ନୂଆଦିଲ୍ଲୀ,୨୨।୮: ଚଳିତ ବର୍ଷ କମ୍ ଲୋକଙ୍କ ଦରମା ସେମାନଙ୍କ ମନମୁତାବକ ବଢ଼ିଛି। ଅର୍ଥନୀତିର ଅବସ୍ଥା ବିଗିଡିଯିବା କାରଣରୁ ଚଳିତ ବର୍ଷ ଘରୋଇ କମ୍ପାନୀଗୁଡ଼ିକ ହାତ ଖୋଲା ଦରମା ବଢ଼ାଇନାହାନ୍ତି। ସେଣ୍ଟର ଫର୍ ମନିଟରିଂ ଅଫ୍ ଇଣ୍ଡିଆନ ଇକୋନୋମୀ(ସିଏମ୍ଆଇଇ) ତଥ୍ୟରୁ ଜଣାପଡୁଛି ଯେ, ଘରୋଇ ସେକ୍ଟରରେ ଚଳିତ ବର୍ଷ ଦରମା ବୃଦ୍ଧି ୧୦ ବର୍ଷର ସର୍ବନିମ୍ନ ସ୍ତରରେ ରହିଛି। ସିଏମ୍ଆଇଇ ଡାଟାବେସ୍ର ବିଶ୍ଲେଷଣରୁ ଜଣାପଡିଛି ଯେ, ଆୟ ହ୍ରାସ ପାଇବା କାରଣରୁ ଘରୋଇ ସେକ୍ଟରରେ ଦରମା ବୃଦ୍ଧି ଉତ୍ସାହଜନକ ନୁହେଁ। ଏହା ୨୦୦୯-୧୦ ପରେ ସବୁଠାରୁ ଖରାପ ସ୍ଥିତି ରହିଛି। ଏଥିସହିତ ଅନ୍ୟ ଗୁରୁତ୍ୱପୂର୍ଣ୍ଣ କ୍ଷେତ୍ରର ପ୍ରାସଙ୍ଗିକ ଡାଟା ଭାରତୀୟ ଅର୍ଥନୀତି ଏବଂ କମ୍ପାନୀଗୁଡ଼ିକରେ କାମ କରୁଥିବା କର୍ମଚାରୀଙ୍କ ସ୍ପଷ୍ଟ ଚିତ୍ର ଉଜାଗର କରୁଛି।
ବେକାରି ସଂଖ୍ୟା ଦୁଇଗୁଣା ବଢ଼ିଛି
ପିଏଲ୍ଏଫ୍ଏସ୍ର ରିପୋର୍ଟ ଅନୁଯାୟୀ, ୨୦୧୧-୧୨ ବର୍ଷରେ ବେକାରି ସଂଖ୍ୟା ୧.୦୮ କୋଟି ଥିଲା, ଯାହା କି ୨୦୧୭-୧୮ରେ ଦୁଇଗୁଣା ବଢ଼ି ୨.୮୫ କୋଟିରେ ପହଞ୍ଚତ୍ଗଲାଣି। ୧୯୯୯-୨୦୦୦ ତଥା ୨୦୧୧-୧୨ ମଧ୍ୟରେ ବେକାରି ସଂଖ୍ୟା ପ୍ରାୟ ୧ କୋଟି ଥିଲା। ବର୍ଷ ୨୦୧୧-୧୨ ରୁ ୨୦୧୭-୧୮ ମଧ୍ୟରେ ୧.୮ କୋଟି ଶ୍ରମ ବଳଙ୍କୁ ସାମିଲ କରାଯାଇଥିଲା। ଏହି ସମୟରେ ମାତ୍ର ୫ ଲକ୍ଷ ନିଯୁକ୍ତି ସୃଷ୍ଟି ହୋଇପାରିଥିଲା। ଯାହାକୁ ବେକାରି ବୃଦ୍ଧିର ସବୁଠାରୁ ବଡ଼ କାରଣ କୁହାଯାଉଛି।
ଧିମା ଅର୍ଥନୀତି ଦରମା ବୃଦ୍ଧିରେ ବାଧକ
ସିଏମ୍ଆଇଇର ଡାଟା ମୁତାବକ, ଦେଶରେ କାରବାର ଧିମା ପଡିବା କାରଣରୁ କର୍ପୋରେଟ ଇଣ୍ଡିଆର ଦରମା ବୃଦ୍ଧିରେ ବଡ଼ ବାଧକ ହୋଇଛି। ଡାଟା ଅନୁଯାୟୀ, ବର୍ଷ ୨୦୧୨-୧୩ ପରେ ୪ ଆର୍ଥିକ ବର୍ଷରେ କମ୍ପାନୀଗୁଡ଼ିକର ଆୟ ହ୍ରାସ ପାଇଛି।
ଅର୍ଥନୀତିକୁ ଦୋହରା ଝଟକା
ବେକାରି ବୃଦ୍ଧି ସହିତ ଦରମା କମ୍ ବଢ଼ିବା ଦେଶର ରୋଜଗାର ଦୃଶ୍ୟପଟ ଦେଖିଲେ ଅର୍ଥନୀତିକୁ ଦୋହରା ଝଟ୍କା ଦେଇଛି। ପିରିଓଡିକ୍ ଲେବର ଫୋର୍ସ ସର୍ଭେ ୨୦୧୭-୧୮ ଅନୁଯାୟୀ ଦେଶରେ ବେକାରି ହାର ବର୍ତ୍ତମାନ ୬.୧% ରହିଛି, ଯାହା କି ଅଦ୍ୟାବଧି ସର୍ବାଧିକ ସ୍ତର କୁହାଯାଉଛି। ବର୍ତ୍ତମାନ ପୁରୁଷଙ୍କ ବେକାରି ୧୯୭୭-୭୮ ପରେ ସର୍ବାଧିକ ଉଚ୍ଚ ସ୍ତରରେ ରହିଛି ଓ ୧୯୮୩ ପରେ ମହିଳାଙ୍କ କ୍ଷେତ୍ରରେ ସର୍ବୋଚ୍ଚ ସ୍ତରରେ ରହିଛି। ଅନ୍ୟପକ୍ଷରେ କେୟାର ରେଟିଂର ସର୍ଭେ ଅନୁଯାୟୀ, ଦେଶରେ ନିଯୁକ୍ତି ଦୃଶ୍ୟପଟ ଦିନକୁ ଦିନ ଖରାପ ହୋଇଚାଲିଛି। ଏହାକୁ ଗ୍ରହଣ କରାଗଲେ ଅର୍ଥନୀତି ଲାଗି ଏହା ତୃତୀୟ ଝଟ୍କା କୁହାଯାଇପାରେ।
ରୋଜଗାର ଦୃଶ୍ୟପଟ ଅସ୍ପଷ୍ଟ
ବ୍ୟାଙ୍କ, ବୀମା, ଅଟୋମୋବାଇଲ, ଲଜିଷ୍ଟିକ୍ସ ଓ ଇନ୍ଫ୍ରାଷ୍ଟ୍ରକ୍ଚର କମ୍ପାନୀଗୁଡ଼ିକ ନିଯୁକ୍ତି ସଂଖ୍ୟା ହ୍ରାସ କରିସାରିଛନ୍ତି। ଅଧିକାଂଶ ସେକ୍ଟରରେ ଭର୍ତ୍ତି ଗତିବିଧି ଧିମା ହୋଇଗଲାଣି। ଏଥିରୁ ଏହା ସ୍ପଷ୍ଟ ହେଉଛି ଯେ, ଦେଶରେ ନିଯୁକ୍ତି ଦୃଶ୍ୟପଟ ବେଶ୍ ଅସ୍ପଷ୍ଟ ହୋଇଛି।
