ବଅଁରପାଳ,୧୯ା୩(ଉପେନ୍ଦ୍ର ରାଉତ) : ହ୍ରାସ ପାଉଛି ଜଙ୍ଗଲ। ଲୋପ ପାଉଛନ୍ତି ବିଭିନ୍ନ ଜୀବଜନ୍ତୁ, ସରୀସୃପ। ତେଣୁ ଜୀବ ପ୍ରତି ଦୟାଭାବ ଓ ବିରଳ ବନ୍ୟଜନ୍ତୁଙ୍କ ସଂରକ୍ଷଣ ଲାଗି ଲୋକଙ୍କ ମଧ୍ୟରେ ସଚେତନତା ସୃଷ୍ଟି ଉଦ୍ଦେଶ୍ୟରେ ଅନୁଗୋଳ ଜିଲା ବଅଁରପାଳ ବ୍ଲକ କୁକୁଡାଙ୍ଗ ଗ୍ରାମରେ ରହିଛି ନିର୍ଜୀବ ନନ୍ଦନକାନନ। ଦୀର୍ଘ ୩୬ ବର୍ଷ ତଳେ ଗ୍ରାମବାସୀ ନେଇଥିବା ଏହି ଅଭିନବ ପଦକ୍ଷେପ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି।
୧୯୮୪ ମସିହାରେ ବଅଁରପାଳ ବ୍ଲକ କୁକୁଡାଙ୍ଗ ଗ୍ରାମର ଯେଉଁଠାରେ ଏହି ନିର୍ଜୀବ ନନ୍ଦନକାନନ ନିର୍ମାଣ କରାଯାଇଥିଲା ପୂର୍ବରୁ ତାହା ଏକ ପରିତ୍ୟକ୍ତ ପାହାଡ଼ ଥିଲା। ବଡ଼ ବଡ଼ ପଥର ସହ ଲଟାବୁଦାରେ ପରିପୂର୍ଣ୍ଣ ଯୋଗୁ ଦିନରେ ବି ଉକ୍ତ ସ୍ଥାନ ଲୋକଙ୍କ ପାଇଁ ଅଗମ୍ୟ ଥିଲା। ତେବେ ନିକଟରେ ମା’ ମଙ୍ଗଳାଙ୍କ ପୀଠସ୍ଥଳୀ ଥିବାରୁ ଉକ୍ତ ପାହାଡ଼ର ସୌନ୍ଦର୍ଯ୍ୟ ବୃଦ୍ଧି ପାଇଁ ଗ୍ରାମବାସୀ ନିଷ୍ପତ୍ତି ନେଇଥିଲେ। ନିର୍ଦ୍ଦିଷ୍ଟ ଯୋଜନା କରିବା ପରେ ଉକ୍ତ ପାହାଡ଼ରେ ତେନ୍ତୁଳି, କରଞ୍ଜ ଓ ଆଙ୍କୁଲା ଆଦି ବିଭିନ୍ନ ଔଷଧୀୟ ଚାରା ରୋପଣ କରିଥିଲେ। ପରେ ଧୀରେ ଧୀରେ ଲୋପ ପାଇଯାଉଥିବା ବନ୍ୟଜନ୍ତୁଙ୍କ ସମ୍ପର୍କରେ ଲୋକଙ୍କୁ ସଚେତନ କରିବାକୁ ସେଠାରେ ଏକ ନିର୍ଜୀବ ନନ୍ଦନକାନନ କରିଥିଲେ।
ଦର୍ଶନୀୟ ସହ ଶିକ୍ଷଣୀୟ
ଏକ ପରିତ୍ୟକ୍ତ ସ୍ଥାନକୁ ସୌନ୍ଦର୍ଯ୍ୟକରଣ ସହ ଶିକ୍ଷଣୀୟ କରିବାରେ ଯୁବଗୋଷ୍ଠୀଙ୍କ ଉଦ୍ୟମ ନିଶ୍ଚିତ ପ୍ରଶଂସାଯୋଗ୍ୟ। ଜନମାନସରୁ ଅଦୃଶ୍ୟ ହୋଇଯାଉଥିବା ଅନେକ ଜୀବଜନ୍ତୁଙ୍କ ପଥର ଓ ସିମେଣ୍ଟ ମୂର୍ତ୍ତି ଦେଖି ଛାତ୍ରୀଛାତ୍ର ଓ ସାଧାରଣ ଲୋକେ ସେମାନଙ୍କ ବିଷୟରେ ଅନେକ କିଛି ଜାଣିପାରୁଛନ୍ତି।
