ବୌଦ୍ଧ, ୧୨ା୩(ସ୍ବପ୍ର): ବୌଦ୍ଧ ଜିଲାରେ ଅଦିନିଆ ବର୍ଷା ଓ ଅବ୍ୟବସ୍ଥିତ ଟୋକନ ବ୍ୟବସ୍ଥାକୁ ନେଇ ଧାନକ୍ରୟରେ ଅଚଳାବସ୍ଥା ସୃଷ୍ଟି ହୋଇଛି। ଚାଷୀଙ୍କ ଶହଶହ ବସ୍ତାଧାନ ମଣ୍ଡିରେ ପଡିରହି ନଷ୍ଟ ହେଉଛି। ଏପେଟ ଧାନକିଣା ନେଇ ପ୍ରଶାସନର ସବୁ ପ୍ରସ୍ତୁତି ଫେଲ ମାରିଥିବାବେଳେ ଚାଷୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ସୂଚନା ମୁତାବକ ମାର୍ଚ୍ଚ ମାସ ଅଧା ହୋଇସାରିଥିବାବେଳେ ଜିଲାର ଅର୍ଦ୍ଧାଧିକ ଚାଷୀ ଏଯାଏ ସେମାନଙ୍କ ଧାନ ବିକ୍ରି କରି ପାରିନାହାନ୍ତି। ଫଳରେ ମଣ୍ଡିଗୁଡିକରେ ଚାଷୀମାନେ ଭିଡ ଜମାଉଛନ୍ତି। ଏଥିସହିତ କମ୍ମୂଲ୍ୟରେ ଦଲାଲମାନଙ୍କ ଜରିଆରେ ଧାନ ବିକ୍ରି କରିବାକୁ ବାଧ୍ୟ ହେଉଛନ୍ତି। ଟୋକନ ଯୋଗାଣରେ ଅବ୍ୟବସ୍ଥା ଯୋଗଁୁ ଧାନ ବିକ୍ରି ହୋଇପାରୁ ନାହିଁ, ସେପେଟ ଟୋକନ ପାଇଥିବା ଚାଷୀ ମଣ୍ଡିକୁ ଆଣିଥିବା ଧାନ ମିଲର ଆସୁ ନ ଥିବାରୁ ଉଠି ପାରୁନାହିଁ। ଏହିସବୁ ଅବ୍ୟବସ୍ଥାର ପ୍ରତିବାଦ ଓ ମଣ୍ଡିରୁ ଧାନ ଉଠୁ ନ ଥିବା ଅଭିଯୋଗ କରି ଗୁରୁବାର ହରଭଙ୍ଗା ବ୍ଲକ ସରସରା ଅଞ୍ଚଳର ଚାଷୀମାନେ ଖୋର୍ଦ୍ଧା-ବଲାଙ୍ଗୀର ୫୭ନଂ ଜାତୀୟ ରାଜପଥର ସରସରାଠାରେ ଧାନବସ୍ତା ରଖି ପ୍ରାୟ ୪ ଘଣ୍ଟା ଧରି ଅବରୋଧ କରିଥିଲେ। ଫଳରେ ରାସ୍ତାର ଉଭୟ ପାର୍ଶ୍ୱରେ ଶହଶହ ସଂଖ୍ୟାରେ ଯାନବାହାନ ଅଟକି ରହିଥିଲା। ଏଥିଯୋଗୁ ଯାତ୍ରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଜିଲାପାଳ ଲଲାଟେନ୍ଦୁ ମିଶ୍ରଙ୍କ ନିର୍ଦ୍ଦେଶକ୍ରମେ ଜିଲା ଯୋଗାଣ ଅଧିକାରୀ ବିଷ୍ଣୁ ପ୍ରସାଦ ପ୍ରଧାନ ଘଟଣାସ୍ଥଳରେ ପହଞ୍ଚି ଚାଷୀମାନଙ୍କୁ ବୁଝାଶୁଝା କରିଥିଲେ। ମଣ୍ଡିରୁ ଧାନ ଉଠାଇବାକୁ ପ୍ରତିଶ୍ରୁତି ଦେବାପରେ ଚାଷୀମାନେ ଅବରୋଧରୁ ହଟିଥିଲା। ଅପରପକ୍ଷେ ଜିଲା ଯୋଗାଣ ଅଧିକାରୀଙ୍କ ହସ୍ତକ୍ଷେପ ଫଳରେ ଗୁରୁବାର ପ୍ରାୟ ୧୦୦୦ ବସ୍ତା ଧାନ ମଣ୍ଡିରୁ ଉଠିଛି। ଆହୁରି ୨୦୦୦ ବସ୍ତା ଧାନ ମଣ୍ଡିରେ ଜମା ହୋଇ ରହିଥିବା ଜଣାପଡିଛି। କେବଳ ସରସରା ନୁହେଁ, ଜିଲାସାରା ଏହି ଅବସ୍ଥା ଲାଗି ରହିଥିବାରୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଚାଷୀମାନେ ଦାବି କରିଛନ୍ତି।
