ଅନୁଗୋଳ ସହର, ୪।୨
ଅନୁଗୋଳ ସହର ହୁଲୁରିସିଂହାଠାରେ ନିର୍ମାଣ ହେଉଥିବା ଏକ ଆପାର୍ଟମେଣ୍ଟକୁ ନେଇ ଅଭିଯୋଗ ଆସିବା ପରେ ତାଳଚେର-ଅନୁଗୋଳ-ମେରାମଣ୍ଡଳି ଉନ୍ନୟନ କର୍ତ୍ତୃପକ୍ଷ (ତାମଡା)ଙ୍କ ପକ୍ଷରୁ ଜିଲାପାଳଙ୍କୁ ରିପୋର୍ଟ ପ୍ରଦାନ କରାଯାଇଛି। ଗତ ଜାନୁୟାରୀ ୧୪ରେ ଉକ୍ତ ଅଭିଯୋଗର ତଦନ୍ତ କରି ୩ ଦିନ ମଧ୍ୟରେ ରିପୋର୍ଟ ପ୍ରଦାନ ପାଇଁ ଜିଲାପାଳଙ୍କ ପକ୍ଷରୁ ଚିଠି କରାଯାଇଥିଲା। କିନ୍ତୁ ତାମଡା ପକ୍ଷରୁ ୨୦ ଦିନ ପରେ ସୋମବାର ରିପୋର୍ଟ ଦିଆଯାଇଥିବାରୁ ଏହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଉକ୍ତ ରିପୋର୍ଟରେ ତାମଡା ପକ୍ଷରୁ ଦର୍ଶାଯାଇଛି ଯେ, ଆପାର୍ଟମେଣ୍ଟରେ କାର୍ଯ୍ୟ କରିବା ପାଇଁ ଅନୁମତି ୨୦୧୫ ଜୁନ ୧ରୁ ଶେଷ ହୋଇଯାଇଛି। ଉକ୍ତ ଘରୋଇ ସଂସ୍ଥା କର୍ତ୍ତୃପକ୍ଷ ଆପାର୍ଟମେଣ୍ଟର ବି ଓ ସି ବ୍ଲକ କାର୍ଯ୍ୟ ସାରି ଲୋକମାନଙ୍କୁ ରହିବା ପାଇଁ ଦେଇଥିବାବେଳେ ଏହି ବ୍ଲକ କାର୍ଯ୍ୟ କରି ନ ଥିଲେ। ନୂତନ ନିର୍ମାଣ ପାଇଁ କୌଣସି ଅନୁମତି ମଧ୍ୟ ନେଇ ନ ଥିଲେ। ଫଳରେ ଅର୍ଡର ଅଣ୍ଡର ସବ୍ସେକ୍ସନ୍ (ଆଇ) ଅଫ୍ ସେକ୍ସନ ୯୨ ଅଫ୍ ଦି ଓଡ଼ିଶା ଡେଭଲପମେଣ୍ଟ ଅଥରଟି ଆକ୍ଟ ୧୯୯୨ ଅନୁଯାୟୀ କାର୍ଯ୍ୟ ବନ୍ଦ କରିବାକୁ ଡିସେମ୍ବର ୨୭ରେ ନୋଟିସ୍ ଦିଆଯାଇଥିଲା। ସେହିପରି ଅଣ୍ଡର ସବ୍ସେକ୍ସନ (ଆଇ) ଅଫ୍ ସେକ୍ସନ ୯୧ ଅଫ୍ ଦି ଓଡ଼ିଶା ଡେଭେଲପମେଣ୍ଟ ଅଥରଟି ଆକ୍ଟ ୧୯୮୨ ଅନୁଯାୟୀ କାରଣ ଦର୍ଶାଅ ନୋଟିସ୍ ଦିଆଯାଇଥିଲା। କିନ୍ତୁ ଉକ୍ତ ଦୁଇଟି ନୋଟିସ୍କୁ ଆପାର୍ଟମେଣ୍ଟର ଡାଇରେକ୍ଟର ଖାତିର କରି ନ ଥିବାରୁ ଏ ନେଇ ତାମଡା ପକ୍ଷରୁ ଅଣ୍ଡର ସବ୍ସେକ୍ସନ (ଆଇ) ଅଫ୍ ସେକ୍ସନ ୯୨(୨) ଅଫ୍ ଦି ଓଡ଼ିଶା ଡେଭଲପ୍ମେଣ୍ଟ ଅଥରଟି ଆକ୍ଟ ୧୯୮୨ ଅନୁଯାୟୀ ଅନୁଗୋଳ ଥାନାରେ ଏକ ମାମଲା ରୁଜୁ କରାଯିବା ପାଇଁ ଆବେଦନ କରାଯିବ। ଆପାର୍ଟମେଣ୍ଟ ପକ୍ଷରୁ କୌଣସି ପ୍ଲାନ୍ ଏଷ୍ଟିମେଣ୍ଟ ତାମଡାରେ ଦିଆଯାଇ ନ ଥିବାବେଳେ ଅଭିଯୋଗ ପରେ ଜାନୁୟାରୀ ୨୨ରେ ଆପାର୍ଟମେଣ୍ଟର ଡାଇରେକ୍ଟର ପ୍ଲାନ ଆପ୍ରୁଭାଲ ପାଇଁ ୩୯,୭୭୦ ଟଙ୍କା ଚେକ୍ ମାଧ୍ୟମରେ ଜମା କରିଛନ୍ତି। ଏ ସମ୍ପର୍କରେ ତାମଡା ପ୍ଲାନିଂ ବିଭାଗର ନାରାୟଣ ସାହୁ କହିଛନ୍ତି, ଜାନୁୟାରୀ ୨୨ରେ ଆପ୍ରୁଭାଲ ପାଇଁ ଆପାର୍ଟମେଣ୍ଟ ଡାଇରେକ୍ଟଙ୍କ ପକ୍ଷରୁ ଟଙ୍କା ଜମା କରାଯାଇଛି। ବର୍ତ୍ତମାନ ଅନୁମତି ପାଇଁ ଡକ୍ୟୁମେଣ୍ଟ ପ୍ରସ୍ତୁତ ଚାଲିଛି। ଜିଲାପାଳଙ୍କ ନିକଟରେ ରିପୋର୍ଟ ପ୍ରଦାନ କରିବା ସହିତ ଅନୁଗୋଳ ଥାନାରେ ଅଭିଯୋଗ କରାଯିବ। ତାମଡାର ସେକ୍ରେଟାରି ତଥା ଆସିଷ୍ଟାଣ୍ଟ କଲେକ୍ଟର ବୈତୁରା ଦୀପ କହିଛନ୍ତି, ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏ ନେଇ ଅଧିକ ତଥ୍ୟ ଜିଲାପାଳ ପ୍ରଦାନ କରିପାରିବେ। ଜିଲା ସହକାରୀ ଅଗ୍ନିଶମ ବିଭାଗ ଅଧିକାରୀ ସର୍ବେଶ୍ୱର ବରାଳ କହିଛନ୍ତି, ଆପାର୍ଟମେଣ୍ଟ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ଆବେଦନ ଅଗ୍ନିଶମ ବିଭାଗ ନିକଟରେ କରାଯାଇ ନାହିଁ କି କୌଣସି ଅନୁମତିପତ୍ର ପ୍ରଦାନ କରାଯାଇ ନାହିଁ।
