ବିନିକା,୧୫ା୫(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବିନିକା ବ୍ଲକ ଅଧୀନ ମହଦା ଗଁାର ଶ୍ରୀରାମ ନଗର ପଡ଼ାର ଉତ୍ତମ ବିଶ୍ୱାଳକଁର ପୁଓ ସ୍ବାଧୀନ ବିଶ୍ୱାଳ(୪)। ସେ ଜନମ ବେଲେ ଠିକ୍ଠାକ୍ ଥିଲେ। ହେଲେ କେହେନ୍ସି କାରନ୍ରୁ ତାକର ମେରୁହାଡ଼ରେ ଅସବିଧା ଦେଖାଦେଇ ଦିନୁଦିନ୍କେ ଗୋଡ଼ହାତ୍ ସଁପୁର ହେଇବସଲା। ଏନ୍ତାଥି ମା’ବାପ୍ ଘରେ ଯାହାଥିଲ ବିକାଭଂଗା, ଧାର ଉଧାର କରି ପୁଓର ଚିକିସତ୍ାକରି ନିରାଶ ହେଲେ। ଏହେଦେ ଟଁକା ପଏସା ଅଭାବୁ ପୁଓର ଚିକିସତ୍ା ନାଇଁ କରେଇପାରି ଘରେ ପକେଇ ରଖିଛନ୍। ଅବସ୍ତା ଏନ୍ତା ଯେ ସ୍ବାଧୀନକେ ଉଷୋକଷା ବି ଘିନି ଦେଇ ନାଇଁପାରବାର।
ସୂଚନା ଅନ୍ସାରେ ବିନିକା ବ୍ଲକ ମହଦା ଗଁାର ଶ୍ରୀରାମ ନଗରର ଉତ୍ତମ ବିଶ୍ୱାଳ। ସେ ଝନେ ନିହାତି ଗରିବ୍ ଲୋକ୍ ହେଇଥିଲାବେଲେ କୁଲି ମଜୁରି କରି କୁଟୁମ ପୁଷୁଛନ୍। ସଁପତି କହେଲେ ଝାଟିମାଟିର ୨ ବଖରା ଘର। ତାକର ପରିବାର କହେଲେ ମାଏକିନା ଜନତା ବିଶ୍ୱାଳ(୨୮) ଆର ଗୁଟେ ବଲି ପୁଓ ସ୍ବାଧୀନକେ ନେଇ ସଁସାର। ପରିବାରଟା ଗରିବ୍ ସୀମାରେଖା ତଲେ ଥିଲେ ବି ସବୁପରକାର ସରକାରୀ ସୁବିଧା ସୁଯୋଗରୁ ବଁଚିତ ହେଇ ରହିଛନ୍। ଉତ୍ତମ କୁଲି ମଜୁରି କରି ଯାହା କମଉଥିଲେ ସେଥ୍ରେ ପରିବାରଟା ହସ୍ଖୁସିରେ ଚଲିଯାଉଥିଲେ। ଏନ୍ତାଥି ୪ ବଛର ତଲେ ପୁଓ ସ୍ବାଧୀନ ଜନମ ହେଇଥିଲେ। ପରିବାରରେ ଖୁସିର ଲହର ଖେଲିଯାଇଥିଲା। ହେଲେ ପଛେ ସ୍ବାଧୀନର ବଏସ୍ ବଢ଼ବାର ସଂଗେ ହାତ୍ଗୋଡ଼ ନାଇଁ ବଢ଼ଲା, ସେ ସବୁବେଲେ କଁଦାକଟା କଲେ। ଗରିବ୍ ମା’ବାପ୍ ପୁଓର ଚିକିସତ୍ା ଲାଗି ସୁବର୍ଣ୍ଣପୁର ଜିଲା ମୁଖିଆ ଡାକ୍ତରଖାନାନୁ ମୂଲ କରି ବୁର୍ଲା ବଡ଼ ଡାକ୍ତରଖାନା ଆର ଶେଷେ ବିଶାଖାପାଟଣା ନେଇଥିଲେ। ସେଠାନେ ସ୍ବାଧୀନର ମେରୁହାଡ଼ରେ ଅସ୍ବିଧା ଥିବାର ଜନାପଡ଼ିଥିଲା। ଗରିବ୍ ମା’ବାପ୍ ଘରର ଜିନିଷପାତି ବିକାଭଂଗା, ଧାର ଉଧାର କରି ପୁଓର ଚିକିସତ୍ା କରି ସରବ୍ସୁଅଁାତ୍ ହେଇଗଲେ। ହେଲେ କିଛି ଲାଭ ନାଇଁହେଲା। ଏହେଦେ ମା’ବାପ୍ ଟଁକା ପଏସା ଅଭାବୁ ପୁଓର ଚିକିସତ୍ା କରେଇ ନାଇଁପାରବାର। ଇଆଡ଼େ ପୁଓର ଉଷୋକଷା ବାବ୍ଦେ ମାସିକ ୧୫ ହଜାର ଟଁକା ଖରଚ୍ ଲାଗୁଛେ। ମା’ବାପ୍ ସଖାଲ ପାଏଲେ ବାହା ଜାଂଗଲ ମାଜଲେ ଯାଇ ଘରର ଚୁଲି ଜଲୁଛେ। ଏନ୍ତାଥି ପୁଓର ଉଷୋକଷା ବାବ୍ଦେ ମାସିକ ୧୫ ହଜାର ଟଁକା ଚିନ୍ତା ବି କରି ନାଇଁପାରବାର। ଏହେଦେ ଦୁଇ ମାଏଝି ମୁନୁଷ ଗୁଟେବଲି ପୁଓର ଅବସ୍ତା ଦେଖି ହରମେଶା ଅଁାଖିରୁ ଲହ ଝରଉଛନ୍। କାଣା କରବେ, କାହାକେ କହେବେ, କିଏ ପୁଓର ଚିକିସତ୍ା ଲାଗି ସାହାଯ୍ କରବା ଭାବି ଭାବି ଦିନ୍ ରାଏତ୍ ନାଇଁ ଶୁଇବାର। ଯେନ୍ ବଏସେ ସ୍ବାଧୀନ ଖେଲାବୁଲା କରବାର କଥା ସେ ସମିଆରେ ସବୁବେଲେ ଖଟେ ପଡ଼ିରହିଛନ୍। ଶେଷେ ଇ ଗରିବ୍ ମା’ବାପ୍ ଗଣମାଧ୍ୟମ ଜରିଆରେ ପୁଓର ଚିକିସତ୍ା ସାହାଯ୍ ଲାଗି ଜିଲା ପରଶାସନ ଆର ସୁଆସ୍ତିଅ ବିଭାଗକେ ଗୁହାରି କରିଛନ୍। ଇ ବାବ୍ଦେ ବିନିକା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିସତ୍ା ଅଧ୍କାରୀ ପ୍ରଭାସ ପଧାନକୁଁ ପଚରାଲାରୁ ମୋର ପାସେ ଇ ବାବ୍ଦେ ଖବର ନାଇଁଥାଇ। ଘଟନାର ତଦଁତ୍ କରି ସରକାରୀ ହିସାବେ ଯେନ୍ଟା ହେବା ଚିକିସତ୍ା ସାହାଯ୍ ଯୁଗେଇ ଦିଆଯିବା ବଲି ସେ କହିଥିଲେ।
