ଭୁବନେଶ୍ୱର,୨୩ା୧(ବ୍ୟୁରୋ): ରାଜ୍ୟରେ ବ୍ରାଉନସୁଗାର ର଼୍ୟାକେଟକୁ ଧରିବାରେ କ୍ରାଇମ୍ବ୍ରାଞ୍ଚ ଏସ୍ଟିଏଫ୍କୁ ସଫଳତା ମିଳିବା ପରେ କମିଶନରେଟ ପୋଲିସ ସ୍ପେଶାଲ ଡ୍ରାଇଭ୍ ଆରମ୍ଭ କରିଛି। କଟକ ଓ ଭୁବନେଶ୍ୱର ଦୈତନଗରୀର ୩ ଥାନାଞ୍ଚଳରେ ବୁଧବାର ପୋଲିସ ଓ କ୍ୟୁଏଟି ମିଳିତ ଚଢ଼ାଉ କରି ୭୪.୮ ଗ୍ରାମ ବ୍ରାଉନସୁଗାର ଜବତ କରିବା ସହ ସଂପୃକ୍ତ ୫ ଜଣଙ୍କୁ ଗିରଫ କରିଛି। ସେମାନଙ୍କ ନିକଟରୁ ୩ ବାଇକ, ୫ ମୋବଇଲ ଫୋନ୍ ଓ ୨୧୬୦ ଟଙ୍କା ଜବତ କରାଯାଇଛି।
ସୂଚନା ମୁତାବକ, ତମାଣ୍ଡୋ ଥାନା ଅନ୍ତର୍ଗତ ବେହେରା ଢାବା ନିକଟରେ ବ୍ରାଉନସୁଗାର କାରବାର ଚାଲିଥିବାନେଇ ଖବର ମିଳିଥିଲା। କ୍ୟୁଏଟି ଓ ତମାଣ୍ଡୋ ଥାନା ପୋଲିସ ତୁରନ୍ତ ସେଠାରେ ଚଢାଉ କରି ୨ ଜଣ ଅଭିଯୁକ୍ତଙ୍କୁ ଗିରଫ କରିଥିଲା। ସେମାନେ ହେଲେ ଖଣ୍ଡଗିରି ଥାନାଞ୍ଚଳର ବିକ୍ରମ ମଲ୍ଲିକ ଓ ମଞ୍ଚେଶ୍ୱର ଥାନାଞ୍ଚଳର ଜୟଶଙ୍କର ପରିଡା। ସେମାନଙ୍କ ନିକଟରୁ ୨୧.୮୫୦ ଗ୍ରାମ ବ୍ରାଉନସୁଗାର, ୧୧୮୦ ଟଙ୍କା ଓ ୨ ମୋବାଇଲ ଜବତ କରିଥିଲା। ଏ ନେଇ ପୋଲିସ ୨୨/୨୦ରେ ମାମଲା ରୁଜୁ ହୋଇଛି। ସେହିପରି ଅନ୍ୟଏକ ଟିମ୍ ମଧ୍ୟାହ୍ନରେ ଇନଫୋସିଟି ଥାନା ଅଞ୍ଚଳରେ ଚଢାଉ କରି ଖୋର୍ଦ୍ଧା ସଦର ଥାନା ଅଞ୍ଚଳର ପ୍ରଦୀପ୍ତ କୁମାର ବଳିଆରସିଂଙ୍କୁ ଗିରଫ କରିବା ସହ ତାଙ୍କ ନିକଟରୁ ୭ ଗ୍ରାମ ବ୍ରାଉନସୁଗାର, ୫ଶହ ଟଙ୍କା, ଗୋଟିଏ ମୋବାଇଲ ଫୋନ ଓ ଏକ ବାଇକ୍ ଜବତ କରିଥିଲା। ଏ ନେଇ ୧୩/୨୦ରେ ମାମଲା ରୁଜୁ ହୋଇଛି। ତୃତୀୟ ଘଟଣାକ୍ରମରେ କଟକ ଲାଲବାଗ ଥାନା ଅନ୍ତର୍ଗତ ଶୈଳବାଳା କଲେଜ ଅଞ୍ଚଳରେ କ୍ୟୁଏଟି ଓ ପୋଲିସ ଚଢଉ କରି ୨ ଅଭିଯୁକ୍ତଙ୍କୁ ଗିରଫ କରିବା ସହ ୪୬ ଗ୍ରାମ ବ୍ରାଉନସୁଗାର , ୨ ମୋବାଇଲ ଫୋନ୍ ଓ ୨ ବାଇକ ଜବତ କରିଥିଲା। ଗିରଫ ଅଭିଯୁକ୍ତମାନେ ହେଲେ ବାଲେଶ୍ୱର ସିମୁଳିଆ ଅଞ୍ଚଳର ଯଦୁବକ୍ର ଶାହା ଓ ଭୁବନେଶ୍ୱର ଲକ୍ଷ୍ମୀସାଗର ଥାନା ଅଞ୍ଚଳର ଶେଖ ଜାମସେଦ। ଏ ନେଇ ପୋଲିସ ୨୨/୧୦ରେ ମାମଲା ରୁଜୁ ହୋଇଥିବାବେଳେ ସମସ୍ତ ୩ ମାମଲାରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ଖାରଜ ହେବାରୁ ୫ ଅଭିଯୁକ୍ତଙ୍କୁ ବିଚାର ବିଭାଗୀୟ ଜେଲ୍ ହାଜତକୁ ପଠାଇ ଦିଆଯାଇଛି।
