ଭୁବନେଶ୍ୱର, ୧୭।୧୧(ବ୍ୟୁରୋ):କୋଭିଡ୍ ପରିଚାଳନା କ୍ଷେତ୍ରରେ ବିଶ୍ୱ ସ୍ତରରେ ପ୍ରଶଂସା ପାଇଥିବା ଓଡ଼ିଶା ପୁଣି ଏକ ମାଇଲଖୁଣ୍ଟ ଅତିକ୍ରମ କରିଛି। କୋଭିଡ୍ ଟିକାକରଣରେ ଜାତୀୟ ହାରଠାରୁ ରାଜ୍ୟ ହାର ଅଧିକ ରହିଛି। ଜାତୀୟ ହାର ୭୯.୮ ପ୍ରତିଶତ ଥିବାବେଳେ ଓଡ଼ିଶାରେ ୮୨.୪ ପ୍ରତିଶତ ଟିକାକରଣ ହୋଇଛି। ମଙ୍ଗଳବାର ରାଜ୍ୟର ଟିକାକରଣକୁ ନେଇ ହୋଇଥିବା ଉଚ୍ଚସ୍ତରୀୟ ସମୀକ୍ଷା ବୈଠକରୁ ଏହି ସୂଚନା ମିଳିଛି।
ବୈଠକରେ ଅଧ୍ୟକ୍ଷତା କରି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଲେ, ଟିକାକରଣକୁ ଅଧିକ ବ୍ୟାପକ କରି ସମ୍ଭାବ୍ୟ ତୃତୀୟ ଲହରର ମୁକାବିଲା ନିମନ୍ତେ ପୂର୍ଣ୍ଣ ପ୍ରସ୍ତୁତ ରହିବା ଏକାନ୍ତ ଆବଶ୍ୟକ। କୋଭିଡ୍ ଟିକାକରଣରେ ଓଡ଼ିଶା ଏକ ଆଗୁଆ ରାଜ୍ୟ ଭାବେ ଅଭିଯାନ ଜାରି ରଖିଛି। ଜାତୀୟ ଟିକାକରଣ ହାର ତୁଳନାରେ ଓଡ଼ିଶା ଆଗରେ ଅଛି। ଜିଲାୱାରି ସ୍ଥିତିର ସମୀକ୍ଷା କରି ପଞ୍ଚାୟତ ଓ ଗ୍ରାମସ୍ତରରେ ଟିକାକରଣକୁ ଅଧିକ ସଘନ ଓ ତ୍ୱରାନ୍ବିତ କରିବା ପାଇଁ ମୁଖ୍ୟ ଶାସନ ସଚିବ ସବୁ ଜିଲାପାଳମାନଙ୍କୁ ପରାମର୍ଶ ଦେଇଛନ୍ତି। ଡିସେମ୍ବର ଶେଷ ସୁଦ୍ଧା ପ୍ରଥମ ଡୋଜ୍ ଟିକାକରଣକୁ ଶତ ପ୍ରତିଶତ କରିବା ପାଇଁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି। ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ରାଜ କୁମାର ଶର୍ମା କହିଲେ, ଚଳିତ ମାସ ୧୩ ତାରିଖ ସୁଦ୍ଧା ଓଡ଼ିଶାରେ ୧୮ ବର୍ଷରୁ ଊର୍ଦ୍ଧ୍ୱ ବୟସର ୪.୦୩ କୋଟିରୁ ଅଧିକ ଲୋକ ଟିକା ନେଇଛନ୍ତି। ସେଥିମଧ୍ୟରୁ ୨,୬୮,୦୪,୭୫୫ ଜଣଙ୍କୁ ପ୍ରଥମ ଡୋଜ୍ ଓ ୧,୩୪,୯୬,୦୫୯ ଜଣଙ୍କୁ ଦ୍ୱିତୀୟ ଡୋଜ୍ ଦିଆଯାଇଛି। ଏହି ବର୍ଗରେ ଟିକାକରଣ ହାର ରାଜ୍ୟରେ ୮୨.୪% ରହିଥିବାବେଳେ ଜାତୀୟସ୍ତରରେ ୭୯.୮% ରହିଛି। ସେହିପରି ଏହି ସମୟ ମଧ୍ୟରେ ଦ୍ୱିତୀୟ ଡୋଜ୍ ଟିକାକରଣ ଜାତୀୟସ୍ତରରେ ୩୮.୪% ଥିବାବେଳେ ରାଜ୍ୟରେ ୪୧.୫%ରେ ପହଞ୍ଚତ୍ଥିଲା। ନଭେମ୍ବର ଶେଷ ସୁଦ୍ଧା ସବୁ ଜିଲାରେ ଟିକାକରଣକୁ ଅତି କମ୍ରେ ୯୦% ରେ ପହଞ୍ଚାଇବା ପାଇଁ ଶର୍ମା ନିର୍ଦ୍ଦେଶ ଦେଇଛନ୍ତି। ଜାତୀୟ ସ୍ବାସ୍ଥ୍ୟ ମିଶନ ନିର୍ଦ୍ଦେଶିକା ଶାଳିନୀ ପଣ୍ଡିତ କହିଛନ୍ତି, ବର୍ତ୍ତମାନ ସୁଦ୍ଧା ଟିକା ଅପଚୟ ବିଯୁକ୍ତ ୫.୩ ପ୍ରତିଶତ ରହିଛି। ଏହା ଫଳରେ ପ୍ରାୟ ୨୦ ଲକ୍ଷ ଡୋଜ୍ ଟିକା ନଷ୍ଟ ହେବାରୁ ରକ୍ଷା କରାଯିବା ସହ ଅଧିକ ଲୋକଙ୍କୁ ଟିକା ଦିଆଯାଇପାରିଛି। ଭିଡିଓ କନଫରେନ୍ସିଂରେ ଯୋଗଦେଇ ସବୁ ଜିଲାପାଳମାନେ ଟିକାକରଣ ସମ୍ବନ୍ଧିତ ବର୍ତ୍ତମାନର ସ୍ଥିତି ଏବଂ ବାଦ୍ ରହିଥିବା ୧୮ ବର୍ଷରୁ ଊର୍ଦ୍ଧ୍ୱ ନାଗରିକଙ୍କ ଟିକାକରଣ ନିମନ୍ତେ କାର୍ଯ୍ୟ ଯୋଜନା ବିଷୟରେ ବୈଠକରେ ଜଣାଇଛନ୍ତି।
