ଭୁବନେଶ୍ୱର, ୨୧।୧୧(ବ୍ୟୁରୋ): ଚଳିତ ଖରିଫ ଧାନ ସଂଗ୍ରହ ପ୍ରକ୍ରିୟାରେ ରାଜ୍ୟ ସରକାରଙ୍କ ପକ୍ଷରୁ ଟୋକନ୍ ବ୍ୟବସ୍ଥାକୁ ବାଧ୍ୟତାମୂଳକ କରାଯିବା ପରେ ଚାଷୀମାନେ ଏହାକୁ ବିରୋଧ କରୁଛନ୍ତି। ବରଗଡ଼, ସୋନପୁର, ସମ୍ବଲପୁର, ବଲାଙ୍ଗୀର ଜିଲାର ଚାଷୀମାନେ ଆନ୍ଦୋଳନକୁ ଓହ୍ଲାଇଥିବା ବେଳେ ଭୁବନେଶ୍ୱରରେ ମଧ୍ୟ ଚାଷୀମାନେ ପ୍ରତିବାଦ କରିଛନ୍ତି। ନବ ନିର୍ମାଣ କୃଷକ ସଂଗଠନ ପକ୍ଷରୁ ଗୁରୁବାର ପିଏମ୍ଜିରୁ ନବୀନ ନିବାସ ଯାଏ ଶୋଭାଯାତ୍ରା କରାଯାଇଥିଲା। ତେବେ ଶିଶୁଭବନ ଛକରେ ପୋଲିସ ଚାଷୀଙ୍କୁ ଅଟକାଇଥିଲା। ଏହି ସମୟରେ ପୋଲିସ-ଚାଷୀଙ୍କ ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା। ଏପରିକି ଚାଷୀ ନେତା ଅକ୍ଷୟ କୁମାର ଓ ଶେଷଦେବ ନନ୍ଦଙ୍କ ସମେତ ବହୁ ସଂଖ୍ୟକ ଚାଷୀଙ୍କୁ ଅଟକ ରଖିଯାଇଛି।
ଏନେଇ ନବ ନିର୍ମାଣ କୃଷକ ସଂଗଠନର ଆବାହକ ଅକ୍ଷୟ କୁମାର କହିଛନ୍ତି, ‘ପ୍ରାଇସ୍, ପ୍ରେଷ୍ଟିଜ୍ ଓ ପେନ୍ସନ ଲାଗି ୧୦ ବର୍ଷ ଧରି ଆନ୍ଦୋଳନ ଜାରି ରହିଛି। ପଶ୍ଚିମ ଓଡ଼ିଶାର ଚାଷୀ ଏବେ ଟୋକନ୍ ପ୍ରତ୍ୟାହାର ପାଇଁ ଆନ୍ଦୋଳନ କରୁଛନ୍ତି। ଏହା ପଶ୍ଚିମ ଓଡ଼ିଶାର ଆନ୍ଦୋଳନ ନୁହେଁ, ପୂରା ଓଡ଼ିଶାର ଆନ୍ଦୋଳନ। ସରକାର ଚାରି ଦିନ ହେବ ତାହା ଶୁଣୁ ନ ଥିବାରୁ ସ୍ମାରକ ଦେବାକୁ ଆସିଥିବା ସେ କହିଛନ୍ତି।
