ଭୁବନେଶ୍ୱର,୧୩।୬(ବ୍ୟୁରୋ): ୨୦୧୯ ସାଧାରଣ ନିର୍ବାଚନରେ ରାଜ୍ୟରେ କଂଗ୍ରେସ ଶୋଚନୀୟ ଭାବେ ପରାଜିତ ହୋଇଛି। ତେବେ ଏହା ପଛରେ କାରଣ କ’ଣ, ଦଳର କେଉଁ ଆଭିମୁଖ୍ୟ ଫିକା ପଡ଼ିଲା, କ’ଣ କଲେ ଦଳ ଆଗାମୀ ଦିନରେ ନିଜର ପତିଆରା ଫେରିପାଇବ, ରାଜ୍ୟବାସୀଙ୍କ ଆସ୍ଥା ଭାଜନ ହେବ ସେ ନେଇ ବିଭିନ୍ନ ସମୟରେ ବୈଠକ ବସି ତର୍ଜମା କରାଯାଉଛି। ଏହି କ୍ରମରେ ଗୁରୁବାର କଂଗ୍ରେସର ଦୁଇ ବରିଷ୍ଠ ନେତା ପରସ୍ପର ମଧ୍ୟରେ ଆଲୋଚନା କରିଛନ୍ତି।
ପିସିସି ସଭାପତି ନିରଞ୍ଜନ ପଟ୍ଟନାୟକ ଦଳର ବରିଷ୍ଠ ନେତା ତଥା ବିଧାୟକ ନରସିଂହ ମିଶ୍ରଙ୍କ ଘରକୁ ଯାଇ ଆଲୋଚନା କରିଛନ୍ତି। ଏ ନେଇ ପ୍ରତିକ୍ରିୟା ରଖି ନିରଞ୍ଜନ କହିଛନ୍ତି, ରାଜ୍ୟର ସାମ୍ପ୍ରତିକ ସ୍ଥିତି ଉପରେ ଆଲୋଚନା ହୋଇଛି। ଅନେକ ସମୟରେ ସେ ଆସି ଏଭଳି ଆଲୋଚନା କରିଥାନ୍ତି ବୋଲି କହିଥିଲେ। ହେଲେ ନରସିଂହ କଥାକୁ ଏଡ଼ାଇ ଯାଇଥିବା ଜଣାପଡ଼ିଛି। ସେ ସବୁ କଥାକୁ ଖୋଲି କରି କହିବାକୁ ଚାହୁଁ ନ ଥିବା ପ୍ରକାଶ କରିଥିଲେ।
