ଛେଣ୍ଡିପଦା,୨୧।୭(ସ୍ବ.ପ୍ର.): ଅନୁଗୋଳ ଜିଲା ଛେଣ୍ଡିପଦା ବ୍ଲକ ସଦରମହକୁମାରେ ଅଞ୍ଚଳବାସୀଙ୍କ ବହୁ ପ୍ରତୀକ୍ଷିତ ଦେୱାନୀ ବିଚାରପତି (କନିଷ୍ଠ ବିଭାଗ) ତଥା ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତ ରବିବାର ଉଦ୍ଘାଟିତ ହୋଇଛି। ଏଥିରେ ମୁଖ୍ୟ ଅତିଥି ଭାବେ ଓଡ଼ିଶା ଉଚ୍ଚତମ ନ୍ୟାୟାଳୟର ବିଚାରପତି ଜଷ୍ଟିସ ବିଶ୍ବନାଥ ରଥ ଯୋଗ ଦେଇ ଛେଣ୍ଡିପଦାରେ ନିର୍ମିତ ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତକୁ ଉଦ୍ଘାଟନ କରିଥିଲେ। ଏହି କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଅନୁଗୋଳ ଜିଲା ଦୌରାଜଜ ଅଶାନ୍ତ କୁମାର ଦାସ, ଅତିରିକ୍ତ ଜିଲା ଦୌରାଜଜ ସୁରେଶ କୁମାର ପ୍ରାଧାନ, ସିଜିଏମ ସୋମ୍ୟକ କୁମାର ପାତ୍ର, କୋର୍ଟ ରେଜିଷ୍ଟ୍ରାର ବାସୁଦେବ ଆଚାର୍ଯ୍ୟ, କୋର୍ଟ ମ୍ୟାନେଜର ସୁମନ କୁମାର, ଜିଲା ପାଳ ମନୋଜ କୁମାର ମହାନ୍ତି, ତହସିଲଦାର ଡାନିଏଲ ଏକ୍କା, ବିଡିଓ ରୋମାଞ୍ଚଳ ଖମାରୀଙ୍କ ସମେତ ଲୋକପ୍ରତିନିଧି ମାନେ ଯୋଗଦେଇଥିଲେ।
ଏହି ଉଦଘାଟନୀ ଉତ୍ସବ ଅବସରରେ ମୁଖ୍ୟ ଅତିଥି ଅଞ୍ଚଳବାସୀ ତଥା ମହକିଲମାନଙ୍କ ସୁବିଧା ନିମନ୍ତେ ଛେଣ୍ଡିପଦାରେ ନୂତନ ଅଦାଲତ ଖୋଲାଯାଇଥିବା କହିଥିଲେ। ଏହା ସହ ମହକିଲମାନଙ୍କୁ ତ୍ୱରିତ ନ୍ୟାୟ ପ୍ରଦାନ ପାଇଁ ବାର ଆସୋସିଏଶନଙ୍କୁ ପରାମର୍ଶ ଦେଇଥିଲେ। ଛେଣ୍ଡିପଦାର ନୂତନ ଅଦାଲତର ପ୍ରଥମ ବିଚାରପତି ଭାବେ ଶାନ୍ତା ସାମଲ ନିଯୁକ୍ତି ପାଇବା ସହିତ ପ୍ରଥମ ଦିନରେ ଅବକାରୀ ମାମଲାର ଶୁଣାଣି କରିଥିଲେ । ଏହି କାର୍ଯ୍ୟକ୍ରମରେ ଛେଣ୍ଡିପଦା ବାର ଆସୋସିଏଶନ ସଭାପତି ପ୍ରଭାତ କୁମାର ବେହେରା , ସମ୍ପାଦକ ରାଜକିଶୋର ବେହେରା ,ଅନୁଗୋଳ ବାର ଆସୋସିଏଶନ ସଭାପତି ଜିତେନ୍ଦ୍ର ସାହୁ ପ୍ରମୁଖ ଉପସ୍ଥିତ ଥିଲେ।
