁଲା ହେଉଛନ୍। ସେନ୍ତା ଘରଦୁଆର ଅଭାବୁ କୁଟୁମବସିଆ ପଲିଥିନ୍ ତଲେ ଜୀବନ୍ ବିତଉଛନ୍।
ପୂରବର ସୂଚନା ଅନ୍ସାରେ ମାଣ୍ଡୋସିଲ ପଁଚେତ୍ ଡୁମେରବାହାଲ ଗଁାର କଷ୍ଟ ସାହୁକଁର ପରିବାର କହେଲେ ମାଏକିନା ଆର ଦୁଇ ପୁଓକୁ ନେଇ ସଁସାର। ପରିବାରଟା ନିହାତି ଗରିବ୍, କଷ୍ଟ କୁଲିମଜୁରି କରି କୁଟୁମ ପୁଷୁଛନ୍। ଏନ୍ତା କି ତାକର ଜମିବାଡ଼ି କିଛି ନଁାଇଁନ। ମାଣ୍ଡୋଲିସ ଗଁାର ଲକ୍ଷ୍ମଣ ସୁନା ତାହାକୁ ୨ ଡେସିମିଲ ଜାଗା ଦାନରେ ଦେଇଛନ୍। ସେ ଜାଗାରେ କଷ୍ଟ ଝାଟିମାଟିର କୁରିଆଟେ କରି ପଲିଥିନ୍ ଢାପି କୁଟୁମବସିଆ ରହୁଛନ୍। କଷ୍ଟ ଭୂମିହୀନ ହିସାବେ ସରକାରୀ ଯୋଜନାରେ ୪ ଡେସିମିଲ ଡିହ ପାଇଛନ୍ ସତ୍। ହେଲେ ସେ ପାଇଥିବାର ଜାଗା ଘର ତିଆରିବାର ଲେଖେଁ ଜାଗା ନୁହେ। ଆଗରୁ କଷ୍ଟ କୁଟୁମସିଆ ପଦ୍ମପୁର ବ୍ଲକ କଲିଆମୁଣ୍ଡା ଗଁାରେ କୁଲିମଜୁରି କରି ରହୁଥିଲେ। ସେଠାନେ ତାକର ରାଶନ କାର୍ଡ ବି ହେଇଥିଲା। ହେଲେ ନିଜର ଗଁାକେ ଫିରଲା ଉତାରୁ ଆଏଜ୍କେ ୪ ବଛର ହେଲା ସେ ରାଶନ କାର୍ଡ ଖଁଡ଼େ ପାଇ ନାଇଁପାରବାର। ଏନ୍ତା କି ସେ ଭିନେ ଭିନେ ସମିଆରେ ସରକାରୀ ଯୋଜନାରେ ଘରଖଁଡ଼େ ଆର ରାଶନ କାର୍ଡ ଲାଗି ପରଶାସନିକ ଅଧ୍କାରୀମାନକୁ ଗୁହାରି କରି ନିରାଶ ହେଇଛନ୍। ଯେନ୍ଥିରଲାଗି ସେ ସୋମବାରନୁ କୁଟୁମବସିଆ ପଁଚେତ୍ ଅଫିସ ଆଘେ ଆମରଣ ଅନଶନରେ ବସିଥିବାର କହିଛନ୍। ଖବର ପାଇ ପାଇକମାଲ ଏବିଡିଓ ପ୍ରଦୀପ କୁମାର ଭୋଇ ଘଟନାଥଲରେ ପୁହୁଁଚି ପରିବାର ଲୁକ୍କୁ ବୁଝାଶୁଝା କରିଥିଲେ। ହେଲେ ପରଶାସନ ଆମର ସୁବିଧା ନାଇଁକଲେ ଅନଶନରୁ ନାଇଁ ଉଠୁଁ ବଲି ସେମାନେ କହିଥିଲେ।
