ନୂଆଦିଲ୍ଲୀ, ୧୨।୨: ଦିଲ୍ଲୀ ବିଧାନସଭା ନିର୍ବାଚନରେ ଆମ୍ ଆଦ୍ମୀ ପାର୍ଟି(ଏଏପି) ବହୁମତରେ ବିଜୟ ହାସଲ କରିଛି। ଦଳର ମୁଖ୍ୟ ଅରବିନ୍ଦ କେଜ୍ରିଓ୍ବାଲଙ୍କୁ ଚାରିଆଡୁ ଶୁଭେଚ୍ଛାର ସୁଅ ଛୁଟିଛି। ଏସବୁ ଭିତରେ ଭାଜପା ରାଷ୍ଟୀୟ ମହାସଚିବ କୈଳାସ ବିଜୟବର୍ଗୀୟ କେଜ୍ରିଓ୍ବାଲଙ୍କୁ ଉପଦେଶ ଦେଇ କହିଛନ୍ତି, ବଜରଙ୍ଗବାଲୀ କୃପାରୁ ଦିଲ୍ଲୀରେ ବିଜୟ ହାସଲ କରିଛନ୍ତି କେଜ୍ରିଓ୍ବାଲ। ତେଣୁ ଦିଲ୍ଲୀର ସ୍କୁଲ, ମଦ୍ରାସା ସମେତ ସମସ୍ତ ଶୈକ୍ଷିକ ଅନୁଷ୍ଠାନରେ ପିଲାଙ୍କୁ ହନୁମାନ ଚାଳିଶା ପଢାଯାଉ। ସେ ଟୁଇଟ କରି କେଜ୍ରିଓ୍ବାଲଙ୍କୁ ବିଜୟର ଶୁଭେଚ୍ଛା ଜଣାଇ କହିଛନ୍ତି, ହନୁମାନଜୀଙ୍କ ଶରଣରେ ଆସିଲେ ନିଶ୍ଚିତ ଆଶୀର୍ବାଦ ମିଳେ। ତେଣୁ ଏବେ ସମୟ ଆସିଯାଇଛି ଦିଲ୍ଲୀର ସବୁ ସ୍କୁଲରେ ହନୁମାନ ଚାଳିଶା ପାଠ କରାଯାଉ। ବଜରଙ୍ଗବାଲୀଙ୍କ କୃପାରୁ ଦିଲ୍ଲୀର ପିଲାମାନେ କାହିଁକି ବଞ୍ଚିତ ହେବେ ବୋଲି ସେ କହିଛନ୍ତି। ସୂଚନାଯୋଗ୍ୟ, ନିର୍ବାଚନ ପୂର୍ବରୁ ଏକ ସାକ୍ଷାତକାରରେ କେଜ୍ରିଓ୍ବାଲ ହନୁମାନ ଚାଳିଶା ପାଠ କରିଥିଲେ। ଏହାକୁ ନେଇ ରାଜନୀତି ଆରମ୍ଭ ହୋଇଥିଲା।
