ଓ୍ବାଶିଂଟନ, ୧।୬(ପି.ଟି/ଆଇଏଏନ୍ ଏସ୍): ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଜି ୭ ସମ୍ମିଳନୀକୁ ସେପ୍ଟେମ୍ବର ପର୍ଯ୍ୟନ୍ତ ଘୁଞ୍ଚାଇଦେଇଛନ୍ତି। ଏହାସହ ସେ ଏହି ପୁରୁଣା ବ୍ଲକ୍କୁ ଜି ୧୦ କିମ୍ବା ଜି ୧୧ ଯାଏ ବିସ୍ତାର କରି ଭାରତ ସମେତ ଆଉ ୩ଟି ଦେଶକୁ ସାମିଲ କରିବାକୁ ଆଗ୍ରହ ପ୍ରକାଶ କରିଛନ୍ତି। ଚାଇନା ବିରୋଧରେ ବିଶ୍ୱକୁ କରୋନା ଭାଇରସ୍ ପଠାଇଥିବା ଅଭିଯୋଗ ଆଣି ବେଜିଂକୁ ମାତ୍ ଦେବା ପାଇଁ ଟ୍ରମ୍ପ୍ ଏପରି ରଣନୀତି ପ୍ରସ୍ତୁତ କରିଥିବା କୁହାଯାଉଛି।
ଜି ୭ ହେଉଛି ବିଶ୍ୱର ସବୁଠୁ ବଡ଼ ୭ଟି ଅର୍ଥନୀତିକୁ ନେଇ ଗଠିତ ରାଷ୍ଟ୍ର ସମୂହ। ଏହି ଏଲିଟ୍ ଗ୍ରୁପ୍ରେ ବର୍ତ୍ତମାନ ଆମେରିକା, ବ୍ରିଟେନ, ଫ୍ରାନ୍ସ, ଜର୍ମାନୀ, ଇଟାଲୀ, ଜାପାନ ଓ କାନାଡା ଅଛନ୍ତି। ଜି ୭ ସଦସ୍ୟ ରାଷ୍ଟ୍ରଗୁଡ଼ିକର ମୁଖ୍ୟମାନେ ପ୍ରତିବର୍ଷ ଅନ୍ତର୍ଜାତୀୟ ଅର୍ଥନୀତି ଓ ଆର୍ଥିକ ପ୍ରସଙ୍ଗଗୁଡ଼ିକୁ ନେଇ ସମ୍ମିଳନୀ କରିଥାନ୍ତି। ଅଧ୍ୟକ୍ଷତା କରୁଥିବା ଦେଶ ସାଧାରଣତଃ ସ୍ବତନ୍ତ୍ର ନିମନ୍ତ୍ରଣ ଜରିଆରେ ଆଉ ଗୋଟିଏ କିମ୍ବା ଦୁଇଟି ରାଷ୍ଟ୍ରକୁ ସମ୍ମିଳନୀକୁ ଡାକିଥାନ୍ତି। ଗତବର୍ଷ ଆୟୋଜକ ରାଷ୍ଟ୍ର ଫ୍ରାନ୍ସର ରାଷ୍ଟ୍ରପତି ଇମାନ୍ବେଲ ମାକ୍ରଁ ଉକ୍ତ ସମ୍ମିଳନୀକୁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିମନ୍ତ୍ରଣ କରିଥିଲେ। ଚଳିତବର୍ଷ ଆମେରିକା ଜି ୭ର ଅଧ୍ୟକ୍ଷତା କରୁଛି। କରୋନା ଭାଇରସ୍ ସଂକ୍ରମଣ ଦୃଷ୍ଟିରୁ ଏଥର ଏହି ସମ୍ମିଳନୀ ଭିଡିଓ କନ୍ଫରେନ୍ସ ଜରିଆରେ କରାଯିବ ବୋଲି ପୂର୍ବରୁ ଆଲୋଚନା ହେଉଥିଲା। କିନ୍ତୁ ସଦସ୍ୟଭୁକ୍ତ ରାଷ୍ଟ୍ରଗୁଡ଼ିକର ମୁଖ୍ୟମାନେ ବ୍ୟକ୍ତିଗତ ଭାବେ ଆସି ଏଥିରେ ଯୋଗଦିଅନ୍ତୁ ବୋଲି ଆମେରିକା ରାଷ୍ଟ୍ରପତି ଟ୍ରମ୍ପ୍ ଚାହୁଁଛନ୍ତି।
