ଅନୁଗୋଳ ଅଫିସ, ୪।୯-ଅନୁଗୋଳ ପୋଲିସ ସୋମବାର ବିଳମ୍ବିତ ରାତିରେ ଏକ ଡକାୟତ ଗ୍ୟାଙ୍ଗକୁ କାବୁ କରିଛି। ଗ୍ୟାଙ୍ଗର ୭ ସଦସ୍ୟଙ୍କୁ ଗିରଫ କରାଯାଇଥିବା ବେଳେ ସେମାନଙ୍କ ନିକଟରୁ ଦୁଇଟି ଭୁଜାଲି, ୨ ଖଣ୍ଡା, ୬ ମୋବାଇଲ, ଗୋଟିଏ ମୋଟର ସାଇକେଲ ସହ ଏକ ସ୍କୁଟି ଜବତ କରାଯାଇଛି। ଦୁର୍ବୃତ୍ତମାନେ ତୁରଙ୍ଗସ୍ଥିତ ଇନ୍ଦ୍ରାଣୀ ନଗରଠାରେ ଡକାୟତି ପାଇଁ ଯୋଜନା କରୁଥିବା ଖବରପାଇ ପୋଲିସ ଚଢ଼ାଉ କରିଥିଲା। ହେଲେ ଘଟଣାସ୍ଥଳରୁ ଜଣେ ଫେରାର ହୋଇଯାଇଥିବା ପୋଲିସ ସୂଚନା ଦେଇଛି।
ପୋଲିସ କହିଛି, ଗିରଫ ୭ ଦୁର୍ବୃତ୍ତ ପଞ୍ଚମହଲା ଅଞ୍ଚଳର ଅନିଲ ବେହେରା(୨୫), ରନ୍ତଲେଇର ଜଗା ଓରଫ ଜଗନ ସେନାପତି(୨୩), ତୁରଙ୍ଗ ବିକାଶ ନଗରର ଅଜୟକାନ୍ତ କର(୨୨), ତୁରଙ୍ଗ କାମନାସାହିର ଆଶିଷ ନାୟକ(୨୩), ହେମସୁରପଡ଼ା ମୋଚିସାହିର ପାପୁଲୁ ଓରଫ ରୀତିକ୍ ବାରିକ(୧୯), ହେମସୁରପଡ଼ାର ଦୀପକ ମହାନ୍ତି(୩୨) ଓ ହେମସୁରପଡ଼ା ହରିଜନସାହିର ଠୁରା ଓରଫ ଦେବାଶିଷ ନାଏକ(୨୨) ରାଜପଥରେ ଟ୍ରକ୍ଗୁଡ଼ିକରୁ ଲୁଟ୍ପାଟ କରିବା ପାଇଁ ଯୋଜନା କରୁଥିଲେ। ଏଥିସହ ପାର୍ବଣ ସମୟରେ ଏମାନେ ବିଭିନ୍ନ ସ୍ଥାନରେ ଲୁଟ୍ ଯୋଜନା ରଖିଥିଲେ। ସେମାନଙ୍କ ନାମରେ ପୂର୍ବରୁ ଜିଲାର ବିଭିନ୍ନ ଥାନାରେ ସଙ୍ଗିନ ମାମଲା ରହିଛି। ନଂ. ୬୮୩/୧୯ରେ ମାମଲା ରୁଜୁ କରାଯାଇ ସମସ୍ତଙ୍କୁ କୋର୍ଟ ଚାଲାଣ କରାଯାଇଛି। ଏସ୍ଆଇ ସତ୍ୟ ରଞ୍ଜନ ଲେଙ୍କା ଓ ବିପ୍ଳବ ସାହୁଙ୍କ ନେତୃତ୍ୱରେ ଏଏସ୍ଆଇ ଜୟଚନ୍ଦ୍ର ସାହୁ, ପ୍ରଶାନ୍ତ କୁମାର ସାହୁଙ୍କ ସହ ଅନ୍ୟ କର୍ମଚାରୀମାନେ ଏହି ଚଢ଼ାଉ କରିଥିବା ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସୂଚନା ଦେଇଛନ୍ତି।
