କଟକ ସଦର,୧୭ା୬(ଡି.ଏନ୍.ଏ.) : ସହରାଞ୍ଚଳ ଓ ଶିଳ୍ପାଞ୍ଚଳରୁ ନିର୍ଗତ ଦୂଷିତ ଜଳ ଦ୍ୱାରା ରାଜ୍ୟର ପ୍ରମୁଖ ନଦୀଗୁଡ଼ିକୁ ବିଷାକ୍ତ କରୁଛିିି। ବିଶେଷକରି ମହାନଦୀ ଓ ତା’ର ଶାଖା ନଦୀଗୁଡ଼ିକର ଜଳ କ୍ରମଶଃ ବିଷାକ୍ତ ହେବାରେ ଲାଗିଛି। ଏହା ଉପରେ ନିର୍ଭର କରୁଥିବା ଲୋକେ ନାନାଦି ରୋଗରେ ଆକ୍ରାନ୍ତ ହେଉଛନ୍ତି। ପ୍ରାଣୀ ଓ ମତ୍ସ୍ୟ ସମ୍ପଦ ଉପରେ କୁପ୍ରଭାବ ପଡୁଛି। ଏନେଇ ବାରମ୍ବାର ଅଭିଯୋଗ ଆସିବା ପରେ ଜଳସମ୍ପଦ ବିଭାଗ ତତ୍ପରତା ପ୍ରକାଶ କରିଛି। ବିଭାଗୀୟ ସର୍ବୋଚ୍ଚ ମୁଖ୍ୟଯନ୍ତ୍ରୀ ଅକ୍ଷୟ କୁମାର ବାନାର୍ଜୀ ପତ୍ର ସଂଖ୍ୟା ୧୬୧୨୮/୧୨ା୬ା୨୦୧୯ରେ ମୁଖ୍ୟ ଯନ୍ତ୍ରୀମାନଙ୍କୁ ରିପୋର୍ଟ ତଲବ କରିଛନ୍ତି। ମହାନଦୀ, ବ୍ରାହ୍ମଣୀ, ବୈତରଣୀକୁ ଦୂଷିତ ଜଳ ଛାଡୁଥିବା ସହରାଞ୍ଚଳ ପରିଷଦ ସମ୍ପର୍କରେ ସବିଶେଷ ତଥ୍ୟ ଦେବା ପାଇଁ ନିର୍ଦ୍ଦେଶ ଦିଆଯାଇଛି।
ସୂଚନାଯୋଗ୍ୟ, କଟକ ମହାନଗର ନିଗମ ଅଞ୍ଚଳରେ ନିଷ୍କାସନ ପାଇଁ ଚାଲିଥିବା ଜାଇକା (ଜାପାନ ଇଣ୍ଟରନ୍ୟାଶନାଲ କୋ ଅପରେଟିଭ ଏଜେନ୍ସି) ପ୍ରକଳ୍ପର ପାଣି ବିଶୋଧନାଗାର(ଓ୍ବାଟର ଟ୍ରିଟମେଣ୍ଟ ପ୍ଲାଣ୍ଟ)ଟି କାଠଯୋଡି ନଦୀର ବଗୁଲାପଡ଼ାଠାରେ ଜାଲ ଏନ୍ଓସି ବଳରେ ନିର୍ମାଣ କାର୍ଯ୍ୟ ଚାଲିଛି ବୋଲି ୯ବର୍ଷ ପରେ ଧରିତ୍ରୀରେ ୧୨ା୩ା୧୯ରେ ପ୍ରକାଶିତ ହୋଇଥିଲା। ଏହି ଖବରକୁ ଆଧାର କରି ଜଳସମ୍ପଦ ବିଭାଗର ପ୍ରିନି୍ସପାଲ ସେକ୍ରେଟାରୀ ପ୍ରଦୀପ କୁମାର ଜେନା ସେହିଦିନ ବିଭାଗୀୟ ଯନ୍ତ୍ରୀମାନଙ୍କ ହ୍ବାଟସଆପ ଗ୍ରୁପରେ କୈଫିୟତ ମାଗିଥିଲେ। ଏହି ନିର୍ଦ୍ଦେଶନାମାକୁ ଆଧାର କରି ମହାନଦୀ ସାଉଥ ଜଳସେଚନ ଡିଭିଜନର ନିର୍ବାହୀଯନ୍ତ୍ରୀ ବସନ୍ତ କୁମାର ରାଉତ ପତ୍ର ସଂଖ୍ୟା ୨୬୮୪/୧୩ା୩ା୧୯ରେ ଉତ୍ତର ଦେଇଥିଲେ। ଏହି ପତ୍ରରେ ମତ୍ତଗଜପୁର ପରିବର୍ତ୍ତେ ବଗୁଲାପଡା ଗ୍ରାମରେ ଟ୍ରିଟମେଣ୍ଟ ପ୍ଲାଣ୍ଟ କାଠଯୋଡି ନଦୀ ପଠାରେ ନିର୍ମାଣ କରାଯାଉଥିବା ଉଲ୍ଲେଖ ଥିଲା। ଚିଠି ସମ୍ପର୍କରେ ବିଭାଗ କ’ଣ ନିଷ୍ପତ୍ତି ଗ୍ରହଣ କରିଛି ବୋଲି ଜଣେ ସୂଚନା ଅଧିକାର କର୍ମୀ ମେ’ ମାସରେ ତଥ୍ୟ ଜାଣିବାକୁ ଚାହିଁଥିଲେ। ରାଜ୍ୟରେ ନଦୀକୁ ଦୂଷିତ କରୁଥିବା ସମ୍ପର୍କରେ ତଥ୍ୟ ସଂଗ୍ରହ ଅଭିଯାନ ଆରମ୍ଭ ହୋଇଛି ବୋଲି ଜଳସମ୍ପଦ ବିଭାଗର ଜନ ସୂଚନା ଅଧିକାରୀ ସମ୍ପୃକ୍ତ ସୂଚନା ଅଧିକାରୀ କର୍ମୀଙ୍କୁ ଇ-ମେଲ ଯୋଗେ ଚିଠିର ଅବିକଳ ନକଲ ସହ ଅବଗତ କରାଇଛନ୍ତି। ସମସ୍ତ କେନାଲ, ଯୋରକୁ ଦୂଷିତ ଜଳ ଛାଡୁଥିବା କ୍ଷୁଦ୍ର ଓ ମଧ୍ୟମ ଶିଳ୍ପ ସଂସ୍ଥା ଓ ଚିକିତ୍ସାଳୟମାନଙ୍କର ମଧ୍ୟ ସୂଚନା ସଂଗ୍ରହ କରାଯିବ।
