ମୁମ୍ବାଇ, ୨୫।୪-କ୍ରିକେଟ ଆଇକନ ସଚିନ ତେନ୍ଦୁଲକର ଶୁକ୍ରବାର ୪୭ବର୍ଷରେ ପଦାର୍ପଣ କରିଛନ୍ତି। କରୋନା ଭାଇରସ ସଂକ୍ରମଣ ଜନିତ ସାମ୍ପ୍ରତିକ ସ୍ଥିତିରେ ସଚିନ ନିଜ ଜନ୍ମଦିନକୁ ନିରାଡ଼ମ୍ବରଭାବେ ପରିବାର ସଦସ୍ୟଙ୍କ ସହିତ ପାଳିଛନ୍ତି। ”ମୁଁ ଏବେ ରୋଷେଇ କରିବା ସହ ଘର ପରିଷ୍କାର କରୁଛି ଏବଂ ଗଛରେ ପାଣି ଦେଉଛି। ଲକ୍ ଡାଉନ୍ ସମୟ ପିଲାମାନଙ୍କ(ସାରା, ଅର୍ଜୁନ) ସହିତ ସମୟ କାଟିବା ସୁଯୋଗ ଦେଇଛି। ଉଭୟ ୨୦ବର୍ଷରୁ ଊର୍ଦ୍ଧ୍ୱ ଥିବାରୁ ସନ୍ଧ୍ୟା ସମୟରେ ଘରେ ରହିବା କଷ୍ଟକର ହୋଇ ପଡ଼ୁଛି। ସେମାନେ ନିଜ ସାଙ୍ଗମାନଙ୍କ ସହିତ ଯୋଗାଯୋଗ କରି ସମୟ ଅତିବାହିତ କରୁଛନ୍ତି। ତେବେ ଲକଡାଉନ ଥିବାରୁ ମଁୁ ଓ ଅଞ୍ଜଳି(ପତ୍ନୀ) ସେମାନଙ୍କ ସହିତ ସମୟ କଟାଇ ପାରୁଛୁ। ସେହିପରି ମା’ ମୋ ସହିତ ଅଧିକ ସମୟ କାଟି ପାରୁଛନ୍ତି“ ବୋଲି ସଚିନ କହିଛନ୍ତି। ସଚିନ ୨୦୧୩ରୁ ଅବସର ନେଇ ସାରିଥିଲେ ହେଁ ଅନ୍ତର୍ଜାତୀୟ କ୍ରିକେଟରେ ଏବେ ମଧ୍ୟ ତାଙ୍କର ଅନେକ ରେକର୍ଡ ଅତୁଟ ରହିଛି। ୨୪ ବର୍ଷର ଅନ୍ତର୍ଜାତୀୟ କ୍ରିକେଟ କ୍ୟାରିୟରରେ ସଚିନ ଉଭୟ ଟେଷ୍ଟ ଓ ଦିନିକିଆରେ ଏକାଧିକ ରେକର୍ଡ ସୃଷ୍ଟି କରି ନିଜ ପ୍ରଶଂସକଙ୍କୁ ଉଲ୍ଲସିତ କରିଛନ୍ତି। ଏହି ଅବସରରେ ଟିମ୍ ଇଣ୍ଡିଆ ଖେଳାଳିଙ୍କୁ କିଛି ପରାମର୍ଶ ଦେଇଛନ୍ତି ଲିଟିଲ ମାଷ୍ଟର। ସେମାନେ ନିଜ ଗେମ୍ରେ କିପରି ଉନ୍ନତି ଆଣିବେ ସେ ସମ୍ପର୍କରେ ଅତ୍ୟଧିକ ଚିନ୍ତା ନ କରି କ୍ରିକେଟ ବାହାରର ଦୁନିଆ ସମ୍ପର୍କରେ କିଛି ଭାବିବା ଉଚିତ ବୋଲି କହିଛନ୍ତି।
