ମଣିଷକୁ ବିଭିନ୍ନ ପ୍ରକାରର ନିଶା ଘାରିଥଏ। ତା’ ଭିତରେ ସୁନ୍ଦର ଦେଖାଯିବାର ନିଶା ଅନ୍ୟତମ। ବେଳେ ବେଳେ ଏଇ ନିଶାରେ ମଣିଷ ନିଜ ଜୀବନକୁ ବିପଦରେ ପକାଇବାକୁ ବି ପଛାଇ ନ ଥାଏ। ଠିକ୍ ଯେମିତି ଅଷ୍ଟ୍ରେଲିଆ, ନ୍ୟୁ ସାଉଥଓ୍ବେଲ୍ସର ୨୪ ବର୍ଷୀୟା ଏମ୍ବର ଲ୍ୟୁକ୍ଙ୍କୁ ଟାଟୁ କରି ନିଜର ସୌନ୍ଦର୍ଯ୍ୟ ବଢ଼ାଇବା ନିଶା ଲାଗିଛି। ଫଳରେ ତାଙ୍କ ଶରୀର ଟାଟୁରେ ଆଚ୍ଛାଦିତ ହୋଇଗଲାଣି। ଏମ୍ବରଙ୍କ ଶରୀରରେ ଏବେ ୨୦୦ରୁ ଊର୍ଦ୍ଧ୍ୱ ଟାଟୁ ଦେଖିବାକୁ ମିଳେ। ଫଳରେ ସେ ଏବେ ‘ଡ୍ରାଗନ୍ ଗର୍ଲ’ଭାବେ ପରିଚିତ ହେଉଛନ୍ତି। ଟାଟୁ କରିବା ସହ ସେ ଜିଭକୁ ଦୁଇ ଫାଳ କରି କାଟିଛନ୍ତି। ଏହା ବାଦ୍ ନିକଟରେ ସେ ନିଜ ଆଖିକୁ ନୀଳ ରଙ୍ଗର ଟାଟୁ କରି ନୀଳ ନୟନା ହେବାକୁ ନିଷ୍ପତ୍ତି ନେଇଥିଲେ। ଆଉ ଟାଟୁ କରାଇ ଆଖିକୁ ନୀଳ ରଙ୍ଗରେ ରଙ୍ଗାଇଲେ ମଧ୍ୟ। ହେଲେ ଏହା ତାଙ୍କ ଜୀବନ ପ୍ରତି ବିପଦ ଆଣି ଦେଇଥିଲା। ଆଉ ସେ ଦୃଷ୍ଟିଶକ୍ତି ହରାଇ ବସିଲେ। ଯଦିଓ ସେ ସାମୟିକ ଅର୍ଥାତ୍ ୩ ମାସ ପର୍ଯ୍ୟନ୍ତ ଦୃଷ୍ଟିଶକ୍ତି ହରାଇଥିଲେ, ତେବେ ଏହି ପ୍ରକ୍ରିୟା ବହୁତ ବିପଜ୍ଜନକ ଥିଲା। ଏମ୍ବର କହନ୍ତି,‘ଏହି ଅନୁଭୂତିକୁ ଶବ୍ଦରେ ପ୍ରକାଶ କରିବା ବହୁତ କଷ୍ଟ। ଆଖିରେ ଯେତେବେଳେ ଟାଟୁର କାଳୀ ପକାଯାଉଥିଲା ଲାଗୁଥିଲା ସତେ ଯେମିତି ଅନେକ ମୁନିଆ କାଚ ଆଖିରେ ଫୋଡି ହେଇଯାଉଛି। ଆଖିରେ କାଳୀ ପକାଇବା ପ୍ରକ୍ରିୟା ବର୍ଷକରେ ଚାରି ଥର କରାଯାଇଥିଲା। ଏହା ବହୁତ ବିପଜ୍ଜନକ ଥିଲା। କାରଣ ଟିକେ ଏପଟସେପଟ ହେଲେ ଆଖି ସମ୍ପୂର୍ଣ୍ଣ ନଷ୍ଟ ହେବାର ଆଶଙ୍କା ଥିଲା। ତେବେ ଯେଉଁ ତିନି ମାସ ଦୃଷ୍ଟିଶକ୍ତି ହରାଇଥିଲି ତାହା ଥିଲା ବେଶ୍ ଯନ୍ତ୍ରଣାଦାୟକ।’ ଏମ୍ବର ସର୍ଜରି କରାଇ ସ୍ତନ, ଓଠ ଓ ଭ୍ରୁଲତା ଟ୍ରାନ୍ସଫର୍ମେଶନ କରାଇଛନ୍ତି। ମାତ୍ର ୧୬ ବର୍ଷ ବୟସରୁ ଟାଟୁ ପାଇଁ ତାଙ୍କର ଏହି ପାଗଳାମି ଆରମ୍ଭ ହୋଇଥିଲା। ଏପର୍ଯ୍ୟନ୍ତ ଏଥିରେ ସେ ୧୮.୩୭ ଲକ୍ଷ ଟଙ୍କା ଖର୍ଚ୍ଚ କରିସାରିଲେଣି। ଏମ୍ବର କହନ୍ତି,‘ଏବେ ମୋର ଚିନ୍ତା ନାହିଁ ମୁଁ ବୁଢୀ ହେଲେ କେମିତି ଦେଖାଯିବି। ଏତିକି ଖୁସି ଲାଗୁଛି ଯେ, ମରିବା ପର୍ଯ୍ୟନ୍ତ ଟାଟୁ ପାଇଁ ମୁଁ ସୁନ୍ଦର ରହିବି। ଆଉ ଟାଟୁ ସହ ମରିବି।’
