ଢେଙ୍କାନାଳ ଅଫିସ, ୨୯।୫-ଏଭରେଷ୍ଟ ବିଜୟିନୀ କଳ୍ପନା ଦାଶଙ୍କ ପରଲୋକରେ ଢେଙ୍କାନାଳ ଜିଲା ପ୍ରଶାସନ ପକ୍ଷରୁ ମଙ୍ଗଳବାର ଭାବୋଦ୍ଦୀପକ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି। ଏହି ଅବସରରେ ପୂର୍ବାହ୍ନ ସାଢ଼େ ୧୦ଟାରେ ସ୍ଥାନୀୟ ଗୋପବନ୍ଧୁ ଟାଉନ୍ହଲ୍ରେ ଆୟୋଜିତ ସ୍ମୃତିସଭାରେ ଅଧ୍ୟକ୍ଷତା କରି ଜିଲାପାଳ ନିଖିଲ ପଓ୍ବନ କଲ୍ୟାଣ କହିଲେ, କଳ୍ପନା ସବୁଦିନ ପାଇଁ ଅମର। ଯୁବଶକ୍ତି ପାଇଁ ସେ ଥିଲେ ପ୍ରେରଣାର ଉତ୍ସ। ୫୦ବର୍ଷରେ ଏଭରେଷ୍ଟ ଚଢ଼ିବା କଥା ଭାବିବା ତାଙ୍କ ଦୃଢ଼ମନା ବ୍ୟକ୍ତିତ୍ୱର ପରିଚୟ ଦିଏ। ତାଙ୍କ ବିୟୋଗରେ ହୋଇଥିବା ପରିବାରର କ୍ଷତି କେହି ଭରଣା କରିପାରିବେ ନାହିଁ। ଏପରି କଠୋର ସମୟରେ ପ୍ରଶାସନ ପରିବାର ସଦସ୍ୟଙ୍କ ସହିତ ଅଛି ବୋଲି ଜିଲାପାଳ ମତବ୍ୟକ୍ତ କରିଥିଲେ। ଅତିରିକ୍ତ ଜିଲାପାଳ ପୂର୍ଣ୍ଣଚନ୍ଦ୍ର ମିଶ୍ର ସ୍ବାଗତ ଭାଷଣରେ କହିଲେ, କଳ୍ପନା ଓଡ଼ିଆ ଜାତିର ଗୌରବ। ସେ ବିରଳ କୀର୍ତ୍ତିମାନ ସ୍ଥାପନ କରି ଢେଙ୍କାନାଳ ମାଟିକୁ ଗୌରବାନ୍ବିତ କରିଛନ୍ତି। ତାଙ୍କ ପରଲୋକରେ ଯେଉଁ ଶୂନ୍ୟସ୍ଥାନ ସୃଷ୍ଟି ହୋଇଛି ତାହା ଅପୂରଣୀୟ ବୋଲି ସେ ମତବ୍ୟକ୍ତ କରିଥିଲେ। କାର୍ଯ୍ୟକ୍ରମରେ କଳ୍ପନାଙ୍କ ମା’ ଶୈଳବାଳା ଦାଶଙ୍କ ସମେତ ପରିବାରର ଅନ୍ୟ ସଦସ୍ୟ ଉପସ୍ଥିତ ଥିଲେ।
ପ୍ରାରମ୍ଭରେ କଳ୍ପନାଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା। ସହରର ଏକ ସଡ଼କ, ନବନିର୍ମିତ ସ୍ପୋଟର୍ସ କମ୍ପ୍ଳେକ୍ସ, କ୍ରୀଡ଼ା ଅନୁଷ୍ଠାନକୁ ତାଙ୍କ ନାମରେ ନାମିତ କରିବାକୁ ପ୍ରସ୍ତାବ ଦିଆଯାଇଥିଲା। ସେହିପରି ଜିଲା ସଂଗ୍ରହାଳୟରେ କଳ୍ପନାଙ୍କ ପର୍ବତାରୋହଣରେ ବ୍ୟବହୃତ ପୋଷାକ ସ୍ଥାନିତ କରିବାକୁ ଦାବି ଉପସ୍ଥାପନ କରାଯାଇଛି।
ବରିଷ୍ଠ ଆଇନଜୀବୀ ଦୀପ୍ତିଶ ପ୍ରସାଦ ପଟ୍ଟନାୟକ, ରମା ସିଂ, ପୂର୍ବତନ ନଗରପାଳ ସୁଧାଂଶୁ ଦଳେଇ, ଇଶୋର ସମ୍ପାଦିକା ପୁଷ୍ପାଞ୍ଜଳି ଜେନା, ଜିଲା ଓକିଲ ସଂଘ ସଭାପତି ସଞ୍ଜୟ ମିଶ୍ର, ଜିଲା ସାମ୍ବାଦିକ ସଂଘ ସଭାପତି ପ୍ରସନ୍ନ ପଟ୍ଟନାୟକ, ରେଡ୍କ୍ରସ୍ ଉପସଭାପତି ବିରଞ୍ଚତ୍ ନାରାୟଣ ପାଣି, ମିଳିତ ବଜାର ପୂଜା କମିଟି ସଭାପତି ରାମଚନ୍ଦ୍ର ପାତ୍ର ପ୍ରମୁଖ କଳ୍ପନାଙ୍କୁ ଶିବକନ୍ୟା ଭାବେ ଉପସ୍ଥାପନ କରିଥିଲେ। ଏଭରେଷ୍ଟ କଳ୍ପନାଙ୍କୁ ପରିଚିତି ଦେଇଥିଲା। ସେହି ଏଭରେଷ୍ଟରେ ହିଁ ସେ ଲୀନ ହୋଇଗଲେ ବୋଲି ଅତିଥିମାନେ ମତବ୍ୟକ୍ତ କରିଥିଲେ। ଜିଲା ସଂସ୍କୃତି ପରିଷଦ ସଂଯୋଜକ ଅବନୀ ମିଶ୍ର କାର୍ଯ୍ୟକ୍ରମକୁ ସଂଯୋଜନା କରିଥିବାବେଳେ ପିଡି ଡିଆର୍ଡିଏ ନରୋତ୍ତମ ବେହେରା ଧନ୍ୟବାଦ ପ୍ରଦାନ କରିଥିଲେ।
