ଝଲସୁଛି ଗାଁଠୁ ସହର
7:00 amSeptember 2, 2019 / 21

ଭୁବନ,୨।୯(ଡି.ଏନ.ଏ.) ଆଜି ଧରାବତରଣ କରିବେ ବିଦ୍ୟାଦାତା ଗଜାନନ। ଏହାକୁ ନେଇ ଉତ୍ସବ ମୁଖର ହୋଇଉଠିଛି ଭୁବନ। ସୁଉଚ୍ଚ ତୋରଣ, ଉଜ୍ଜ୍ୱଳ ଆଲୋକମାଳାରେ ସହର ଝଲସି ଉଠିଥିବାବେଳେ ସବୁଠି ସୃଷ୍ଟି ହୋଇଛି ଆଧ୍ୟାତ୍ମିକ ବାତାବରଣ।
ଚଳିତବର୍ଷ ୨୧ ପୂଜା ମଣ୍ଡପରେ ବିଘ୍ନବିନାଶକଙ୍କ ଆବାହନ କରାଯାଉଛି। ଏହାକୁ ନେଇ ମାସେ ହେଲା ପୂଜା ପ୍ରତିଷ୍ଠାନଗୁଡ଼ିକ ପ୍ରସ୍ତୁତି ଚଳାଇଛନ୍ତି। ପ୍ରତିଯୋଗିତାମୂଳକ ଭାବେ ପୂଜାମଣ୍ଡପରେ ସୁଉଚ୍ଚ ମୂର୍ତ୍ତି ପୂଜା ପାଇବେ। କୁଶଳୀ କାରିଗରମାନେ ମୂର୍ତ୍ତି ପ୍ରସ୍ତୁତ କରିଥିବାବେଳେ ରଙ୍ଗକାମ ଶେଷ ହୋଇଛି। ପ୍ରତି ପୂଜା ମଣ୍ଡପରେ କମିଟି ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଛି।
ପୂଜାକୁ ଶୃଙ୍ଖଳିତ କରିବାକୁ ଚଳିତବର୍ଷଠାରୁ ଠାକୁରଙ୍କ ମେଲଣ କରାଯିବ। ସବୁ ମେଢ଼ ଏକାଠି ହୋଇ ଭସାଣିରେ ସାମିଲ ହେବେ। ୫୩ନଂ. ଜାତୀୟ ରାଜପଥ ପାର୍ଶ୍ୱରେ ସମସ୍ତ ମେଢ଼ କରାଯାଇଥିବାବେଳେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହେବ। ଟ୍ରାଫିକ୍‌ ନିୟନ୍ତ୍ରଣ କରିବାକୁ ଜାତୀୟ ରାଜପଥରେ ଅପରାହ୍ନ ୫ଟାରୁ ରାତି ୧୧ଟା ଯାଏ ଯାନବାହନ ଚଳାଚଳ ବନ୍ଦ ରଖିବା ପାଇଁ ଦାବି ହେଉଛି। ପୂଜା ଅବ୍ୟବହିତ ପୂର୍ବରୁ ରବିବାରଠାରୁ ବହୁ ଉଠା ଦୋକାନୀ ପସରା ମେଲାଇଲେଣି।
ଏ ନେଇ ଥାନାଧିକାରୀ ନିର୍ମଳା ଗୋଚ୍ଛାୟତ କୁହନ୍ତି, ଜନଗହଳିପୂର୍ଣ୍ଣ ସ୍ଥାନରେ ଶାନ୍ତିଶୃଙ୍ଖଳା ରକ୍ଷା କରିବାକୁ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି। ପ୍ରତି ପୂଜାମଣ୍ଡପ ନିକଟରେ ଶୃଙ୍ଖଳିତ ଦର୍ଶନ ଲାଗି ପୋଲିସ କର୍ମୀ ନିୟୋଜିତ ହେବେ। ୫୩ନଂ. ଜାତୀୟ ରାଜପଥର କଲେଜ ଛକରୁ ନୂଆଭୁବନ ଯାଏ ଭିଡ଼ ନିୟନ୍ତ୍ରଣ ଲାଗି ଭାରିଯାନ ଚଳାଚଳ ଉପରେ କଟକଣା ଜାରି କରାଯିବ। ମେଲଣରେ ମଧ୍ୟ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ସେ ସୂଚନା ଦେଇଛନ୍ତି।