ନୂଆଦିଲ୍ଲୀ,୪-୮: ବିଳମ୍ବିତ ହାଉସିଂ ପ୍ରକଳ୍ପରେ ନିର୍ମିତ ଘରର ମାଲିକାନା ନେବା ଲାଗି ବିଲ୍ଡର ବାଧ୍ୟ କରିପାରିବ ନାହିଁ। ଏହା ଘର ମାଲିକଙ୍କ ଇଚ୍ଛାଧୀନ। ଫ୍ଲାଟ୍ ନିର୍ମାଣ ସରିଥିବାରୁ ଘର କ୍ରେତାଙ୍କୁ ଟଙ୍କା ଫେରସ୍ତ ଦେବ ନାହିଁ ବୋଲି ବିଲ୍ଡର କହିପାରିବ ନାହିଁ। ନ୍ୟାଶନାଲ କଞ୍ଜ୍ୟୁମର ଡିସ୍ପ୍ୟୁଟ୍ସ ରିଡ୍ରେସାଲ କମିଶନ(ଏନ୍ସିଡିଆର୍ସି) ପକ୍ଷରୁ ରାୟରେ ଉଲ୍ଲେଖ କରାଯାଇଛି। ଜଷ୍ଟିସ ଭି.କେ.ଜୈନଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏ ସଂକ୍ରାନ୍ତରେ ଆଗତ ଏକ ମାମଲାର ବିଚାର କରି ବିଲ୍ଡର ପାୟୋନିୟର ଅର୍ବାନ ଲ୍ୟାଣ୍ଡ ଆଣ୍ଡ ଇନ୍ଫ୍ରାଷ୍ଟ୍ରକଚରକୁ ୪.୪୩ କୋଟି ଟଙ୍କା ଘର କ୍ରେତାଙ୍କୁ ଫେରସ୍ତ ଦେବା ଲାଗି ନିର୍ଦ୍ଦେଶ ଦେଇଛନ୍ତି। ସମ୍ପୃକ୍ତ କ୍ରେତା ଗୁରୁଗ୍ରାମରେ ଏକ ଫ୍ଲାଟ୍ କିଣିବା ଲାଗି ୨୦୧୨ରେ ବିଲ୍ଡରଙ୍କୁ ଟଙ୍କା ଦେଇଥିଲେ। ୨୦୧୫ ସୁଦ୍ଧା ତାଙ୍କୁ ଏହି ଫ୍ଳାଟ୍ ମିଳିବାର ଥିଲା। ତେବେ ବିଲ୍ଡର ଏହା ପ୍ରଦାନ କରିବାରେ ବିଫଳ ହୋଇଥିଲେ। ଏହାକୁ ଦୃଷ୍ଟିରେ ରଖି ଘର କ୍ରେତାଙ୍କ ପକ୍ଷରୁ ଟଙ୍କା ଫେରସ୍ତ ପାଇଁ ୨୦୧୮ରେ ଏନ୍ସିଡିଆର୍ସିଙ୍କ ନିକଟରେ ଆବେଦନ କରାଯାଇଥିଲା। ଆବେଦନକାରୀ ମାମଲା ଦାଏର କରିବାର ୧୫ ଦିନ ପୂର୍ବରୁ ବିଲ୍ଡର ସମ୍ପୃକ୍ତ କର୍ତ୍ତୃପକ୍ଷଙ୍କ ଠାରୁ ନିବାସ ସାର୍ଟିଫିକେଟ ହାସଲ କରିଥିଲେ ସୁଦ୍ଧା କମିଶନ ଅର୍ଥ ଫେରାଇବାକୁ ନିର୍ଦ୍ଦେଶ ଦେଇଛନ୍ତି। କାରଣ ୨ ବର୍ଷରୁ ଅଧିକ ସମୟ ହେବ ଘର ଦେବାରେ ବିଳମ୍ବ ହୋଇଛି ବୋଲି ଖଣ୍ଡପୀଠ କାରଣ ଦର୍ଶାଇଛନ୍ତି।
