ଚୌଦ୍ୱାର,୧୭।୫(ଡି.ଏନ.ଏ.)-କଟକ ଜିଲା ନିର୍ଗୁଣ୍ଡି ଷ୍ଟେଶନରେ ରବିବାର ଅପରାହ୍ନ ୪ଟାରେ ଶ୍ରମିକ ସ୍ବତନ୍ତ୍ର ଏକ୍ସପ୍ରେସ ଟ୍ରେନ ଆସି ପହଞ୍ଚିଛି। ଅହମ୍ମଦାବାଦରୁ ଯାଜପୁର ଟାଉନ ଆସିଥିବା ଏହି ଟ୍ରେନରେ କଟକ, ଜଗତସିଂହପୁର ଓ କେନ୍ଦ୍ରାପଡା ଜିଲାର ୬୦୦ ଶ୍ରମିକ ଓହ୍ଲାଇଛନ୍ତି। ଏହି ଟ୍ରେନଟି ଆଜି ସକାଳ ୬ଟାରେ ଷ୍ଟେଶନରେ ପହଞ୍ଚିବ ବୋଲି ପ୍ରଶାସନ ତରଫରୁ ସମୟ ନିର୍ଦ୍ଧାରିତ ହୋଇଥିଲା। ମାତ୍ର ତାହା ୧୦ଘଣ୍ଟା ବିଳମ୍ବରେ ଆସିଥିଲା। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଷ୍ଟେଶନର ଚାରିପଟ ୧କି.ମି ପର୍ଯ୍ୟନ୍ତ ୧୪୪ ଧାରା ୩ଦିନ ହେବ ବଳବତ୍ତର ରହିଛି। ଆଜି ରାତି ସୁଦ୍ଧା ଆଉ ୨ଟି ଟ୍ରେନ ବାଙ୍ଗାଲୋରରୁ ଯାଜପୁର ଟାଉନ ଆସିବ। ନିର୍ଗୁଣ୍ଡି ଷ୍ଟେଶନରେ ଆଜି ଆଉ ୨୪ଶହ ଯାତ୍ରୀ ପହଞ୍ଚିବେ ବୋଲି ଜଣାପଡିଛି। ଶ୍ରମିକମାନେ ପହଞ୍ଚିବା ପରେ ସେମାନଙ୍କୁ ସନିଟାଇଜ କରାଯିବ, ତାପରେ ସ୍କାନିଂ କରାଯାଇ ପ୍ରଶାସନିକ ବିଧି ବ୍ୟବସ୍ଥା କରାଯିବ।
