ଚାଷୀଙ୍କ ସମସ୍ୟା ସମାଧାନ କରିବ କୃଷି ବିଭାଗ: ପଞ୍ଚାୟତ ବୁଲି ଜ୍ଞାନ ବାଣ୍ଟିବେ ଗ୍ରାମୀଣ କୃଷି କର୍ମଚାରୀ
8:17 amNovember 14, 2019 / 21

ଅନୁଗୋଳ ଅଫିସ, ୧୪।୧୧ – ଚାଷୀଙ୍କ ସମସ୍ୟା ସମାଧାନ ପାଇଁ ଏଣିକି ଗାଁ ଗାଁ ବୁଲିବେ ଗ୍ରାମୀଣ କୃଷି କର୍ମଚାରୀ। ଚାଷୀଙ୍କ ସହ ବୈଠକ କରି ଉନ୍ନତ ଜ୍ଞାନକୌଶଳ ସମ୍ପର୍କରେ ସେମାନଙ୍କୁ ଅବଗତ କରାଇବେ। ଅନୁଗୋଳ ଜିଲାର କେତେକ ପଞ୍ଚାୟତରେ ଏପରି କାର୍ଯ୍ୟ ଆରମ୍ଭ ହୋଇଗଲାଣି।
ଅନୁଗୋଳ ଜିଲାରେ ଥିବା ୨୨୫ଟି ପଞ୍ଚାୟତ ପାଇଁ ଏବେ ଗ୍ରାମ୍ୟ କୃଷି କର୍ମଚାରୀ ନିୟୋଜିତ ହୋଇଛନ୍ତି। ପ୍ରତି ୩ରୁ ୪ଟି ପଞ୍ଚାୟତ ପାଇଁ ଜଣେ ଲେଖାଏ କର୍ମଚାରୀଙ୍କୁ ଦାୟିତ୍ୱ ଦିଆଯାଇଛି। ଏମାନେ ମାସର ଏକ ନିର୍ଦ୍ଦିଷ୍ଟ ଦିନରେ ପଞ୍ଚାୟତ କାର୍ଯ୍ୟାଳୟରେ ଚାଷୀଙ୍କ ସହ ଆଲୋଚନା କରି ସେମାନଙ୍କ ସମସ୍ୟା ସମାଧାନ କରିବା ସହ ଉପରିସ୍ଥ ଅଧିକାରୀଙ୍କୁ ଅବଗତ କରିବେ। ଯଦି କୃଷି କର୍ମଚାରୀ ସମସ୍ୟାର ସମାଧାନ କରି ନ ପାରନ୍ତି ତା’ହେଲେ ଉଚ୍ଚପଦସ୍ଥ ଅଧିକାରୀଙ୍କ ନିକଟକୁ ତାହା ନିଆଯିବ। ଏହି କୃଷି କର୍ମଚାରୀମାନେ ଚାଷ କାର୍ଯ୍ୟର ନୂତନ ଜ୍ଞାନ କୌଶଳ ସମ୍ପର୍କରେ ଚାଷୀଙ୍କୁ ଅବଗତ କରିବେ। ଏଥିସହ ରୋଗ ପୋକ ନିୟନ୍ତ୍ରଣ, ଫାର୍ମ ସବ୍‌ସିଡ୍‌ ଓ ଅନ୍ୟାନ୍ୟ ଚାଷ ସମ୍ପର୍କିତ ସୂଚନା ଚାଷୀଙ୍କୁ ଦେବେ। ଏହି କୃଷି କର୍ମଚାରୀମାନେ ଅନ୍‌ଲାଇନ୍‌ରେ ମଧ୍ୟ ଚାଷୀଙ୍କୁ ପରାମର୍ଶ ଦେଇପାରିବେ। ବିଭିନ୍ନ ବ୍ଲକରେ ଚାଷୀଙ୍କୁ ନେଇ ମାସକୁ ଦୁଇଥର କର୍ମଶାଳା ଆୟୋଜନ କରାଯିବ। ମାସର ପ୍ରଥମ ଓ ତୃତୀୟ ଶନିବାର ଏହି କର୍ମଶାଳା ପ୍ରତି ବ୍ଲକ କାର୍ଯ୍ୟାଳୟରେ ହେବ। ଏଥିରେ କୃଷି ଅଧିକାରୀଙ୍କ ସହ ଅନ୍ୟ ବିଭାଗୀୟ ଅଧିକାରୀ ମଧ୍ୟ ଉପସ୍ଥିତ ରହିବେ। ଜିଲାରେ ଗ୍ରାମ୍ୟ କୃଷି କର୍ମଚାରୀ ପଦବୀ ସଂଖ୍ୟା ୧୨୩ ଥିଲେ ବି ୬୯ ଜଣ କାର୍ଯ୍ୟ କରୁଛନ୍ତି। ବାକି ପଦବୀ ଖାଲି ପଡ଼ିଥିବା ଜିଲା କୃଷି ଉପନିର୍ଦ୍ଦେଶକ ବିଜୟ କୁମାର ମହାପାତ୍ର ସୂଚନା ଦେଇଛନ୍ତି। ସେହିପରି ଆଗାମୀ ଡିସେମ୍ବର ୧ରୁ କୃଷି ବିଭାଗରେ ରାଜ୍ୟ ସରକାରଙ୍କ ମୋ ସରକାରରେ ଥିବା ୫-ଟି କାର୍ଯ୍ୟକାରୀ ହେବ। ଚାଷୀଙ୍କ ସହ ଜିଲାରେ ଥିବା କୃଷି ବିଭାଗ କିପରି ସମନ୍ବୟ ରକ୍ଷା କରୁଛି ସେ ସମ୍ପର୍କରେ ସରକାର ସିଧାସଳଖ ଭାବେ ପଚାରି ବୁଝିବେ ବୋଲି ବିଶ୍ୱସ୍ତ ସୂତ୍ରରୁ ସୂଚନା ମିଳିଛି।