ବାଲେଶ୍ୱର ଅଫିସ, ୨୮।୧୧: ନାବାଳିକାଙ୍କ ଅଶ୍ଳୀଳ ଫଟୋ ଭାଇରାଲ ମାମଲାର ବିଚାର କରି ବାଲେଶ୍ୱର ପୋକ୍ସୋ କୋର୍ଟର ସ୍ବତନ୍ତ୍ର ଜଜ୍ ରଞ୍ଜନ କୁମାର ସୂତାର ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରି ୫ବର୍ଷ ଜେଲ୍ ଦଣ୍ଡାଦେଶ ଦେଇଛନ୍ତି। ଏହାସହ ୫ହଜାର ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ଆଉ ବର୍ଷେ ଜେଲଦଣ୍ଡ ଭୋଗିବାକୁ ରାୟରେ କୁହାଯାଇଛି। ଅଭିଯୁକ୍ତ ଯୁବକ ହେଲେ ବାଲେଶ୍ୱର ଜିଲା କମର୍ଦ୍ଦା ଥାନା ଅଧୀନ ମନୁନଗର ଅଞ୍ଚଳର ଉପେନ୍ଦ୍ର ପାଳ ।
ଉପେନ୍ଦ୍ର ଜଣେ ନାବାଳିକାଙ୍କ ଅଶ୍ଳୀଳ ଫଟୋ କୌଶଳକ୍ରମେ ଉଠାଇ ତାଙ୍କୁ ବ୍ଲାକମେଲ୍ କରିବା ସହ ଭିନ୍ନ ଭିନ୍ନ ସ୍ଥାନକୁ ଡାକି ଅନିଚ୍ଛା ସତ୍ତ୍ୱେ ଶାରୀରିକ ସମ୍ପର୍କ ରଖିଆସୁଥିଲେ। ଏହି ଘଟଣା ପରିବାର ଲୋକେ ଜାଣିବା ପରେ ଉପେନ୍ଦ୍ର ଓ ତାଙ୍କ ପରିବାର ସହ ଆଲୋଚନା କରିଥିଲେ। ହେଲେ ଏହାର ସମାଧାନ ହୋଇପାରି ନ ଥିଲା। ଅନ୍ୟପକ୍ଷରେ ଉପେନ୍ଦ୍ର ନାବାଳିକାଙ୍କ ପରିବାର ଲୋକଙ୍କୁ ଧମକ ଦେବା ସହ ଗାଳିଗୁଲଜ କରିଥିଲେ। ନାବାଳିକାଙ୍କ ସମ୍ପର୍କୀୟଙ୍କୁ ଅଶ୍ଳୀଳ ଫଟୋ, ଭିଡ଼ିଓ ଏବଂ ରେକର୍ଡ଼ିଂ ହ୍ବାଟସ୍ଅପ୍ରେ ପଠାଇବା ସହ ନିଜ ଫେସବୁକ୍ରେ ଅପଲୋଡ୍ କରିଥିଲେ। ଏହାପରେ ବାଧ୍ୟ ହୋଇ ପରିବାର ଲୋକେ ୨୦୧୬ ଫେବୃୟାରୀ ୯ ତାରିଖରେ କମର୍ଦ୍ଦା ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ କମର୍ଦ୍ଦା ଥାନାରେ ମାମଲା (ନଂ. ୬/୧୬) ରୁଜୁ କରାଯାଇଥିଲା। ସରକାରଙ୍କ ପକ୍ଷରୁ ସ୍ବତନ୍ତ୍ର ପବ୍ଲିକ ପ୍ରସିକ୍ୟୁଟର ପ୍ରଣବ କୁମାର ପଣ୍ଡା ମାମଲାର ପରିଚାଳନା କରୁଥିଲେ।
