ବିନିକା, ୧୭ା୫(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବିନିକା ବିଜ୍ଞାପିତ ଅଞ୍ଚଳ ପରିଷଦର ୧୨ ନଂ. ଓ୍ବାର୍ଡ ମିଶ୍ରପଡ଼ାର ତୃତୀୟା କର(୬୦)। ସେ ଗୁଟେ ବିରଲ କିସମର ରୋଗ୍ରେ ପୀଡ଼ିତ ଅଛନ୍। ଯେନ୍ଥିରଲାଗି ତାକର ନାକେ ଦୁଇ ତିନ୍ଟା ଆବୁ ବଢ଼ତେଲ ଯାଉଛେ। ନିଶାସ ପରଶାସ ନେବାରେ ବଡ଼ାଭାରି ଅସବିଧା ହେଉଛେ। ସେଥିରଲାଗି ସେ କାହିଁ ଯାଇ ଆସି ନାଇଁପାରବାର। ଇଆଡ଼େ ତୃତୀୟା ନିହାତି ଗରିବ୍ ହେଇଥିଲାବେଲେ ଚିକିସତ୍ା ଲାଗି ପାସେ ଫଟା କଉଡ଼ିଟେ ନଁାଇଁନ।
ସୂଚନା ଅନ୍ସାରେ ତୃତୀୟାକଁର ପରିବାର କହେଲେ ମାଏକିନା ଚାନ୍ଦ, ପୁଓ ଡକିଳ ଆର ମିଥୁନ। ଜମିବାଡ଼ି ବଲି କିଛି ନାଇଁ। ଗୁଟେ ସରକାରୀ ଜାଗାରେ ବହୁତ୍ ବଛର ହେଲା ଘର କରି କୁଟୁମବସିଆ ରହିଆସୁଛନ୍। ପରିବାରଟା ବାଉଁଶ ସାମାନ ତିଆରି କରି ବିକାଭଂଗା କରୁଛନ୍। ସେଥ୍ରେ ଯାହା କମାନି ହେଉଛେ ଘରର ଚୁଲି ଜଲୁଛେ। ହେଲେ କଡ଼ା ଜଂଗଲ ଆଇନ୍ ଲାଗି ଏହେଦେ ବାଉଁଶଟା ବି ଦୁରଲଭ ହେଇଗଲାନ। ବେପାର ବି ଆଘର ଲେଖେଁ ନାଇଁ ଚଲବାର, ମୁଠେ ଖାଇ ଡଁାଡ଼େ ଶୁଇବାର ହେଉଛେ। ଏନ୍ତାଥି ମୋର ଚିକିସତ୍ା କଥା କିଏ ପଚାରେ ବଲି ତୃତୀୟା କହିଛନ୍।
ତୃତୀୟା ଆଗରୁ ଏନ୍ତା ନାଇଁଥାଇ। ବିହା ହେବାର ୧୨ ବଛର ଉତାରୁ ନାକେ ଚନା ଟାକର ଗୁଟେ ଆବୁ ହେଲା। ପଛେ ପଛେ ବଢ଼ି ବଡ଼ ହେଲା। ତୃତୀୟାର ବଡ଼ପୁଓ ଛବିଳ ବ୍ରହ୍ମପୁର ନେଇ ଝନେ ଡାକ୍ତରକୁଁ ଦେଖାଲେ। ହେଲେ ଟଁକା ପଏସା ଅଭାବୁ ଦୁଇ ବାପ୍ପୁଓ ଘରକେ ଫିରିଆଏଲେ। ସେଦିନଠାନୁ ଆଏଜ୍କେ ୨୦ ବଛର ହେଲା ତୃତୀୟା ଅଭାବ ଅନାଟନ ଲାଗି ରୋଗ୍ର ଚିକିସତ୍ା କରେଇ ନାଇଁପାରବାର। ଏନ୍ତାଥି ସେ ନିଜର ଭାଏଗ୍କେ ଆଦ୍ରି ଘରେ ପଡ଼ିରହିଛନ୍। ତୃତୀୟା ଆର ତାକର ମାଏକିନା ଭତା ପାଉଥିଲାବେଲେ ରାଶନ କାର୍ଡ ଆର ସରକାରୀ ଯୋଜନାରେ ପକାଘର ଖଁଡ଼େ ପାଏବାରୁ ବଁଚିତ ହେଇ ରହିଛନ୍। ଗରିବ୍ ଦୁଖିକୁ ସରକାର ମାହାଲିଆ ବିଦ୍ୟୁତ୍ ସଂଯୋଗ ଦେଉଥିଲା ବେଲେ ସେଥ୍ରୁ ବି ପରିବାରଟା ବଁଚିତ ହେଇ ରହିଛନ୍। ଜିଲା ପରଶାସନ ଇ ଦୁଖି ଗରିବ୍ ପରିବାର ଉପରେ ଦୁରୁଷ୍ଟି ଦେଇ ତୃତୀୟାକୁଁ ଚିକିସତ୍ା ସାହାଯ୍ ସଂଗେ ସବୁ ପରକାର ସରକାରୀ ସୁବିଧା ଯୁଗେଇ ଦେବାକେ ସାଧାରନରେ ଦାବି ହେଉଛେ। ଇ ବାବ୍ଦେ ବିନିକା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିସତ୍ା ଅଧ୍କାରୀ ପ୍ରଭାସ ପ୍ରଧାନକୁଁ ପଚରାଲାରୁ ତୃତୀୟାକଁର ବାବ୍ଦେ ମୋର ପାସେ ଖବର ନାଇଁଥାଇ। ଆପନକରନୁ ଜାନଲି, ତାକର ପରୀକ୍ଷା ନିରୀକ୍ଷା କରାଯିବା ଆର ସେ ହିସାବେ ଚିକିସତ୍ା ସୁବିଧା ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ। ସେନ୍ତା ପରିବାରଟା ଅନେକ ସରକାରୀ ସୁବିଧାରୁ ବଁଚିତ୍ ଥିବାର ବାବ୍ଦେ ବିନିକା ଏନ୍ଏସି କାର୍ଯ୍ୟନିର୍ବାହୀ ଅଧ୍କାରୀ ଦୁଃଖିରାମ ନାଏକକୁଁ ପଚରାଲାରୁ ଯଦି ପରିବାରକେ ସରକାରୀ ଯୋଜନାରେ ଘର ନାଇଁ ମିଲି ସେମାନେ ବିନିକା ତହସିଲରୁ ବଛରକ ୫୦ ହଜାରୁ କମ୍ କମାନୀ ହେଉଥିବାର ଗୁଟେ ପରମାନପତର ଆନୁନ୍। ପରମାନପତର ଆନ୍ଲେ ରୁଗୀକଁର ପରିବାରକେ ସବୁ ପରକାର ଯୋଜନାରେ ସାମିଲ କରବାର ଦିଗେ ପଦକ୍ଷେପ ନିଆଯିବା ବଲି ସେ କହିଥିଲେ।
