ଭୁବନେଶ୍ୱର,୪।୧୦(ବ୍ୟୁରୋ): ନର୍ସ ନୀହାରିକା ହତ୍ୟା ଘଟଣାରେ ପୋଲିସର ତଦନ୍ତକୁ ନେଇ ପ୍ରଶ୍ନ ଉଠାଇଛନ୍ତି ତାଙ୍କ ମା’ ଓ ବାପା। ସେମାନେ ପୋଲିସର ଦୂର୍ବଳ ତଦନ୍ତକୁ ନେଇ ଅସନ୍ତୋଷ ବ୍ୟକ୍ତ କରିବା ସହ କ୍ରାଇମ୍ବ୍ରାଞ୍ଚ ତଦନ୍ତ ଦାବି କରିଛନ୍ତି। ଗୁରୁବାର ସେମାନେ ରାଜ୍ୟ ମାନବିକ ଅଧିକାର କମିଶନ(ଓଏଚ୍ଆର୍ସି)ଙ୍କ ଦ୍ୱାରସ୍ଥ ହୋଇଛନ୍ତି। ମାନବିକ ଅଧିକାର କର୍ମୀ ପ୍ରଦୀପ୍ତ ନାୟକଙ୍କ ଜରିଆରେ ଏକ ପିଟିଶନ ଦାଖଲ କରିଛନ୍ତି। ନୀହାରିକାଙ୍କ ବାପା କହିଛନ୍ତି,ଏହି ଘଟଣାରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ରହିଛି। ଅଭିଯୁକ୍ତ କିଶୋରଚନ୍ଦ୍ର ଆଞ୍ଚଳ ଆତ୍ମସର୍ମପଣ କରି ନ ଥିଲେ ପୋଲିସ ତାଙ୍କୁ ବି ଧରିପାରି ନ ଥାନ୍ତା। କ୍ରାଇମ୍ବ୍ରାଞ୍ଚ ତଦନ୍ତ ହେଲେ ସବୁକିଛି ପଦାକୁ ଆସିବ ବୋଲି ତାଙ୍କ ବାପା କହିଛନ୍ତି। ଏନେଇ ମାନବିକ ଅଧିକାରୀ ପ୍ରଦୀପ୍ତ ନାୟକ କହିଛନ୍ତି, ନୀହାରିକାଙ୍କୁ ଅପହରଣ ପରେ ଗଣବଳାତ୍କାର କରାଯାଇଛି। ଏହାପରେ ତାଙ୍କୁ ଏକ ଘରେ ହତ୍ୟା କରାଯାଇ ବସ୍ତାରେ ପୂରାଇ ବିଲୁଆଖାଇ ନଦୀ ପଠାରେ ପିଙ୍ଗା ଯାଇଛି। ପୋଲିସ ଏହି ଘଟଣାର ତଦନ୍ତ ଠିକ୍ରେ କରିବାରେ ବିଫଳ ହୋଇଛି। ସୂଚନାଯୋଗ୍ୟ, ଗତ ୧୭ ତାରିଖରେ ନୀହାରିକାଙ୍କ ମୃତଦେହ ନଦୀପଠାରୁ ମିଳିଥିଲା।
