କୋରୁକୋଣ୍ଡା, ୧୧।୯(ଡି.ଏନ୍.ଏ.): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ଅନ୍ତର୍ଗତ ଚିତାପାରି ୩ ପଞ୍ଚାୟତ ଏମ୍ଭି ୧୦୪ ଗ୍ରାମରେ ୪ ବର୍ଷ ପୂର୍ବେ ଅର୍ଜୁନ କୀର୍ତ୍ତନିଆ ଓ ସ୍ତ୍ରୀ ମାଧୁରୀଙ୍କର ଏକ ଶିଶୁକନ୍ୟା ଜନ୍ମ ହୋଇଥିଲା। କିଛି ଦିନ ମଧ୍ୟରେ ସେମାନେ ଝିଅ ବ୍ୟୁଟି ମଧ୍ୟରେ ପରିବର୍ତ୍ତନ ଦେଖିବାକୁ ପାଇଲେ। ବ୍ୟୁଟି ମାନସିକ ବିକାରଗସ୍ତ ଥିବା ମା’ବାପା ଜାଣିବାକୁ ପାଇଥିଲେ। ବାପା ଅର୍ଜୁନ ଜଣେ ଦିନ ମଜୁରିଆ ହୋଇଥିବା ବେଳେ ଧାରକରଜ କରି ବୁର୍ଲା ବଡ଼ ମେଡିକାଲରେ ଭର୍ତ୍ତି କରିଥିଲେ। ହେଲେ କୌଣସି ସୁଫଳ ମିଳିଲା ନାହିଁ। ଝିଅକୁ କଟକ ବଡ଼ ମେଡିକାଲ ନିଆଗଲେ କିଛି ପରିବର୍ତ୍ତନ ଆସିପାରେ ବୋଲି ଚିକିତ୍ସା କରୁଥିବା ଡାକ୍ତର କହିଥିବା ପରିବାର ଲୋକେ କହିଛନ୍ତି। ବ୍ୟୁଟି ଠିକ୍ ଭାବେ ଚାଲିପାରୁ ନ ଥିବା ବେଳେ ବସି ମଧ୍ୟ ପାରୁ ନାହିଁ। ଠିକ୍ରେ ଖାଦ୍ୟ ଖାଉ ନ ଥିବାରୁ ତା’ର ଝାଡା ହେଉ ନ ଥିବା ମା’ବାପା କହିଛନ୍ତି। ଅର୍ଥ ଅଭାବ ଯୋଗୁ ତା’ର ଚିକତ୍ସା ହୋଇପାରୁ ନାହିଁ। ଏ ନେଇ ଜିଲା ପ୍ରଶାସନ ସହାୟତା କଲେ ବ୍ୟୁଟିର ଚିକିତ୍ସା ହୋଇପାରିବ ବୋଲି ବାପା ଅନୁରୋଧ କରିଛନ୍ତି।
