ତିହିଡ଼ି,୨୩।୧(ଡି.ଏନ.ଏ.)-ଭଦ୍ରକ ଜିଲା ତିହିଡ଼ି ଥାନା ଅଧୀନ ସୟା ପଞ୍ଚାୟତ ନିଶ୍ଚିନ୍ତପୁର ସମବାୟ ସମିତିରୁ ଧାନ ବୋଝେଇ କରି ଯାଉଥିବା ଏକ ଟ୍ରକ୍କୁ ଆଂଚଳିକ ପରିବହନ କାର୍ୟାଳୟ(ଆରଟିଓ) ପକ୍ଷରୁ ୫୮, ୦୪୦ ଟଙ୍କା ଜରିମାନା କରାଯାଇଛି। ଟ୍ରକ୍ର କାଗଜପତ୍ର ଠିକ୍ ନ ଥିବାବେଳେ ଚାଳକଙ୍କ ଲାଇସେନ୍ସ ନ ଥିବାରୁ ଜରିମାନା କରାଯାଇଥିବା ପରିବହନ ବିଭାଗ ସୂଚନା ଦେଇଛି।
ପ୍ରକାଶ ଯେ, ଗତ ମଙ୍ଗଳବାର ରାତିରେ ଏହି ସମବାୟ ସମିତିରୁ ୨ଶହ ବସ୍ତା ଧାନ ବୋଝେଇ କରି ଟ୍ରକ୍(ନଂ.ଏମଏଚ୍୧୬ସିସି ୭୪୭୪) ସମ୍ବଲପୁରସ୍ଥିତ ଭେଙ୍କେଟେଶ୍ୱର ରାଇସ୍ ମିଲ୍କୁ ଯାଉଥିଲା। ତିହିଡ଼ି ଗ୍ରାମରେ କେତେଜଣ ଯୁବକ ଗାଡ଼ିକୁ ଅଟକାଇ ଚାନ୍ଦା ମାଗିଥିଲେ। ଏ ସମ୍ପର୍କରେ ଗାଡ଼ି ଡ୍ରାଇଭରଙ୍କଠାରୁ ସୂଚନା ପାଇ ସମବାୟ ସମିତି ସମ୍ପାଦିକା ଗୀତାଞ୍ଜଳି ଦାସ ତିହିଡ଼ି ଥାନାରେ ଅଭିଯୋଗ କରିଥିଲେ। ପୋଲିସ ଏହି ଘଟଣାରେ ଏକ ମାମଲା(ନଂ.୨୪/୨୦) ରୁଜୁ କରି ବୁଧବାର ତିହିଡ଼ି ଗ୍ରାମର ନିର୍ମଳ ବେହେରାଙ୍କୁ ଗିରଫ କରିଥିଲା। ପରେ ପୋଲିସ ସନ୍ଦେହରେ ଟ୍ରକ୍କୁ ଅଟକ ରଖି ଗାଡ଼ିର କାଗଜପତ୍ର ଯାଞ୍ଚ ପାଇଁ ପରିବହନ ବିଭାଗକୁ ଖବର ଦେଇଥିଲା। ଏମ୍ଭିଆଇ ବିପ୍ର ଚରଣ ଚୌଧୁରୀ ଗୁରୁବାର ପୂର୍ବାହ୍ନରେ ତିହିଡ଼ି ଥାନାକୁ ଆସି ଯାଞ୍ଚ କରିବାରୁ ଟ୍ରକ୍ର କାଗଜପତ୍ର ଠିକ୍ ନ ଥିବା ଜଣାପଡ଼ିଥିଲା। ଗାଡ଼ିକୁ ଥାନାରେ ଅଟକ ରଖାଯାଇଛି।
