ଯୋଡ଼ା,୭।୮(ଡି.ଏନ୍.ଏ.): କେନ୍ଦୁଝର ଜିଲା ଯୋଡ଼ା ବ୍ଲକ ଜଲହରି ପଞ୍ଚାୟତର ଜଲହରିଠାରେ ଟ୍ରାନ୍ସଫର୍ମର ଅଚଳ ଯୋଗୁ ୧୫ ଦିନ ଧରି ଗ୍ରାମବାସୀ ଅନ୍ଧାରରେ ରହିଥିବା ଅଭିଯୋଗ କରିଛନ୍ତି। ଏନେଇ ଗ୍ରାମବାସୀ ବିଦ୍ୟୁତ ବିଭାଗ କର୍ତ୍ତୃପକ୍ଷଙ୍କୁ ଲିଖିତ ଭାବେ ଜଣାଇଥିବା ପ୍ରକାଶ କରିଛନ୍ତି। ଜଲହରି, ପାତ୍ର ସାହି, ମୁଣ୍ଡା ବସ୍ତିରେ ଦୀର୍ଘ ୧୫ ଦିନ ହେଲା ଟ୍ରାନ୍ସଫର୍ମରଟି ଅଚଳ ହୋଇପଡ଼ିଛି। ଏଥିଯୋଗୁ ଗ୍ରାମବାସୀ ଅନ୍ଧାରରେ ରହି ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ପିଲାମାନଙ୍କର ପାଠପଢ଼ାରେ ବାଧା ସୃଷ୍ଟି ହେବା ସହିତ ଜଙ୍ଗଲ ନିକଟବର୍ତ୍ତୀ ଗ୍ରାମ ହୋଇଥିବାରୁ ବିଭିନ୍ନ ସମୟରେ ହାତୀ ଭୟ ମଧ୍ୟ ରହୁଛି ା ଫଳରେ ସନ୍ଧ୍ୟା ହେଲେ ଲୋକେ ଘରୁ ବାହାରକୁ ବାହାରୁ ନାହାନ୍ତି। ବିଦ୍ୟୁତ ସଂଯୋଗ ନ ଥିବାରୁ ମଟର ପମ୍ପ ଚାଲୁନାହିଁ। ଫଳରେ ଲୋକେ ପାନୀୟ ଜଳ ପାଇଁ ନାନା ସମସ୍ୟା ଭୋଗ କରୁଛନ୍ତି। ଏ ନେଇ ଗ୍ରାମବାସୀ ଲିଖିତ ଭାବେ ଯୋଡ଼ା ବିଦ୍ୟୁତ ବିଭାଗ ଏସ୍ଡିଓଙ୍କୁ ଜଣାଇଥିଲେ ହେଁ, କୌଣସି ନିର୍ଭର ପ୍ରତିଶ୍ରୁତି ନ ପାଇବାରୁ ଅସନ୍ତୋଷ ଦେଖାଥିବା ନାଏବ ସରପଞ୍ଚ ସଞ୍ଜୟ କୁମାର ପାତ୍ର, ଗୋପାଳ ପାତ୍ର, ବଳରାମ ପାତ୍ର, ନରେଶ ଦାସ, ବାସୁଦେବ ଦାସ, ଭଦ୍ର ମୁଣ୍ଡା, ସୁଶୀଲ ମୁଣ୍ଡା ପ୍ରମୁଖ ପ୍ରକାଶ କରିଛନ୍ତ। ତୁରନ୍ତ ଅଚଳ ଟ୍ରାନ୍ସଫର୍ମର ମରାମତି କରି ଗ୍ରାମରେ ବିଦ୍ୟୁତ ସଂଯୋଗ ଦେବାକୁ ଗ୍ରାମବାସୀ ଦାବି କରିଛନ୍ତି।