ରାଷ୍ଟ୍ରପତି ଟ୍ରମ୍ପ୍ ଶନିବାର ଫ୍ଲୋରିଡାରୁ ଓ୍ବାଶିଂଟନ ଡିସିକୁ ଏୟାରଫୋର୍ସ ଓ୍ବାନ୍ରେ ଯାତ୍ରା କରୁଥିବାବେଳେ ଖବରଦାତାମାନଙ୍କ ପ୍ରଶ୍ନର ଉତ୍ତରରେ କହିଥିଲେ, ସେ ଜି ୭ ସମିଟକୁ ସେପ୍ଟେମ୍ବର ପର୍ଯ୍ୟନ୍ତ ସ୍ଥଗିତ କରିଦେଇଛନ୍ତି। ବିଶ୍ୱରେ ଯାହା ଚାଲିଛି ତାକୁ ନେଇ ଜି ୭ ଉପଯୁକ୍ତ ପ୍ରତିନିଧିତ୍ୱ କରିପାରୁ ନାହିଁ କି ସମାଧାନର ବାଟ ବାହାର କରି ପାରୁନାହିଁ। ଏହା ହେଉଛି ରାଷ୍ଟ୍ର ସମୂହର ପୁରୁଣାକାଳିଆ ଗୋଷ୍ଠୀ। ତେଣୁ ଆମେରିକାରେ ରାଷ୍ଟ୍ରପତି ନିର୍ବାଚନ ଶେଷ ହେବା ପରେ ଏହାକୁ ଜି ୧୦ କିମ୍ବା ଜି ୧୧ରେ ପରିଣତ କରାଯାଇପାରିବ। ସେପ୍ଟେମ୍ବରରେ ୧୫ରେ ହେବାକୁ ଥିବା ଜାତିସଂଘ ସାଧାରଣ ସଭା ଅଧିବେଶନ ପୂର୍ବରୁ ଏହାର ସମ୍ମିଳନୀ ଆୟୋଜନ ସମ୍ଭବ। ବିଶ୍ୱ ଅର୍ଥନୀତିର ଏହି ୭ ସଦସ୍ୟ ବିଶିଷ୍ଟ ଗ୍ରୁପ୍କୁ ପୁନର୍ଗଠନ କରି ଏଥିରେ ରୁଷିଆ, ଦକ୍ଷିଣ କୋରିଆ, ଅଷ୍ଟ୍ରେଲିଆ ଓ ଭାରତକୁ ସାମିଲ ହେବା ପାଇଁ ନିମନ୍ତ୍ରଣ କରିବା ଯୋଜନା ରହିଛି। ଏନେଇ ସେ ୪ ରାଷ୍ଟ୍ରର ନେତାମାନଙ୍କ ସହ ଅନୌପଚାରିକ ଭାବେ ଆଲୋଚନା କରିଛନ୍ତି। ଆମେ ଅଷ୍ଟ୍ରେଲିଆ, ଭାରତ ଓ ଦକ୍ଷିଣ ଆଫ୍ରିକାକୁ ଚାହୁଁଛୁ ବୋଲି କହିବାବେଳେ ଟ୍ରମ୍ପ୍ ରୁଷିଆର ନାମ ନେଇ ନ ଥିଲେ। ଏହା ପୂର୍ବରୁ ସେ ଏହି ରାଷ୍ଟ୍ରଗୋଷ୍ଠୀରେ ଯୋଗଦେବା ପାଇଁ ରୁଷିଆକୁ ନିମନ୍ତ୍ରଣ କରିଥିଲେ। କାରଣ ପୂର୍ବରୁ ଏହା ଜି ୮ ଥିବାବେଳେ ରୁଷିଆ ଏଥିରେ ସାମିଲ ଥିଲା। କିନ୍ତୁ ୨୦୧୪ରେ ପୂର୍ବତନ ରାଷ୍ଟ୍ରପତି ବାରାକ୍ ଓବାମାଙ୍କ ସମୟରେ ରୁଷିଆ ନିଜ ଭୂଖଣ୍ଡରେ କ୍ରିମେଆକୁ ଯୋଡ଼ିବା ପରେ ମସ୍କୋକୁ ବାହାର ବାଟ ଦେଖାଇ ଦିଆଯାଇଥିଲା। ଏବେ ରୁଷିଆକୁ ଏଥିରେ ପୁଣିଥରେ ସାମିଲ ପାଇଁ ଯୋଜନା ଚଳାଇଛନ୍ତି ଟ୍ରମ୍ପ୍। ସେହିପରି ହ୍ବାଇଟ୍ ହାଉସ୍ର ଷ୍ଟ୍ରାଟେଜିକ୍ କମ୍ୟୁନିକେଶନ୍ସ ନିର୍ଦ୍ଦେଶକ ଆଲିସା ଆଲେକ୍ସଜାଣ୍ଡ୍ରା କହିଛନ୍ତି, ଚାଇନାର ଭବିଷ୍ୟତ ନେଇ ରଣନୀତି ପ୍ରସ୍ତୁତ କରିବା ପାଇଁ ଜି ୭କୁ ବ୍ୟାପକ କରାଯାଇ ଏଥିରେ ଆମର ପାରମ୍ପରିକ ସହଯୋଗୀମାନଙ୍କୁ ସାମିଲ କରାଯିବ।
ପ୍ରକାଶ ଯେ, ଆମେରିକାରେ ରାଷ୍ଟ୍ରପତି ନିର୍ବାଚନ ନଭେମ୍ବର ୩ରେ ହେବ। ହ୍ବାଇଟ୍ ହାଉସ୍କୁ ପୁଣିଥିରେ ଯିବା ପାଇଁ ଟ୍ରମ୍ପ୍ ଦ୍ୱିତୀୟ ଥର ଏହି ନିର୍ବାଚନ ଲଢ଼ୁଛନ୍ତି।
ଏଭଳି ସମୟରେ କରୋନା ଭାଇରସ୍ ଚାଇନାର ଉହାନ ସହରରୁ ବାହାରି ସାରା ବିଶ୍ୱକୁ କବଳିତ କରିଛି। ହୋପ୍କିନ୍ସ ୟୁନିଭର୍ସିଟି ତଥ୍ୟାନୁସାରେ କରୋନାରେ ଅଦ୍ୟାବଧି ବିଶ୍ୱର ୬ ନିୟୁତରୁ ଊର୍ଦ୍ଧ୍ୱ ଲୋକ ସଂକ୍ରମିତ ହୋଇଥିବାବେଳେ ୩,୬୯,୦୦୦ରୁ ଅଧିକ ଜୀବନ ଯାଇସାରିଲାଣି।
ଏହି ଘାତକ ଭୂତାଣୁରେ ଆମେରିକା ସର୍ବାଧିକ କ୍ଷତିଗ୍ରସ୍ତ ହୋଇଛି। ଏଠାରେ ୧.୭ ନିୟୁତ ସଂକ୍ରମିତ ଥିବାବେଳେ ୧,୦୩,୦୦୦ ଜଣଙ୍କ ମୃତ୍ୟୁ ଘଟିଛି। ବେଜିଂ ବେଳ ଥାଉ ଥାଉ ମହାମାରୀ କୋଭିଡ୍-୧୯ ସମ୍ପର୍କରେ ବିଶ୍ୱକୁ ଅବଗତ କଲା ନାହିଁ। ଫଳରେ ଏହା ସବୁ ରାଷ୍ଟ୍ରକୁ ବ୍ୟାପିଲା ବୋଲି ଆମେରିକା ଅଭିଯୋଗ ଆଣୁଛି। ଏଥିସହ ଏହି ଭାଇରସ୍ର ଉତ୍ପତ୍ତି ସମ୍ପର୍କରେ ବିଧିବଦ୍ଧ ତଦନ୍ତ କରାଯାଉ ବୋଲି ଦାବି କରିଆସୁଛି। ଅନ୍ୟପକ୍ଷେ ଆମେରିକାର ସମସ୍ତ ଅଭିଯୋଗକୁ ଚାଇନା ଖଣ୍ଡନ କରିଛି। ତେଣୁ ଚାଇନାକୁ ବୁଦ୍ଧି ଶିଖାଇବା ପାଇଁ ଟ୍ରମ୍ପ୍ ଜି ୭ର ସମ୍ପ୍ରସାରଣ ଯୋଜନା କରିଥିବା କୂଟନୀତିଜ୍ଞମାନେ ମତବ୍ୟକ୍ତ କରିଛନ୍ତି।
