ଅନୁଗୋଳ ଅଫିସ, ୧୯।୫
ସ୍ବାବ୍ ସଂଗ୍ରହରେ ବିଳମ୍ବକୁ ନେଇ ଅନୁଗୋଳ ଜିଲାର କେତେକ ସଙ୍ଗରୋଧ କେନ୍ଦ୍ରରେ ଅସନ୍ତୋଷ ଦେଖାଦେଇଛି। ବିଶେଷକରି ଉକ୍ତ କେନ୍ଦ୍ରଗୁଡ଼ିକରେ ଥିବା କେତେଜଣ ପ୍ରବାସୀଙ୍କ କ୍ୱାରାଣ୍ଟାଇନ୍ ଅବଧି ସରିଆସୁଥିବା ବେଳେ ଏଯାଏ ସେମାନଙ୍କଠାରୁ ସ୍ବାବ୍ କି ରକ୍ତ ନମୁନା ପରୀକ୍ଷା ପାଇଁ ନିଆଯାଉ ନାହିଁ। ଏପରି ସ୍ଥିତିରେ ଦୈନିକ ସେଠାକୁ ନୂଆ ପ୍ରବାସୀଙ୍କୁ ସଙ୍ଗରୋଧ ପାଇଁ ଅଣାଯିବା ପୁରୁଣା ପ୍ରବାସୀମାନଙ୍କ ମନରେ ସଂକ୍ରମଣର ଭୟ ସୃଷ୍ଟି କରୁଥିବା ଅଭିଯୋଗ ହେଉଛି।
ଅନୁଗୋଳ ଜିଲାର ୮ଟି ବ୍ଲକରେ ଥିବା ୨୨୫ ପଞ୍ଚାୟତରେ ମୋଟ୍ ୩୪୯ କ୍ବାରାଣ୍ଟାଇନ୍ ସେଣ୍ଟର କରାଯାଇଛି। ଏସବୁ କେନ୍ଦ୍ରରେ ୧୪,୮୯୩ ବେଡ୍ ପକାଯାଇଥିବା ବେଳେ ୧୦,୭୫୪ ଜଣ ସଙ୍ଗରୋଧରେ ରହିବାର ବ୍ୟବସ୍ଥା ହୋଇଛି। ସେହିପରି ଅନୁଗୋଳ, ତାଳଚେର ପୌରାଞ୍ଚଳ ଓ ଆଠମଲ୍ଲିକ ଏନ୍ଏସିର ମୋଟ୍ ୫୫ ୱାର୍ଡରେ ୬ଟି କ୍ବାରାଣ୍ଟାଇନ୍ ସେଣ୍ଟର କରାଯାଇଛି। ଏଠାରେ ୭୦୩ ଜଣଙ୍କ ରହିବା ଭଳି ବ୍ୟବସ୍ଥା ପ୍ରଶାସନ ପକ୍ଷରୁ କରାଯାଇଛି। ଇତିମଧ୍ୟରେ ବାହାର ରାଜ୍ୟରୁ ହଜାର ହଜାର ପ୍ରବାସୀ ଜିଲାକୁ ଫେରୁଛନ୍ତି। ଅନ୍ୟ ଜିଲାରୁ ମଧ୍ୟ ଅନୁଗୋଳ ଲୋକେ ଘର ମୁହଁା ହେଉଛନ୍ତି। ସେମାନଙ୍କୁ ପ୍ରଶାସନ ପକ୍ଷରୁ ବିଭିନ୍ନ କ୍ବାରାଣ୍ଟାଇନ୍ ସେଣ୍ଟରରେ ରଖାଯାଉଛି। ଦୈନିକ କେତେଜଣଙ୍କ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଛି। କିନ୍ତୁ ଗୁରୁତ୍ୱପୂର୍ଣ୍ଣ କଥା ହେଉଛି କାଙ୍ଗୁଲା, ପଞ୍ଚମହଲା ୟୁପି ସ୍କୁଲସ୍ଥିତ ସଙ୍ଗରୋଧ କେନ୍ଦ୍ର ପରି ଜିଲାର ବହୁ କ୍ବାରାଣ୍ଟାଇନ୍ ସେଣ୍ଟରରେ ୮ରୁ ୧୦ ଦିନ ଯାଏ ପ୍ରବାସୀମାନେ ରହିସାରିଥିଲେ ବି ସେମାନଙ୍କଠାରୁ ସ୍ବାବ୍ କି ରକ୍ତ ପରୀକ୍ଷା ପାଇଁ ନିଆଯାଉ ନ ଥିବା ଅଭିଯୋଗ ହେଉଛି। ଫଳରେ ସଙ୍ଗରୋଧ ପାଇଁ ଏସବୁ କେନ୍ଦ୍ରକୁ ଦୈନିକ ଆସୁଥିବା ନୂଆ ପ୍ରବାସୀମାନଙ୍କୁ ନେଇ ପୁରୁଣାଙ୍କ ଚିନ୍ତା ବଢ଼ିଯାଇଛି। ବାରମ୍ବାର ସରପଞ୍ଚ, ବିଡିଓଙ୍କୁ ସେମାନେ ସ୍ବାବ୍ ଟେଷ୍ଟ ପାଇଁ ଜଣାଉଥିଲେ ବି ସୁଫଳ ମିଳୁ ନ ଥିବା ସମ୍ପୃକ୍ତ ପ୍ରବାସୀମାନେ ଅଭିଯୋଗ କରୁଛନ୍ତି।
ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷ କହିଛନ୍ତି, ସଙ୍ଗରୋଧରେ ଥିବା ସମସ୍ତଙ୍କ ସ୍ବାବ୍ ନମୁନା ଏକ ସଙ୍ଗରେ ସଂଗ୍ରହ କରିବା ପାଇଁ ଆବଶ୍ୟକ କର୍ମଚାରୀ ନାହାନ୍ତି। ତଥାପି ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରାଯାଉଛି। ଜିଲାରେ ଏବେ ୫ଟି ଟିମ୍ ନମୁନା ସଂଗ୍ରହ କରୁଛନ୍ତି। କିପରି ଶୀଘ୍ର ସମସ୍ତଙ୍କ ନମୁନା ସଂଗ୍ରହ କରାଯିବ ସେଥିପ୍ରତି ଦୃଷ୍ଟି ଦିଆଯିବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି।
