କଟକ ଅଫିସ୍,୧୦ା୪: କରୋନା ଭୂତାଣୁର ମୁକାବିଲା ପାଇଁ ସାରା ରାଜ୍ୟରେ ଲକ୍ଡାଉନ୍ ଜାରି କରାଯାଇଛି। ଗାଡ଼ି ଚଳାଚଳ ଉପରେ ଅନେକ ପ୍ରକାର କଟକଣା ରହିଛି। ଫଳରେ ପରିବା ଏବଂ ଅନ୍ୟାନ୍ୟ ଆବଶ୍ୟକ ସାମଗ୍ରୀ କିଣିବା ପାଇଁ ଲୋକମାନେ ହଇରାଣ ହେଉଛନ୍ତି। ଦୁଇ ଚକିଆ ଗାଡ଼ି ଚଳାଚଳ ଉପରେ ସଂପୂର୍ଣ୍ଣ କଟକଣା ନ ଲଗାଇ, ଏଥିରେ କୋହଳ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ। ଏକ ଜନସ୍ବାର୍ଥ ମାମଲାର ଶୁଣାଣି କରି କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ କୁମାରୀ ସଞ୍ଜୁ ପଣ୍ଡା ଏବଂ ଜଷ୍ଟିସ୍ ବିଶ୍ୱନାଥ ରଥଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି । ଏଥି ସହ ସୁପ୍ରମ୍କୋର୍ଟଙ୍କ ନିର୍ଦ୍ଦେଶ ମୁତାବକ ରାଜ୍ୟରେ କରୋନା ଭୂତାଣୁ ପରୀକ୍ଷାକୁ ସଂପୂର୍ଣ୍ଣ ମାଗଣା କରିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଛି । ଏକ ବିଜ୍ଞପ୍ତି ଜାରି କରି ରାଜ୍ୟ ସରକାର ତୁରନ୍ତ ଏଦିଗରେ ପଦକ୍ଷେପ ନେବାକୁ ନିର୍ଦ୍ଦେଶରେ କୁହାଯାଇଛି ।
ନିର୍ଦ୍ଦେଶରେ ଉଲ୍ଲେଖ ରହିଛି ଯେ, ଲକ୍ଡାଉନ୍ ଅବଧି ମଧ୍ୟରେ ପୋଲିସ ପକ୍ଷରୁ ରାଜ୍ୟର ଅନେକ ସ୍ଥାନରେ ବହୁ ସଂଖ୍ୟାରେ ଗାଡ଼ି ଜବତ କରୁଥିବା ନଜରକୁ ଆସିଛି। ରାଜ୍ୟରେ ଚାଲିବା ଦୂରତା ମଧ୍ୟରେ ପନିପରିବା, ଔଷଧ ଏବଂ ଅନ୍ୟାନ୍ୟ ବ୍ୟବହାର ଯୋଗ୍ୟ ସାମଗ୍ରୀର ଉପଲବ୍ଧତା ନାହିଁ। ବିଶେଷକରି ବରିଷ୍ଠ ନାଗରିକ, ମହିଳା ଏବଂ ଭିନ୍ନକ୍ଷମାନେ ଚାଲିଚାଲି ଯାଇ ଅତ୍ୟାବଶ୍ୟକ ସାମଗ୍ରୀ କିଣିବାରେ ସମସ୍ୟାର ସମ୍ମୁଖିନ ହେଉଛନ୍ତି। ଅନେକ ସମୟରେ ଦୂର ଜାଗାକୁ ଯିବାକୁ ପଡ଼ୁଛି। ଲୋକଙ୍କ ପାଖରେ ଏସବୁ ସାମଗ୍ରୀ ଯୋଗାଇଦେବା ପାଇଁ ଠୋସ୍ ବ୍ୟବସ୍ଥା କରିବା ପୂର୍ବରୁ ଦୁଇ ଚକିଆ ଯାନ ବ୍ୟବହାର ଉପରେ ସଂପୂର୍ଣ୍ଣ କଟକଣା ଜାରି କରାଯାଇପାରିବ ନାହିଁ। କଟକଣାକୁ କିଛି ମାତ୍ରାରେ କୋହଳ କରାଯାଉ। ହେଲେ ଯେଉଁମାନେ ଦୁଇ ଚକିଆ ଯାନ ବ୍ୟବହାର କରିବେ, ସେମାନେ ସନ୍ତୋଷଜନକ କାରଣ ଦର୍ଶାଇବା ଆବଶ୍ୟକ। ଲକ୍ଡାଉନ୍ ପାଇଁ ସାଧାରଣ ଜନଜୀବନ ଗଭୀର ଭାବେ ପ୍ରଭାବିତ ହେଉଛି। ଅତ୍ୟାବଶ୍ୟକ ସାମଗ୍ରୀ ଯୋଗାଣ ନେଇ କୌଣସି ବ୍ୟବସ୍ଥା କରିବା ପରିବର୍ତ୍ତେ ଦୁଇ ଚକିଆ ଯାନ କଟକଣା, ଲୋକଙ୍କ ଅସୁବିଧାକୁ
ଆହୁରି ବଢ଼ାଇଦେବ। ମାନବିକତା ଦୃଷ୍ଟିରୁ ରାଜ୍ୟ ସରକାର ଏବଂ ପୋଲିସ ମହାନିର୍ଦ୍ଦେଶକ ଏହି ସମସ୍ୟାକୁ ହୃଦୟଙ୍ଗମ କରିବା ସହ ଉଚିତ ପଦକ୍ଷେପ ନେବେ ବୋଲି ଆଶା କରାଯାଉଛି। ଏଥି ସହ ଏହା ମଧ୍ୟ ଆଶା କରାଯାଉଛି ଯେ, ଲୋକଙ୍କ ପାଖରେ ସମସ୍ତ ପ୍ରକାର ସାମଗ୍ରୀ ଯୋଗାଇବା ଦିଗରେ ସରକାର ଏମିତି ପଦକ୍ଷେପ ନେବେ, ଯାହା ଫଳରେ ଲୋକମାନଙ୍କୁ ଦୁଇ ଚକିଆ ଯାନ ବ୍ୟବହାର କରିବାକୁ ପଡ଼ିବ ନାହିଁ । ଯେଉଁ ଗାଡ଼ିଗୁଡ଼ିକ ପୋଲିସ ଦ୍ୱାରା ଜବତ ହୋଇଛି, ଗାଡ଼ି ମାଲିକଙ୍କ ଠାରୁ ଲିଖିତ ଆକାରରେ ଅଣ୍ଡରଟେକିଂ ଲେଖାଇ ଛାଡ଼ି ଦିଆଯାଉଛି । ଜବତ ଗାଡ଼ିଗୁଡ଼ିକୁ ମାଲିକମାନେ ଭବିଷ୍ୟତରେ ବ୍ୟବହାର କରିବେ ନାହିଁ ବୋଲି ଅଣ୍ଡରଟେକିଂରେ ଲେଖିବାକୁ ହେବ । ସରକାର ନିର୍ଦ୍ଦିଷ୍ଟ ଗାଇଡ୍ଲାଇନ୍ ଜାରି କରିବା ପୂର୍ବରୁ, ବିନା ଜରିମାନାରେ ତିନି ଥର ଏବଂ ଅଣ୍ଡରଟେକିଂ ଲେଖିବା ସତ୍ତ୍ୱେ ମାତ୍ର ଗୋଟିଏ ଥର ହିଁ ଜବତ ଗାଡ଼ିକୁ ଛଡ଼ାଯାଇ ପାରିବ । ଆଇନ୍ଜୀବୀ ବିଜୟ କୁମାର ରାଗଡ଼ାଙ୍କ ପକ୍ଷରୁ ଏହି ଜନସ୍ବାର୍ଥ ମାମଲା ରୁଜୁ କରାଯାଇଥିଲା ।
