ଦିଗପହଣ୍ଡି,୧୬।୮(ଡି.ଏନ୍.ଏ.): ଗଞ୍ଜାମ ଜିଲା ମହୁଡ଼ା ଗ୍ରାମ ନିକଟ ଶେଖାଓ୍ବତ ଗ୍ରାନାଇଟ କମ୍ପାନୀ କର୍ମଚାରୀଙ୍କୁ ଦାଦାବଟି ଲାଗି କରାଯାଇଥିବା ଆକ୍ରମଣ ଘଟଣାରେ ଶୁକ୍ରବାର ଦିଗପହଣ୍ଡି ପୋଲିସ ୨ ଅଭିଯୁକ୍ତଙ୍କୁ ଗିରଫ କରି ବ୍ରହ୍ମପୁର କୋର୍ଟ ଚାଲାଣ କରିଛି। ଅଭିଯୁକ୍ତ ହେଲେ ମହୁଡା ଛାଞ୍ଚଡା ପଲ୍ଲୀ ଗ୍ରାମର ଅଜୟ ଲେଙ୍କା, ଲାଠୀ ଗ୍ରାମର ଶିବଗୌଡ। କେସ ନଂ. ୧୨୭/୧୯ରେ ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବ୍ରହ୍ମପୁର ଜେଲକୁ ପଠାଇ ଦିଆଯାଇଛି।
ଏସ୍ ଆଇ ମଧୁସ୍ମିତା ପ୍ରଧାନଙ୍କ ସୂଚନାନୁଯାୟୀ, ଗତ ଜୁଲାଇ ୧୪ ତାରିଖ ରାତିରେ କଳାମୁଖାଧାରୀ ଦୁର୍ବୃତ୍ତ କମ୍ପାନୀ ଭିତରକୁ ପଶି ବ୍ୟାପକ ଭଙ୍ଗାରୁଜା କରିଥିଲେ। ପ୍ରତିବାଦ କରିବାରୁ କମ୍ପାନୀ ମାଲିକଙ୍କ ଭଣଜା ତଥା ମ୍ୟାନେଜର ଦେବୀ ସିଂ ଏବଂ ରାତି ଜଗୁଆଳ ବୁଡ଼ୁ ସେଠୀଙ୍କୁ ୫୦ ହଜାର ଦାଦା ବଟି ମାଗିଥିଲେ। ତେବେ ସେମାନେ ଟଙ୍କା ଦେବା ଲାଗି ମନା କରିବାରୁ ଉଭୟଙ୍କୁ ଖଣ୍ଡାରେ ଆକ୍ରମଣ କରି ଫେରାର ହୋଇଯାଇଥିଲେ।
