ଢେଙ୍କାନାଳ ଅଫିସ, ୧୫।୯ – କଙ୍କାଳସାର ଶରୀର। ଗଣି ହୋଇଯାଉଛି ପଞ୍ଜରା। ଦେହସାରା ଗଭୀର କ୍ଷତ। ଉଠି ବସିବାକୁ ବଳ ନାହିଁ। ନିସ୍ତେଜ ହୋଇ ବିଛଣାରେ ପଡ଼ିରହିଛନ୍ତି। ଆଖି ପୂରାଇ ଦେଖିଲେ ଯେ କେହି ବି ସହଜରେ ଠଉରାଇ ପାରିବ କଅଁଳ ଶିଶୁଟିର ଅସହାୟତା। ହେଲେ ଫାଇଲ ଚାଷରେ ବ୍ୟସ୍ତ ପ୍ରଶାସନର ନଜର କିନ୍ତୁ ପଡ଼ିନି ଅବୋଧ ଶିଶୁଟି ଉପରେ। ଏପରି ନୁହେଁ ଯେ, ଅଭିଯୋଗ ହୋଇନି କି ବିଭାଗୀୟ ଅଧିକାରୀଙ୍କ କାନରେ କଥା ପଡ଼ିନି। ହେଲେ ଆନ୍ତରିକତା ଅଭାବରୁ ଶିଶୁ ପାଖରେ ପହଞ୍ଚତ୍ ପାରିନି ପୁଷ୍ଟିକର ଖାଦ୍ୟ। ଅପପୁଷ୍ଟିର ଶିକାର ହୋଇଥିବା ସମ୍ପୃକ୍ତ ସାଢ଼େ ୩ ବର୍ଷର ଦିବ୍ୟାଙ୍ଗ ଶିଶୁ ହେଲେ ଗଁଦିଆ ବ୍ଲକ ନିହଲପ୍ରସାଦ ଗ୍ରାମର କାର୍ତ୍ତିକ ସେଠୀଙ୍କ ବଡ଼ପୁଅ ସତ୍ୟ। ଶିଳ୍ପ ସମୃଦ୍ଧ ଢେଙ୍କାନାଳ ଜିଲାରେ ଏଭଳି ଚିତ୍ର ନଗଡ଼ାକୁ ମନେପକାଇ ଦେଇଛି। ଏହି ଘଟଣା ପଦାକୁ ଆସିବା ପରେ ବ୍ଲକରେ କାର୍ଯ୍ୟକାରୀ ହେଉଥିବା ସମନ୍ବିତ ଶିଶୁ ବିକାଶ ଯୋଜନାକୁ ନେଇ ପ୍ରଶ୍ନ ଉଠିଛି।
ନିହଲପ୍ରସାଦ ଗ୍ରାମରେ ରୁହନ୍ତି କାର୍ତ୍ତିକ ସେଠୀଙ୍କ ପରିବାର। ସ୍ତ୍ରୀ, ଦୁଇପୁଅଙ୍କୁ ନେଇ ତାଙ୍କ ସଂସାର। ବଡ଼ ପୁଅ ସତ୍ୟ ଦୃଷ୍ଟିହୀନ। ସୁଷମ ଖାଦ୍ୟ ଅଭାବରୁ ସେ ଅପପୁଷ୍ଟିର ଶିକାର। ଉଠିବାକୁ ବଳ ପାଉ ନ ଥିବାରୁ ସତ୍ୟ ଏବେ କତରାଗଲା। ଦୀର୍ଘଦିନ ଧରି ବିଛଣାରେ ପଡ଼ି ରହିଥିବାରୁ ତାଙ୍କ ଶରୀରରେ ଘା’ ହୋଇଯାଇଛି। କାର୍ତ୍ତିକ କୁହନ୍ତି, ସେ ଦିନମଜୁରିଆ। ଖଟିଲେ ପରିବାର ଚଳେ। ମଜୁରି ଟଙ୍କାରେ ଘର ଖର୍ଚ୍ଚ ଉଠାଇବା କାଠିକର ପାଠ। ଦୁଇ ପିଲାଙ୍କ ପାଇଁ ଭଲ ଖାଇବା କେଉଁଠୁ ଯୋଗାଡ଼ କରିବେ। ଏ ନେଇ ସେ ବହୁବାର ଦୃଷ୍ଟି ଆକର୍ଷଣ କରିଥିଲେ ମଧ୍ୟ ପ୍ରଶାସନ ପକ୍ଷରୁ ତାଙ୍କ ପୁଅକୁ ଦିବ୍ୟାଙ୍ଗ ଭତ୍ତା ତାଲିକାରେ ସାମିଲ କରାଯାଉନାହିଁ। ଗ୍ରାମରେ ଥିବା ଅଙ୍ଗନଓ୍ବାଡି କେନ୍ଦ୍ରରୁ ପୁଷ୍ଟିକର ଖାଦ୍ୟ ମିଳୁନାହିଁ। ପୁଅର ସମସ୍ୟା ନେଇ ସେ ୪୦ କିମି ଦୂର ଗଁଦିଆ ବ୍ଲକ କାର୍ଯ୍ୟାଳୟ ଏବଂ ୭୦କିମି ଦୂର ଢେଙ୍କାନାଳକୁ ଆସି ଜିଲା ପ୍ରଶାସନ ନିକଟରେ ଗୁହାରି କରିଛନ୍ତି। ହେଲେ କେହି ତାଙ୍କ କଥା ବୁଝୁ ନ ଥିବା ସେ କହିଛନ୍ତି।
ଅନ୍ୟପଟେ ଅବହେଳିତ ଶିଶୁଙ୍କ ପାଇଁ କାର୍ଯ୍ୟ କରୁଥିବା ସ୍ବେଚ୍ଛାସେବୀ ଅନୁଷ୍ଠାନ ‘ପ୍ରିୟ’ର କର୍ମକର୍ତ୍ତା ଟଙ୍କଧର ବାରିକ ସତ୍ୟଙ୍କୁ ସହାୟତା ଯୋଗାଇଦେବାକୁ ଆଗେଇ ଆସିଛନ୍ତି। ଏ ନେଇ ସେ ଗଁଦିଆ ବ୍ଲକ ସମନ୍ବିତ ଶିଶୁ ବିକାଶ ଯୋଜନା ଅଧିକାରୀ (ସିଡିପିଓ)ଙ୍କୁ ଅବଗତ କରାଇଛନ୍ତି। ସିଡିପିଓ ଉର୍ମିଳା ଦେହୁରୀ କୁହନ୍ତି, ସ୍ଥାନୀୟ ସୁପରଭାଇଜରଙ୍କୁ ଘଟଣାର ଅନୁଧ୍ୟାନ କରି ରିପୋର୍ଟ ଦେବାକୁ କୁହାଯାଇଛି। ରିପୋର୍ଟ ମିଳିବା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ। ଜିଲା ସମାଜ ମଙ୍ଗଳ ଅଧିକାରୀ ଦାୟିତ୍ୱରେ ଥିବା ଜିଲା ସାମାଜିକ ସଶକ୍ତୀକରଣ ଓ ସୁରକ୍ଷା ଅଧିକାରୀ ପ୍ରସନ୍ନ କୁମାର ମଲିକ କୁହନ୍ତି, ଏ ସମ୍ପର୍କରେ ପଦକ୍ଷେପ ନେବାକୁ ବ୍ଲକ ସମନ୍ବିତ ଶିଶୁ ବିକାଶ ଯୋଜନା ଅଧିକାରୀଙ୍କୁ ଜଣାଇବୁ।
