ଠାକୁରମୁଣ୍ଡା,୨୦ା୧(ଡି.ଏନ୍.ଏ.)- ଜେଲରେ ହେଲା ପ୍ରେମୀ ଯୁଗଳଙ୍କ ବିବାହ। ପ୍ରେମିକାଙ୍କୁ ବରଣମାଳା ଦେଇ ଜୀବନସାଥୀର ସ୍ବୀକୃତି ଦେଲେ ବଳାତ୍କାର ଅଭିଯୁକ୍ତ ପ୍ରେମିକ। ମୟୂରଭଞ୍ଜ ଜିଲା କରଞ୍ଜିଆ ଜେଲରେ ଶୁକ୍ରବାର ଏହି ବହୁଚର୍ଚ୍ଚିତ ବିବାହ ଅନୁଷ୍ଠିତ ହୋଇଯାଇଛି।
ଝାରପୋଖରିଆ ଥାନା ଅଧୀନ ସାରିପଦା ଗ୍ରାମର କୁମାର ହେମ୍ବ୍ରମ୍ ବଳାତ୍କାର ଅଭିଯୋଗରେ ଦୀର୍ଘ ୧୦ ମାସ ଧରି କରଞ୍ଜିଆ ଜେଲରେ ଥିଲେ। କରଞ୍ଜିଆ ଅଞ୍ଚଳରେ ଏକ ଠିକାସଂସ୍ଥାର ଡ୍ରାଇଭର ଭାବେ ସେ କାମ କରୁଥିଲେ। କାମ କରିବା ସମୟରେ ସେହି ଅଞ୍ଚଳର ଜଣେ ଯୁବତୀଙ୍କ ସହିତ ତାଙ୍କର ପ୍ରେମ ସମ୍ପର୍କ ସ୍ଥାପନ ହୋଇଥିଲା। ଉଭୟ ବିବାହ ପାଇଁ ସ୍ଥିର କରିଥିବା ବେଳେ ସେମାନଙ୍କ ପରିବାର ବିରୋଧ କରିଥିଲେ। ପରେ ଯୁବତୀ ଜଣକ ପ୍ରେମିକ ନାମରେ ବଳାତ୍କାର ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି କରଞ୍ଜିଆ ଥାନା ପୋଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ତେବେ ସେମାନଙ୍କ ପରିବାର ମଧ୍ୟରେ ବିବାଦର ସମାଧାନ ହୋଇଯିବାରୁ ଉଭୟଙ୍କ ବିବାହ ନିମନ୍ତେ ସ୍ଥିର ହୋଇଥିଲା। ଅଭିଯୁକ୍ତଙ୍କ ଓକିଲ ନିର୍ମଳ ସେଠୀଙ୍କ ଉଦ୍ୟମରେ ଜେଲ ସୁପରିଣ୍ଟେଣ୍ଡେଣ୍ଟ ଓ ଅତିରିକ୍ତ ଜିଲା ଦୌରାଜଜ୍ଙ୍କ ସହମତି ନେଇ ଗତ ଶୁକ୍ରବାର ସବ୍ରେଜିଷ୍ଟ୍ରାରଙ୍କ ଉପସ୍ଥିତିରେ ଜେଲ ପରିସରରେ ଉଭୟଙ୍କ ବିବାହ ଅନୁଷ୍ଠିତ ହୋଇଥିଲା।