-ସଂଯୁକ୍ତା ତ୍ରିପାଠୀ
ପୂର୍ବତନ ସରପଞ୍ଚ, କୁକୁଡ଼ାଙ୍ଗ
ସଚେତନତାର ପରିଚୟ
କୁକୁଡ଼ାଙ୍ଗ ଗ୍ରାମର ନିର୍ଜୀବ ନନ୍ଦନକାନନ ଗ୍ରାମବାସୀଙ୍କ ସଚେତନତାର ପରିଚୟ ଦେଉଛି। ଏଥିପ୍ରତି ଜିଲା ପ୍ରଶାସନ, ନାଲ୍କୋ, ଏମ୍ସିଏଲ୍ ଓ ଏଫ୍ସିଆଇ କର୍ତ୍ତୃପକ୍ଷ ଯଦି ସାହାଯ୍ୟ ଓ ସହଯୋଗର ହାତ ବଢ଼ାନ୍ତେ ତା’ହେଲେ ଏହା ଏକ ପ୍ରମୁଖ ପର୍ଯ୍ୟଟନ କ୍ଷେତ୍ର ଭାବେ ପରିଣଗିତ ହୋଇପାରନ୍ତା।
-ବିନୋଦ ଶତପଥୀ
ଗ୍ରାମବାସୀ, କୁକୁଡ଼ାଙ୍ଗ
ଉନ୍ନତୀକରଣ ଆବଶ୍ୟକ
ଉକ୍ତ ସ୍ଥାନର ସୌନ୍ଦର୍ଯ୍ୟ ଅବର୍ଣ୍ଣନୀୟ। କିନ୍ତୁ ଏଠାରେ ବିଦ୍ୟୁତ୍, ପାନୀୟଜଳ ସହ ଭଲ ଗମନାଗମନ ବ୍ୟବସ୍ଥାର ଆବଶ୍ୟକତା ରହିଛି। ଏହାର ଉନ୍ନତୀକରଣ ସହ ପର୍ଯ୍ୟଟନସ୍ଥଳୀରେ ପରିଣତ କରିବା ଦିଗରେ ରାଜ୍ୟ ସରକାର ଦୃଷ୍ଟି ଦେବା ଦରକାର। ପ୍ରଶାସନ ନିକଟରେ ଏଥିପାଇଁ ଖୁବ୍ଶୀଘ୍ର ଦାବି କରାଯିବ।
-ପ୍ରତାପ ସେନାପତି
ସରପଞ୍ଚ, କୁକୁଡ଼ାଙ୍ଗ
ମୂର୍ତ୍ତି ଗଢ଼ିବା କଷ୍ଟକର ଥିଲା
ଲଟାବୁଦାରେ ପରିପୂର୍ଣ୍ଣ ପାହାଡ଼ର ପଥର ଉପରେ ବିଭିନ୍ନ ବିରଳ ପ୍ରଜାତିର ଜୀବଜନ୍ତୁ ଓ ସରୀସୃପଙ୍କ ମୂର୍ତ୍ତି ଗଢ଼ିବା ବେଶ୍ କଷ୍ଟକର ଥିଲା। ତଥାପି ଲକ୍ଷ୍ୟ ପୂରଣରେ ସଫଳ ହୋଇପାରିଛି। କେତେଜଣ ଯୁବଗୋଷ୍ଠୀ ଏଥିରେ ସହାୟତା କରିଛନ୍ତି। ଏହାଦ୍ୱାରା ବିଲୁପ୍ତ ହୋଇଯାଉଥିବା ଜୀବଜନ୍ତୁଙ୍କ ସମ୍ପର୍କରେ ସହଜରେ ସ୍କୁଲ୍ ପିଲାମାନେ ଜାଣିପାରୁଛନ୍ତି।
-ରାମଚନ୍ଦ୍ର ସାହୁ
ଯୁବଶିଳ୍ପୀ, କୁକୁଡ଼ାଙ୍ଗ
