ନୂଆଦିଲ୍ଲୀ: ରାଷ୍ଟ୍ରୀୟ ଜନତା ଦଳ(ଆର୍ଜେଡି) ମୁଖ୍ୟ ଲାଲୁପ୍ରସାଦ ଯାଦବଙ୍କ ବଡ଼ ପୁଅ ତେଜ୍ପ୍ରତାପ ଯାଦବଙ୍କୁ ନୂଆ ଲୁକ୍ରେ ଦେଖିବାକୁ ମିଳିଛି। ଲମ୍ବା ହେୟାର ଷ୍ଟାଇଲ୍ ସହ ମଥାରେ ତିଳକ ଚିହ୍ନ, ହାତ ଓ ବେକରେ ରୁଦ୍ରାକ୍ଷ ମାଳ ରଖିଥିବା ଏହି ନେତାଙ୍କୁ ମଥୁରାରେ ଦେଖିବାକୁ ମିଳିଛି। ଶନିବାର ସେ ଦୀପାବଳି ଉତ୍ସବ ପାଳନ ଲାଗି ମଥୁରା ଯାଇଥିଲେ। ପରେ ସେ ବୃନ୍ଦାବନର ଯମୁନା ନଦୀ କୂଳରେ ଗୋବର୍ଦ୍ଧନ ପୂଜା ଓ ସତ୍ସଙ୍ଗ କାର୍ଯ୍ୟରେ ଯୋଗଦେଇଥିଲେ। ଏହି ଅବସରରେ ସେ ଯମୁନା ପ୍ରଦୂଷଣ ପ୍ରସଙ୍ଗ ଉଠାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ସମାଲୋଚନା କରିଥିଲେ। ଅନେକ ଲୋକ ଏହି ପ୍ରଦୂଷିତ ପାଣିକୁ ପିଉଥିବା ବେଳେ ରୋଗାକ୍ରାନ୍ତ ହେଉଥିବା ସେ ପ୍ରକାଶ କରିଥିଲେ। ଯମୁନା ନଦୀର ଜଳ ପ୍ରଦୂଷଣ ରୋକା ନ ଗଲେ କିମ୍ବା ସରକାର ଏହାର ସ୍ବଚ୍ଛତା ପ୍ରତି ଦୃଷ୍ଟି ନ ଦେଲେ ବିକ୍ଷୋଭ କରାଯିବ ବୋଲି ସେ ଚେତାବନୀ ଦେଇଥିଲେ।
