ନୂଆଦିଲ୍ଲୀ,୧୧।୧୦: ଆଲୋକର ପର୍ବ ଦୀପାବଳିର ପୂର୍ବରୁ ଦେଶରେ ଅନ୍ଧାର ଘୋଟିବାକୁ ଯାଉଛି। ଦେଶରେ ବିଦ୍ୟୁତ ସଙ୍କଟ ଯୋଗୁ ଏଭଳି ପରିସ୍ଥିତି ସୃଷ୍ଟି ହେବାର ଆଶଙ୍କା ଦେଖାଦେଇଛି। ଭାରତର ୧୩୫ ତାପଜ ବିଦ୍ୟୁତ କେନ୍ଦ୍ର ରହିଛି। ଏଠାରେ କୋଇଲାରୁ ବିଦ୍ୟୁତ ଉତ୍ପାଦନ ହୁଏ, କିନ୍ତୁ ସେଥି ମଧ୍ୟରୁ ଅଧା କେନ୍ଦ୍ର ପାଖରେ ତିନି ଦିନରୁ କମ କୋଇଲା ଷ୍ଟକ ରହିଛି। ଭାରତର ପ୍ରାୟ ୭୦ ପ୍ରତିଶତ ବିଦ୍ୟୁତ୍ ଉତ୍ପାଦନ ତାପଜ କେନ୍ଦ୍ରରୁ ହୋଇଥାଏ। ଏକ୍ଷେତ୍ରରେ ଚାଇନା ପରେ ଭାରତ ବିଶ୍ୱରେ ଦ୍ୱିତୀୟ ସ୍ଥାନରେ ରହିଛି।
ଚାଇନାରେ ମଧ୍ୟ କୋଇଲା ସଙ୍କଟ ଦେଖାଦେଇଛି ଏବଂ ଏହାର ମୁକାବିଲା ପାଇଁ ଏବେ ବହୁ କାରଖାନା ଏବଂ ବିଦ୍ୟାଳୟଗୁଡ଼ିକ ବନ୍ଦ କରି ଦିଆଯାଇଛି। ଭାରତର ବିଦ୍ୟୁତ୍ ସଙ୍କଟ ସମ୍ପର୍କରେ କେନ୍ଦ୍ର ଶକ୍ତି ମନ୍ତ୍ରୀ ଆର.କେ ସିଂ ସୂଚନା ପ୍ରଦାନ କରିଛନ୍ତି ଯେ ଦେଶରେ କୋଇଲା ସଙ୍କଟ ନାହିଁ କିମ୍ବା ରହିବାର ଆଶଙ୍କା ନାହିଁ। ସେ କହିଛନ୍ତି ଯେ, ପ୍ରତିଦିନ କୋଇଲା ଷ୍ଟକ ଉପରେ ନଜର ରଖାଯାଉଛି। ଦେଶର କୌଣସି ଅସୁବିଧା ହେବନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କହିଛନ୍ତି।
ତେବେ କେତେକ ଗଣମାଧ୍ୟମ ରିପୋର୍ଟ ଅନୁସାରେ ୩ଟି ରାଜ୍ୟର ୨୦ରୁ ଅଧିକ ତାପଜ କେନ୍ଦ୍ର ବନ୍ଦ ରହିବାର ଆଶଙ୍କା ଦେଖା ଦେଇଛି। ଏଭଳି ସ୍ଥିତି ଜାରି ରହିଲେ ଅବସ୍ଥା ଅସମ୍ଭାଳ ହେବ ବୋଲି କୁହାଯାଉଛି।
